Read kumam Santiago 5 Bible Online

Santiago 5 - kumam bible

Santiago 5

¹Kyb'intze jlu aqeye q'inun. Che oq'e ex che wu'yine tu'n tlaj ju kyb'ise tzul.

²Aju kyq'inumab'le ma q'ay, ex aju kyxb'alune tb'anilxix ma b'aj twa'n pok'.

³Aju q'an pwaq tuk'ix saq pwaq at kyuk'ile ma akomix ti'j, ex aju akom k'okel te testiw kyi'je qa mya b'a'n qeye, ex kb'ajel twa'n akom kychib'jale ik tza'n tu'n q'aq'. Ma b'aj kychmo'ne kyq'inumab'le tuj mankb'il q'ij, ex atzun mankb'il tq'ijlalil ja'lo.

⁴Aqeju majen jaw chmonte twitz kyawale in che sch'in tu'n tlaj e kub' kysb'u'ne, minti' chjet twi kyk'u'j kyu'ne; ex ju tq'ajq'ajel kywi' qeju jaw chmonte twitz kyawale ma kanun tuj t-ẍkyin Qajaw, aju Tajaw tkyaqil.

⁵Ma che anq'ine tuj achb'il twitz tx'otx' ex ma che achine; ma kyk'a'cha kyk'u'je ik tza'n qe alumaj in che k'a'chanjtz tu'n kykub' b'yo'n, ikx kyeye ch'ix tul kanun q'ij tu'n kykub' b'yo'ne.

⁶Qe xjal minti' kypaltil, kub' kyq'o'ne kysentens ex kub' kyb'yo'ne, ex minti' e q'ajt kywitze.

⁷Kyja'tzun erman ten kypasense, che ayone okxi tul Qajaw. Kyximankuye ti'j ju aq'nal in ayon ti'j ju twitz awal tb'anilxix, at tpasens tu'n tayon alkye q'ij tu'n tul kanun ttzi jb'alil ax ikx alkye q'ij tu'n tjaw jb'al.

⁸Ax ikx kyeye ten kypasense ex kykyuwsam kyanmiye, porke in laq'ex ttzaj tq'ijlalil tu'n tul Qajaw.

⁹Erman, mi'n che yoline mya b'a'n ti'j juntl kyxolxe, tu'n mi'n kyoke tuj xjel; porke Dios aju Jwes, lu at ttzi ja,.

¹⁰Aqeye wermaniye, kyna'ntze kyi'j qe t-sanjel Dios e yolin ojtxi, porke sama'n qe tu'n Qman; kyna'ntze nik'pun ik'x kyu'n, ex o ten kypasens.

¹¹In qma'n, at tzalajb'il kye qeju nnik'x kyu'n. O kyb'iye ti'j Job, o ten nim tpasens, ex o kyb'iye aju tb'incha Qman te te mankb'ilxi; porke ate Qman nim in q'aq'an tk'u'j ex in tz'e'y tk'u'j qi'j.

¹²Pero aju mas ilxix ti'j erman, mi'n tzaj kyna'ne tb'i Dios ti'j jun kyyole, mi'n tzaj kyna'ne kya'j, ex mi'n tzaj kyna'ne tx'otx', ex mi'n tzaj kyna'ne juntl; noq o'kx tu'n kymanteye ok, ex ax tok ok; ex qa tu'n kymanteye mi'n, ex ax tok mi'n, tu'ntzun mi'n kykyaje tjaq' sentens tu'n Dios.

¹³Qa at jun in b'isun kyxole, b'a'n tu'n tna'n Dios. Ex qa at jun in tzalaj, b'a'n tu'n tb'itzan.

¹⁴Qa at jun yab' kyxole, b'a'n tu'n kytzaj txket qe anciano kyxol okslal, ex tu'n kyna'n Dios ti'j yab' ex tu'n tok kyq'o'n aseyt ti'j, tu'nju at kyoklen tu'n Qajaw.

¹⁵Qa q'uqlxix kyk'u'je ti'j Dios ok kyna'ne Dios, kb'anixel ju yab' ex kjawil wab'an tu'n Qajaw; ex qa at il otoq tb'incha, knajsetel til.

¹⁶Kyja'tzun, kypa'n jatz kyile kyxolxe, ex che na'ne Dios kyi'je kyxolxe tu'ntzun kyb'anixe. Aju tna'j Dios ju xjal tz'aqlxix at nim tipumal ex nim in tb'incha'n.

¹⁷Ate Elías t-sanjel Dios, ik ttzajlen ik tza'n qe; ex o na'n Dios kyuwxix tu'n mi'n ttzaj jb'al, ex minti' tzaj jb'al twitz tx'otx' tuj ox ab'q'i tuk'il qaq xjaw.

¹⁸Ex juntl maj o na'n Dios, ex tzajtzun jb'al twitz kya'j, ex tzajtzun twitz tawal tx'otx'.

¹⁹Erman, qa at jun kyxole ma tz'el txalpuj ti'j ju yol ax tok, ex qa ma tz'ajtz meltz'aj tu'n juntl erman,

²⁰tz'elx kynik'e ti'j jlu, qa at jun erman ma tz'ajtz meltz'aj jun aj il tu'n, tu'n tkyaj tq'o'n ju tb'e mya b'a'n, ok kletel tanmi xjal tu'n tu'n mi'n tkyim, ex tkyaqil til xjal knajsetel.