Read kumam Santiago 1 Bible Online

Santiago 1 - kumam bible

Santiago 1

¹Aqine Santiago, tmajen Dios qine ex tmajen Qajaw Jesucrist; in xi nq'o'ne jun q'olb'eb'l kyeye, aqeye tiyjil Israel, kab'laj k'loj kyb'ete, kysipan kyib'e tuj tkyaqil twitz tx'otx'.

²Aqeye wermaniye, qa ma tzaj junxilchaq joyb'il kyi'je, tz'okwit te nim tzalajb'il kyeye.

³Porke b'a'n kyu'ne, qa ma che malonjtze tuj kyokslab'le, ktel mastl kypasense tu'n tik'x kyu'ne.

⁴Tz'ok tililx kyu'ne tu'n tten kypasense cabalxix, tu'n tok kynab'le ex tu'n kytene minti' kypaltile, ex minti' jun atx taj kyeye.

⁵Qa at jun kyxole atx taj tnab'l, qaninx tnab'l te Dios, ex ktzajel tq'o'n Dios tnab'l; porke ate Dios nimxix in tzaj tq'o'n kye kykyaqil ex minti' in ilin.

⁶Pero qe'xix tk'u'j xjal ti'j Dios ok t-xi tqanin, ex mi'n jawje' tk'u'j; porke aju xjal minti' in qe' tk'u'j ti'j Dios, ik tten ik tza'n twitz mar in yukch tu'n kyq'iq' ex in xtulq'in.

⁷Qa at jun xjal minti' in qe' tk'u'j ti'j Dios, tz'elx tnik' ti'j, minti' jun ti'xti ktzajel q'o'n te tu'n Qajaw.

⁸Jun xjal kab'e tk'u'j mya segur ta' tuj tkyaqil tb'e.

⁹Aju erman tal yaj, tzalajx tu'nju kjawil nimsa'n tu'n Dios;

¹⁰ex aju q'inun, tzalajx ti'j tu'n tok te ch'in; porke knajel te q'inun ik tza'n t-xmakal k'ul.

¹¹Porke ok tja'wil q'ij tuk'ix nim tkyaqal, b'i'x in tzqij k'ul ex nne'l tz'aq t-xmakal, aju ke'yin tb'anilxix, knajel. Ikxtzun te q'inunju, kukx tok tilil tu'n ti'j tnegosyo, ex ok knajel.

¹²At tzalajb'il teju xjal qa ma tzik'x tu'n ok tok tuj joyb'il ti'j; porke qa ma tzik'x tu'n, ok tk'ma' jun oyaj tu'n tten tchwinqlal, aju tzaj tma'n Dios tu'n ttzaj tq'o'n kye qeju in che k'ujlan te.

¹³Qa at jun xjal ma tz'ok tuj joyb'il ti'j tu'n tb'inchante aju mya b'a'n, mi'n tma qa tu'n Dios ma tz'ok tuj joyb'il ti'j; porke mlay b'ant tu'n tok Dios tuj joyb'il ti'j tu'n tb'inchante aju mya b'a'n, ex mi jun nno'k tuj joyb'il ti'j tu'n Dios.

¹⁴Ex teyle junjun nno'k tuj joyb'il ti'j, ax tnab'l in xmoxin te tu'n tpon tk'u'j ti'j ju mya b'a'n, ax tnab'l in sb'unte te.

¹⁵Nej in pon tk'u'j ti'j ju mya b'a'n; oktzun tch'iy ju mya b'a'n tuj tanmi, in tb'incha'n il, oktzun tch'iy il, in tzajtzun kamik tu'n il.

¹⁶Aqeye erman at nk'u'je kyi'je, mi'n che tzpete ti'j jlu.

¹⁷Tkyaqil oyaj b'a'n ex tkyaqil oyaj tb'anilxix, atzun in ku'tz tuj kya'j, atzun in tzaj tuk'il Dios aju b'inchal kye spik'un ate' twitz kya'j. Minti' in tch'expu'n Dios tnab'l, ex mya ik tten Dios ik tza'n jun xlekun in b'et.

¹⁸Tu'nxju tajb'il ma qo ok te tk'wa'l noq tu'n tyol axix tok, tu'ntzun qok tnejel okslal kyxol qe tch'isb'en, ik tza'n tnejel twitz awal.

¹⁹Kyja'tzun erman aqeye at nk'u'je kyi'je, kykyaqile b'a'n tu'n t-xi kyb'i'n naje ju yol, pero mya jurat naj tu'n kyyoline, ex mya jurat naj tu'n kyjaw kyaqpaje.

²⁰Porke aju xjal jurat in jaw q'ojl, minti' in tb'incha'n aju tz'aqlxix tuj twitz Dios.

²¹Kyja'tzun, kyq'onkje tkyaqil ttz'ilil tuk'ix ju mya b'a'n ma chmet-xix, ex che oke mans, tu'n kyk'monteye ju yol ma ku'x awa'n tuj kyanmiye; porke at tipumal ju yol lu tu'n tklet kyanmiye.

²²Kynimanxe ju yol, ex mya noq o'kx tu'n kyb'inteye, porke qa o'kx in xi kyb'i'ne ex minti' in japun kyu'ne, in kysb'un kyib'e.

²³Qa at jun o'kx in xi tb'i'n ju yol ex minti' in japun tu'n, ik tten ik tza'n jun xjal nno'kx tke'yin twitz tuj jun respej.

²⁴Porke ok tb'aj tke'yin twitz in xi'tzun, ex b'i'x nnik' tna'l tu'n tza'n ke'yin.

²⁵Atzun teju in ku'x tke'yinxix tuj ley tz'aqlxix, aju ley at tzoqpib'l tu'n, ex kukx in ku'x tke'yin, ex minti' nnik' tna'l tu'n aju in tb'i'n, noq o'kx in japun tu'n, atzunte jlu at tzalajb'il te ti'j ju in tb'incha'n.

²⁶Qa at jun kyxole tuj tnab'l qa in niman Dios, pero qa minti' in ajtz tjak'u'n ti'j ttzi', in kub' t-sb'un tib', ex aju tokslab'l noqx gan.

²⁷Aju ajb'eb'l twitz Qman Dios saqxix ex minti' tpaltil, atzun jlu: tu'n qonin kyi'j k'wa'l minti' kyman ex kyi'j meb'a xu'j tuj yajb'il kye, ex tu'n tok qkwentin qib' tu'n mi'n qtz'ilix kyxol xjal.