Read kumam Santiago 3 Bible Online

Santiago 3 - kumam bible

Santiago 3

¹Erman, mi'n tz'ok kyq'o'ne nimku xnaq'tzal kyxole, porke b'a'n qu'n, qa xnaq'tzal qo', mas qo okel tuj xjel kywitz txqantl.

²Porke qkyaqil nimku maj in qo tzpet ti'j; qatzun at jun minti' in tzpet ti'j tyol, atzun xjalju tz'aqlxix ex in b'ant tjak'unte tkyaqil t-ximlal.

³Nno'kx qq'o'n pren tuj kytzi' chej tu'n qnimanjtz kyu'n, kyja'tzun tten in ajtz qxqutz'in tkyaqil kyximlal.

⁴Ax ikx che ximane kyi'j qe barc; maske nimaq qe ex in che b'et tu'n kyq'iq' kyuwxix, pero in che ajtz xqutz'in tu'n jun xqutz'b'il tal ch'in noq ja'x jatum tajb'il ju yukul te barc tu'n t-xi'.

⁵Ikxtzun tten qtzi'; maske tal ch'in, pero puro jawni ex in jaw tniman tib'. Ch'in q'aq' in b'aj tz'e'y ti'j jun witz tu'n.

⁶Ikxtzun tten qtzi' ik tza'n q'aq', ex nojni tu'n tkyaqil mya b'a'n; tu'n qtzi' in naj tkyaqil qximlal, ex tu'n qtzi' mas in jaw k'ant ju mya b'a'n tuj qchwinqlal, ex atzun in tzaj tq'aq'al qtzi' tuj infierni.

⁷Porke kykyaqil txkaj jil ex qe chyu'j ex qe lob'aj ex qe jil tuj mar in kub' kyi'j ex in che ok mans kyu'n xjal;

⁸atzunju qtzi' mlayx tz'ok mans tu'n jun xjal, porke mya b'a'n ex mlay b'ant tu'n tmaqet ttzi xjal, ex at tb'iyb'il.

⁹Tu'n qtzi' in xi qq'o'n chjonte te Qman Dios, ex tu'n qtzi' in xi qqanin mya b'a'n kyib'aj xjal o che b'inchanjtz ik tza'n tilb'ilal Dios.

¹⁰Tujx qtzi' nne'tz ju yol te aq'b'il chjonte te Dios ex tu'nx qtzi' in tzaj qqanin mya b'a'n tib'aj jun xjal. Erman, mya tuj tumel jlu.

¹¹Baqa at jun twi a' junx in jatz a' b'a'n tk'anjtz tuj ex ju a' k'a.

¹²Aqeye wermaniye, ¿jakupe b'ant tu'n tel twitz olivo ti'j jun tze' higo, ex jakupe tz'el twitz higo ti'j jun wi' uva? Kyja'tzun tten, mlay jatz ju a' b'a'n tk'anjtz ex ju a' k'a tuj junx twi a'.

¹³Qa at jun kyxole at tnab'l ex nne'l tnik' ti'j, b'et-x tuj tumel tu'n tyek'unte taq'unb'en b'a'n, tu'n tten mans ex at tnab'l.

¹⁴Ex qa at tlo'ch kyk'u'je ti'j juntl ex qa in b'aj kyik'len kyib'e, mi'n jaw kyniman kyib'e, ex mi'n che nik'ane yol ex mi'n kub' kyewane ju yol ax tok.

¹⁵Aju nab'l lu myatzun in tzaj tuk'il Dios, atzun in tzaj kyuk'il xjal ex tuk'il tajaw il; aju nab'l lu te twitz tx'otx' te.

¹⁶Porke qa ma tzaj tlo'ch kyk'u'je ti'j juntl ex qa in b'aj kyik'len kyib'e, tu'ntzunju mya tuj tumel ate'ye, ex in kyb'incha'ne tkyaqil mya b'a'n.

¹⁷Qatzun a tnab'l xjal at aju in tzaj tq'o'n Dios, tnejelxix saq ta' tanmi xjal, ex minti' in q'ojin, ex mejor tmod, ex kuyin tu'n tu'n t-xi tb'i'n; at tq'aq'b'il tk'u'j ex b'a'n tb'inchb'en, minti' in jawje' tk'u'j, ex mya xmletz'.

¹⁸Aju xjal nno'k tilil tu'n tu'n tb'ant kyten xjal kyxolx ex tu'n kytzalaj kyxolx, in tq'o'n amb'il tu'n kyanq'in xjal tuj tumelxix.