Read kumam Hebreo 6 Bible Online

Hebreo 6 - kumam bible

Hebreo 6

¹Kyja'tzun tten, qq'o'nk tilil tu'n tokxix qnab'l ik tza'n jun tij xjal, ex mya noq o'kx tu'n qyolin ti'j tuj tnejel xnaq'tzb'il ti'j Crist. Ex mi'n qo aj meltz'aj juntl maj tu'n ttzaj qe' qokslab'l ti'j Dios, ex tu'n tajtz ti'j qanmi ti'j qb'inchb'en minti' tajb'en.

²Ex mya ax tu'n qkyaj ten ti'j ju xnaq'tzb'il ti'j b'yab'l, ex ti'j ju xnaq'tzb'il tu'n tkub' qq'o'n qq'ab' tib'aj kywi' okslal, ex ti'j ju xnaq'tzb'il ti'j anq'ib'l kyxol kyimni, ex ti'j ju xnaq'tzb'il ti'j jwisi tzul te jumajx.

³Kyja'tzun k'okel tilil qu'n tu'n tok mastl qnab'l, qa tajb'il Dios.

⁴Porke aqeju ma spik'b'anjtz tuj kynab'l ex ma tz'el kynik' ti'j ju oyaj tzaj tuj kya'j, ex ma kyk'am kyoklen ti'j Xewb'aj Xjan,

⁵ex ma tz'el kynik' ti'j tyol Dios tb'anilxix, ex ma kyil qe tb'inchb'en nim kyipumal ktzajel tyek'un tuj tq'ijlalil tzul,

⁶qa ma che kub' tz'aq jlu, mlayx b'ant tu'n tajtz juntl maj ti'j kyanmi, tu'nju in jaw kyq'o'n Tk'wa'l Dios twitz crus juntl maj, ex in tzaj tch'ixwi kywitz xjal kyu'n.

⁷Porke ik tza'n jun piẍ tx'otx' in ak' tu'n jb'al kukx in kub' tib'aj, ex in tq'o'n tawal tu'n tajb'en kye qeju in che aq'nan twitz, in kub' tky'iwla'n Dios tx'otx' lu;

⁸atzunju tx'otx' in tq'o'n ch'i'x ex ch'i'x k'ul, minti'tl tajb'en; ex jakulo tma Dios tu'n tnaj, ex aju b'ajsb'il te tu'n tok tq'aq'al.

⁹Erman at nk'u'je kyi'je, maske in chin yoline ikju, atzun kyeye, in qe'xix nk'u'je kyi'je ok kyb'incha'ye aju mas b'a'n; atzun jlu jun yek'b'il qa ax tok ma che klete.

¹⁰Porke ate Dios tz'aqlxix, mlay tzik' tna'l tu'n aju kyaq'unb'ene; xi kyyek'une qa at kyk'ujlalile ti'j Dios tu'nju e ajb'ene kye okslal ex kukx in che ajb'ene kye.

¹¹Pero wajb'ile teyle junjun kyeye kukx tu'n tok tilil kyu'ne tu'ntzun tqe'xix kyk'u'je ti'j ju in che ayone ti'j.

¹²Mi'n waje tu'n kyoke ky'aj, noq o'kx tu'n kyok lpe'ye kyi'j qeju ma kyk'am aju yol tzaj ttziyan Dios, ma kyk'am tu'nju at kyokslab'l ex at kypasens.

¹³Porke tej ttzaj ttziyan Dios tyol te Abraham, ax tb'i tzaj tna'n ti'j tyol, porke minti' juntl mas ma' toklen twitz tu'n ttzaj tna'n tb'i ti'j tyol.

¹⁴Tzaj tma'n te Abraham: Ax tok nimxix kb'el nky'iwla'na, ex kchmetelxix tiyjila wu'ne, chi Dios.

¹⁵Kyja'tzun o tk'am Abraham aju tzaj ttziyan Dios te, tu'nju at tpasens tu'n tayon ti'j.

¹⁶Ax tok ok in xi kytziyan xjal jun yol axix tok, in tzaj kyna'n tb'i juntl mas ma' toklen kywitz; ex qa ma jaw jun yol kyxol, atzun in tzaj kyna'n tb'i Dios ti'j kyyol ex tu'n tkyaj segurxix.

¹⁷Kyja'tzun tzaj tna'n Dios ax tb'i ti'j tyol, ex atzun taj Dios, tu'n ttzaj tyek'unxix qa mlay ch'expet aju kub' t-ximan; tzaj tyek'un Dios jlu kye qeju at tu'n kyk'monte aju tzaj ttziyan kye.

¹⁸Tzaj tna'n Dios ax tb'i ti'j tyol tu'n tq'uqb'anjtzxix qk'u'j tu'nju kab'e yol mlay ch'expet, ex mlay b'ant tu'n tnik'an Dios yol ti'j jlu; kyja'tzun ma qo pon oq tuk'il Dios tu'n qklet ex tu'n qkamb'ante aju in qo ayon ti'j.

¹⁹Aju oyb'il lu ik tten ik tza'n taq'al barc, in ajb'en te tzuyb'il te qanmi tu'n tten qanmi segurxix ex tu'n mi'n qyyukch; aju oyb'il atzun tzajni tuj ju Lugar Xjanxix ti'jxi ju xb'alun te maqb'il tkub' tuj tmij tja Dios tuj kya'j.

²⁰Atzun okx nej Jesús tu'n tjaqet qb'e. Kyja'tzun ma tz'ok Jesús te tnejel pal te jumajx, ax toklen ik tza'n te Melquisedec.