Read kumam Hebreo 9 Bible Online

Hebreo 9 - kumam bible

Hebreo 9

¹Tej tkyaj b'ant ti'j tnejel yol tu'n Dios kyuk'il xjal ojtxi, nak'u'maj ti'j tza'n tten tu'n kyk'ulun xjal, ex at jun ja twitz tx'otx' xjan tb'i.

²Porke aju ja xb'alun te nab'l Dios iktzun tten kyja': Aju tnejel cuart, Lugar Xjan tb'i; atzun tkub' ju kandil tuk'ix ju mes kyuk'ix qe pan ky'iwla'maj.

³Ex ti'jxi tkab'in xb'alun te maqb'il tkub' tuj tmij tja Dios, at juntl cuart, Lugar Mas Xjanxix tb'i.

⁴Atzun tkub' altar q'an pwaq jatum in kub' patit storak, ex atzun tkub' ju kax tok q'an pwaq ti'j tkyaqil, k'ub'l teju yol tzaj tma'n Dios. Tujtzunju kax tku'x jun k'il q'an pwaq ttx'otx'il jatum tku'x maná, ex atzun tku'x tky'aqo'ch Aarón aju o xulin, ex atzun kyku'x qe tz'lom ab'j jatum tz'ib'an ju yol kyaj b'ant ti'j tu'n Dios kyuk'il aj Israel.

⁵Ex tib'aj ju kax tkub' kyilb'ilal qe querubín, te jun yek'b'il qa ax ta' Dios, tkub' kyxlekumal tib'aj tmaqsil kax jatum in chjet kyil xjal. Pero mlay b'ant tu'n nyoline ti'j tkyaqil jlu ja'lo.

⁶Kyja'tzun tten nak'u'maj ti'j tuj ju ja xb'alun te nab'l Dios. Tuj tnejel cuart kukx in che okx qe pal tu'n tjapun ju kyajb'eb'l.

⁷Atzun tuj tkab'in cuart o'kx ju tnejel pal nno'kx jun maj tuj ab'q'i; ex mlay tz'okx qa minti' chik' q'i'n tu'n, tnejelxix in xi tq'o'n chojb'il te til, ax ikx te chojb'il kyil xjal tu'nju at maj in che el tzpet ti'j.

⁸Tu'n jlu in tyek'un Xewb'aj Xjan qa na'nxtoq tjaqet ju b'e tu'n kyokx xjal tuj Lugar Mas Xjanxix, porke atx ju tnejel cuart tuj ja xb'alun te nab'l Dios.

⁹Tkyaqil jlu noq jun techal ti'j ju at tuj tq'ijlalil ja'lo, in che q'onjtz oyaj ex chojb'il ik tza'n nak'u'maj ti'j, pero minti' tipumal jlu tu'n tqe'xix tk'u'j ju xjal in k'ulun.

¹⁰Porke aju k'ulb'il lu noq o'kx in yolin ti'j chib'j ex k'ab'j ex junxilchaq tx'ajb'il; tkyaqil jlu nak'u'maj ti'j noq o'kx tu'n tajb'en te kyximlal, kyaj q'ma'n kye tu'n kyb'inchante jlu akutzun nnu'l tq'ijlalil tu'n tch'expet tkyaqil tu'n Dios.

¹¹Atzun ja'lo ma tzul Crist ex ma tz'ok te tnejel pal tu'n ttzaj tq'o'n aju mas tb'anil qe, ex atzun in ajb'en tuj ju ja xb'alun mas ma' t-xilen ex mas tz'aqlxix, ex mya kyu'n xjal xb'ant, ex myatzun ta' twitz tx'otx'.

¹²Ex mya tchk'el tman chip okx ti'n Crist, ex mya tchk'el wakẍ, noq o'kx texte tchk'el okx tq'o'n tuj ju Lugar Mas Xjanxix; noq junx maj okx, kyja'tzun tb'incha jun kolb'il qe te jumajx.

¹³Porke aqe xjal in che tz'ilix twitz kyley, in saqix kyximlal tu'nju nno'k chitet tchk'el tman wakẍ kyi'j, ex tchk'el tman chip, ex ttza'jil ttxu wakẍ aju in kub' patit twi altar.

¹⁴Qatzun qa ikju, ¿yajtzun tchk'el Crist, myapetzun mas at tipumal? Porke ma saqix tuj qanmi tu'n ti'j ju qb'inchb'en minti' tajb'en, tu'ntzun qajb'en teju Dios itz'. Porke noq tu'n Xewb'aj Xjan, aju kukx tten te jumajx, xi tq'on tib' Crist te Dios, ex ok te jun chojb'il minti' tpaltil.

¹⁵Kyja'tzun tten, ate Crist tkub' qxol tuk'il Dios tu'n ttzaj tchik'b'a'n aju ak'aj yol ma kyaj b'ant ti'j tu'n Dios quk'il; ex ma kyim Crist tu'n kyklet xjal tjaq' kyil aju o kyb'incha tej atxtoq ju tnejel yol tzaj tma'n Dios ojtxi, ex tu'n kyk'monte jun etzb'il te jumajx aqeju ma che txkonjtz tu'n Dios.

¹⁶Porke ik tza'n jun xjal b'i'x in kyaj b'ant jun u'j tu'n alkye kyetzb'il tk'wa'l kxel tq'o'n tu'ntzun kyk'monte kyetzb'il ok tkyim xjal; kyja'tzun, maxi ok kyk'ma' k'wa'lb'aj kyetzb'il ok tkyim xjal.

¹⁷Porke aju tyol xjal ma kyaj b'ant tuj u'j, maxi at tipun okxi tkyim xjal; minti' tipun ju yol qa itz'x te xjal.

¹⁸Kyja'tzun tten, tej tb'ant ti'j ju tnejel yol tu'n Dios kyuk'il qxe'chel, el kychk'el alumaj tu'n tkyaj segurxix ju yol.

¹⁹Porke tb'ajlenxi tma'n Moisés kykyaqil qe mandamyent tz'ib'an tuj ley kye kykyaqil xjal, tzaj ti'n Moisés kyaq lan ex tuk'ix tq'ab' tze' hisopo tb'i, ku'x tmu'n tuj kychk'el tor tuk'ix kychk'el tman chip tuk'ix a', ex ok tchitun ti'jx ju libro ax ikx kyi'j kykyaqil xjal.

²⁰Ex xi tma'n Moisés kye: Ate chik' lu te kyuwsab'l teju yol ma kyaj b'ant ti'j tu'n Dios kyuk'ile.

²¹Ex mya noq o'kx jlu, ax ikx ok tchitun Moisés chik' ti'j ju ja xb'alun te nab'l Dios ex kyi'j kykyaqil qe makb'il in che ajb'en tuj k'ulb'il te Dios.

²²Jaku b'ant tu'n t-xi qma'n: Tkyaqil in saqix tu'n chik' ik tza'n in tma'n ley; ex qa minti' ma tz'el chitj chik', mlay kub' najset il.

²³Aqe jlu atzun kyilb'ilal qeju ate' tuj kya'j, ilxixtzun ti'j tu'n kysaqix tu'n kychk'el alumaj; atzun qeju ax ate' tuj kya'j, il ti'j tu'n tkub' jun chojb'il mas b'a'n tu'n kysaqix.

²⁴Porke mya'tzun okx Crist tuj jun Lugar Xjan b'incha'n kyu'n xjal, porke aju Lugar Xjan lu noq tilb'ilal ju axix tok at tuj kya'j; ex axtzun okx Crist tuj kya'j tu'n tkub' ten twitz Dios tu'n tkub'san qi'j.

²⁵Ex mya tu'n t-xi tq'on tib' te chojb'il nimku maj, mya ik tza'n in tb'incha'n tnejel pal, nno'kx tuj Lugar Mas Xjanxix junjun ab'q'i q'i'n chik' tu'n, mya tex tchk'el.

²⁶Noqwit ikx te Cristju, ilxixwitlo ti'j tu'n tkyim nimku maj ttzajlenx atxix tej tb'ant twitz tx'otx'; atzun ja'lo tej tjapun b'aj tq'ijlalil, tyek'u tib' Crist noq junx maj tu'n tkub' najset ju il, tu'nju xi tq'on tib' te chojb'il.

²⁷Ex ik tza'n kyajni b'ant ti'j tu'n kykyim xjal noq junx maj, ex kykyimlenxitzun che okel tuj xjel,

²⁸ax ikx te Crist xi tq'on tib' noq junx maj tu'n tkyim tu'n tchjet kyil nimku xjal; ex kb'el tyek'un tib' tkab'maji'n, mya chjol il, noq o'kx tu'n kyklet qeju in che ayon ti'j.