Read kumam Hebreo 8 Bible Online

Hebreo 8 - kumam bible

Hebreo 8

¹Aju mas nim toklen ti'j ju in chin yoline ti'j, at jun tnejel pal qe q'uql tuj b'anq'ab'aj ttxlaj tq'uqb'il Dios tuj kya'j, jatum in kawin Dios.

²Atzun jlu tnejel pal in ajb'en tuj Lugar Xjan ex tuj ja xb'alun te nab'l Dios, atzunju ja xb'alun axix tok, tu'n Dios jaw tb'incha'n, mya tu'n xjal.

³Porke kykyaqil qeju in che ok q'o'n te tnejel pal, atzun kyaq'un tu'n t-xi kyq'o'n qe oyaj ex qe chojb'il; kyja'tzun tten ax ikx te Jesucrist ilxix ti'j tu'n t-xi tq'o'n jun oyaj.

⁴Noqwit ax ta' twitz tx'otx', myawtlo palte, porke ate' pal q'olte oyaj ik tza'n in tma'n tley Moisés.

⁵Aqeju pal lu in che ajb'en tuj jun Lugar Xjan, atzun tilb'ilalju ex t-xlekumal ju Lugar Xjan at tuj kya'j, ik tza'n tzaj q'ma'n te Moisés tej ch'ixtoq tjaw tb'incha'n ju ja xb'alun te nab'l Dios: Ke'yinxa tu'n tb'inchanteya tkyaqil ik tza'n tilb'ilal xi nyek'une teya twi witz, chi Dios.

⁶Atzun ja'lo ma tk'am Crist jun tajb'eb'l mas ma' toklen, porke ate in tzaj tx'olb'ante jun yol mas b'a'nxix aju ma kyaj b'ant ti'j tu'n Dios quk'il, ex mas b'a'n ju yol lu twitzju tzaj ttziyan Dios ojtxi.

⁷Porke aju ojtxi yol noqwit minti' tpaltil, myawtlo il ti'j tu'n tul juntl tkab'in yol.

⁸Kyja'tzun tzaj tma'n Dios qa at kypaltil xjal, ik tza'n in tma'n tuj Tu'jil: Chi Qman: Tzul tq'ijlalil kyjel b'ant ti'j jun ak'aj yol wu'ne kyuk'il aj Israel ex kyuk'il aj Judá.

⁹Mya ik tten ju yol lu ik tza'n ju yol kyaj b'ant ti'j wu'ne kyuk'il kyxe'chel tuj tq'ijlalil tej kyetz nẍaqlune tuj tx'otx' Egipto. Porke minti' o txi kyniman aju yol kyaj b'ant ti'j wu'ne kyuk'il, kyja'tzun ma che el wik'une, chi Qman.

¹⁰Kyja'tzun tten atzun juntl yol kyjel b'ant ti'j wu'ne kyuk'il aj Israel tuj tq'ijlalil tzul, chi Qman: K'okex nq'o'ne nleye tuj kynab'l, ex kb'el ntz'ib'ane twitz kyanmi. Ex chin okele te Kydios, atzun kye che okel te jun tnam etzan wu'ne.

¹¹Mya il ti'j tu'n t-xi kyq'o'n xjal xnaq'tzb'il kye kyuk'il, ex mya il ti'j tu'n t-xi kyq'o'n xnaq'tzb'il kye kyerman, ex mlay txi kyma'n: Ojtzqima Qajaw che chiwt. Porke kykyaqil k'elel kynik' wi'je, tza'nx qeju ch'in kyoklen ax ikx qeju ma' kyoklen.

¹²Porke ktzajel q'aq'an nk'u'je kyi'j tu'nju kyb'inchb'en mya b'a'n, ex te jumajx mlay tzaj nna'ntle kyil, chi Dios.

¹³Tu'nju in yolin Dios ti'j jun yol ak'aj tu'n tkyaj b'ant ti'j tu'n kyuk'il, kyja'tzun aju yol at nej ma tz'ok tq'o'n te minti' tajb'en; aju nno'k q'o'n te minti' tajb'en ex ma tijin, ch'ix tkub' naj.