Read kumam Santiago 4 Bible Online

Santiago 4 - kumam bible

Santiago 4

¹¿Tiqu'n at q'oj kyxole ex in che q'ojle? ¿Myapetzun tu'n tlaj ju kyachb'ile? Axju kyachb'ile in q'ojin kyi'je.

²In pon kyk'u'je ti'j nimku ex minti' in knet kyu'ne; kyja'tzun in kub' kyb'yo'ne jun xjal. Nim in pon kyk'u'je ti'j te juntl, ex minti' in knet kyu'ne; kyja'tzun nno'k tilil kyu'ne tu'n tkub' ti'j juntl ex in che q'ojine ti'j. Minti' in knet kyu'ne aju kyajb'ile, porke minti' in xi kyqanine te Dios.

³Ex qa ma txi kyqanine, mlay tzaj q'o'n kyeye, porke mya tuj tumel in xi kyqanine; ex atzun kyajb'ile tu'n tb'aj kynajsa'ne ti'j kyachb'ile.

⁴Aqeye ik kytene ik tza'n jun xu'j at tchmil pero mas at tgan ti'j juntl. ¿Minti'pe b'a'n kyu'ne, qa ma kyk'ujlaye aju achb'il twitz tx'otx' che okele aj q'oj ti'j Dios? Kyja'tzun, alkye jun xjal taj tu'n tk'ujlante ju achb'il twitz tx'otx', nno'k tq'on tib' aj q'oj ti'j Dios.

⁵Aju in tma'n tuj Tu'jil, ¿noqx ganpe tuj kynab'le? Aju Xewb'aj Xjan ma tzaj tq'o'n Dios tu'n tnajan tuj qanmi at-xix tk'u'j qi'j ex in b'isun qi'j, chi Dios tuj Tu'jil.

⁶Pero mas nim t-xtalb'il Dios in tzaj tq'o'n qe. Kyja'tzun in tma'n tuj Tu'jil: At tq'oj Dios kyi'j qe xjal jawni kywitz, atzun qeju mans qe, in tzaj tq'o'n Dios t-xtalb'il kye.

⁷Kyq'o'nxtzun kyib'e tjaq' tkawb'il Dios. Che we'xixe twitz tajaw il, ex k'eleltzun oq kywitze.

⁸Che laq'exe ttxlaj Dios, ax ikx te ktzajel laq'e' kyuk'ile. Aqeye aj il, kytx'jom kyq'ab'e; ex aqeye kab'e kyk'u'j, kytx'jome tuj kyanmiye.

⁹Che b'isune, ex che wu'yine, ex che oq'e. Aju kytzeb'le tz'okwit te oq'el, ex aju kytzalajb'ile tz'okwit te b'is.

¹⁰Kymansinku kyib'e twitz Qajaw, oktzun che jawil nimsa'ne tu'n.

¹¹Erman, mi'n che yoline mya b'a'n ti'j juntl kyxole. Qa at jun in yolin mya b'a'n ti'j jun erman, ex qa nno'k terman tu'n tuj malb'il, ti'j ley in yolin mya b'a'n ex nno'k ju ley tuj malb'il tu'n. Qatzun ma tz'ok ley tuj malb'il tu'na, minti' in japun ley tu'na ikju, noq o'kx nno'k tq'on tib'a te jwes.

¹²Noq o'kx junx q'olte ley ex Jwes, ate Dios, aju at tipumal tu'n kyklet xjal tu'n ex at tipumal tu'n kynaj xjal tu'n. Atzun teya, ¿alkyetzuna tu'n tok juntl tuj malb'il tu'na?

¹³Ja'lotzun, kyb'intze aqeye in che q'mante: Ja'lo ex qa nchi'j qo xe'l tuj tnam lu, ex atzun qo tel jun ab'q'i, ex kb'el qq'o'n qk'a'ẍ tu'n tchmet qpwaq, che chiye.

¹⁴Pero minti' b'a'n kyu'ne aju tzul te nchi'j. Porke ¿tza'n tten kychwinqlale? Ik tten kychwinqlale ik tza'n ch'in muj noq ch'in in ten, ex jurat in kub' naj.

¹⁵Mas b'a'n tu'n kymanteye kyja': Qa tajb'il Qajaw, ok qo anq'il ex ok qb'incha' jlu ex qa juntl.

¹⁶Atzun kyeye in jaw kyniman kyib'e. Ex mya b'a'n in kyb'incha'ne tu'nju in jaw kyniman kyib'e.

¹⁷Alkye jun xjal b'a'n tu'n alkye ju b'a'n ex minti' in tb'incha'n, at til.