Read kumam 1 Pedro 2 Bible Online

1 Pedro 2 - kumam bible

1 Pedro 2

¹Kyq'onkjtzune tkyaqil mya b'a'n ex tkyaqil sb'ub'l; mi'n che oke te xmletz', mi'n tzaj tlo'ch kyk'u'je, mi'n che si'mine yol kyi'j xjal.

²Che okxe ik tza'n qe tal ne' k'itzqe che itz'j in tzaj el kyk'u'j ti'j kych'u'; ikxwittzun kyeye tzajwit el kyk'u'je ti'j tyol Dios mya smo'n twitz, tu'n tajb'en te kyanmiye tu'ntzun kych'iye ex tu'n kyklete.

³Porke ma tz'el kynik'e ti'j qa tb'anilxix Qajaw.

⁴Che laq'etze tuk'il Qajaw, porke ate Qajaw jun ab'j itz' ex q'ol chwinqlal. Ax tok el ik'un kyu'n xjal, atzun tuj twitz Dios sk'o'maj ex wi'yilxix.

⁵Ax ikx kyeye ma che oke ik tza'n ab'j itz'; kyja'tzun, kymojb'an kyib'e tuk'il Crist tu'n kyjaw b'incha'ne tu'n kyoke te jun tja Dios minti' q'ancha'l, ex tu'n kyoke te pal o'kx tu'n kyajb'ene te Dios, tu'ntzun t-xi kyq'o'ne oyaj te Dios noq tu'n Jesucrist. Aju oyaj lu minti' q'ancha'l ex in xi tk'mo'n Dios.

⁶Ex atzun jlu in tma'n tuj Tu'jil: Lu kb'el nq'o'ne jun ab'j tuj tnam Sión, aju ab'j ma'xix te skyini, sk'o'maj ex wi'yilxix; alkye ma tz'okslan ti'j mlay tzaj tch'ixwi, chi tuj Tu'jil.

⁷Aju ab'j lu wi'yilxix te kyeye, aqeye ma che okslane; atzun kye qeju minti' in che okslan, mya wi'yilxix, porke in tma'n tuj Tu'jil: Aju ab'j el kyik'un qe b'inchal ja, ma tz'ok te skyini te simyent, chi tuj Tu'jil.

⁸Ax ikx in tma'n: Ma tz'ok te jun ab'j tu'n kyjaw tolj xjal ti'j, ex ma tz'ok te jun ab'j tu'n kyjaw tz'aq xjal ti'j, chi tuj Tu'jil. In che jaw tolj ti'j ju yol tu'nju minti' in xi kyniman; porke kyajnix b'ant jlu tu'n Dios ojtxi.

⁹Aqeye junx kyiyjile, sk'o'maj qeye, ex ma che oke te rey ex pal, ma che oke te jun tnam o'kx te Dios tu'n kyajb'ene, ma che oke te jun tnam tekuxix Dios tu'ntzun t-xi kychik'b'a'ne tb'inchb'en Dios nim tipumal; ate Dios txkon kyeye tu'n kyetze tuj qlolj ex tu'n kytene tuj t-spik'umal tb'anilxix.

¹⁰Ojtxi mya jun tnam qeye, atzun ja'lo ma che oke te jun tnam te Dios; ojtxi minti' tzaj q'aq'an tk'u'j Dios kyi'je, atzun ja'lo ma tzaj q'aq'an tk'u'j kyi'je.

¹¹Aqeye erman at nk'u'je kyi'je, chin kub'sale kywitze porke ik tza'n stranjer xjal qeye ex ik tza'n b'etin xjal qeye tzalu twitz tx'otx', mi'n txi kynimane aju tajb'il kychib'jale, ex atzun jlu in q'ojin ti'j kyanmiye.

¹²Che anq'ine b'a'n kyxol txqantl xjal minti' ojtzqi'n Dios kyu'n, tu'ntzun mi'n kyyolintl kyi'je qa mya b'a'n qeye, noq o'kx tu'n kyke'yinte kyaq'unb'ene b'a'n ex tu'n tjaw kynimsa'n tb'i Dios ok ttzaj tq'o'n Dios t-xtalb'il kye.

¹³Kynimanxe tkyaqil kawb'il tkub' kyxol xjal, tu'nju okslal qeye ti'j Qajaw; kynimanxe presidente, porke atzun in kawin kyib'aj kykyaqil;

¹⁴ax ikx kynimanxe qe gobernador, porke in che tzaj sama'n tu'n presidente tu'n tkub' kyq'o'n kycastiw qe xjal b'inchal mya b'a'n, ax ikx tu'n kyyolin b'a'n kyi'j qe xjal b'a'n kyb'inchb'en.

¹⁵Porke atzun tajb'il Dios jlu, tu'n kyb'inchanteye aju b'a'n, kyja'tzun tu'n tmaqet kytzi' qe xjal minti' ch'in b'a'n kyu'n ex minti' kynab'l.

¹⁶Tzoqpi'n qeye, ex mya tu'nju tzoqpi'n qeye tu'n kyb'inchanteye aju mya b'a'n, noq o'kx tu'n kyoke te tmajen Dios.

¹⁷Che nimane kye kykyaqil. Kyk'ujlame qe erman. Che xob'e twitz Dios. Che nimane te presidente.

¹⁸Aqeye majen, atwit tchi kypatrone tuj kywitze tu'ntzun kytene tjaq' kykawb'il; mya noq o'kx tu'n t-xi kynimane qe patrón b'a'n qe ex b'a'n kymod, ax ikx tu'n t-xi kynimane qe patrón mya b'a'n kymod.

¹⁹Porke b'a'n jlu tuj twitz Dios, qa at jun erman in yajlanjtz noqx gan ex nnik'x tu'n tu'n tlaj taj tu'n tniman te Dios.

²⁰Qa ma che ok b'ju'ne tu'n tlaj il otoq kyb'inchaye, ¿atpelo nimb'il kyeye qa ma tzik'x kyu'ne? Pero qa ma che yajlanjtze tu'n tlaj ju b'a'n in kyb'incha'ne, ex qa ma tz'ikx kyu'ne, atzun jlu b'a'n nne'la tuj twitz Dios.

²¹Porke ma che txkonjtze tu'n Dios tu'n tik'x kyu'ne; porke ikx te Crist ik'x tu'n tu'n kylaje, kyaj tyek'un kyeye tu'n kyok lpe'ye ti'j.

²²Minti' jun il o tb'incha Crist, ex minti' o tma jun yol te sb'ub'l.

²³Tej tok yaso'n Crist kyu'n xjal, minti' aj tmojtza'n yasb'il. Tej tyajlanjtz kyu'n, minti' xi tma'n yol te xob'tzab'l kye, noq o'kx xi tq'on tib' tuj tkwent Dios aju b'inchalte ti'j xtis tuj tumelxix.

²⁴Ax Jesucrist xi iqante qil tej tjaw q'o'n t-ximlal twitz crus, tu'ntzun qok ik tza'n kyimni tu'n mi'n qb'inchan il, ex tu'n qanq'in tu'n qb'inchante aju tz'aqlxix. Tu'n tk'ixb'len Crist ma che b'anixe.

²⁵Porke nej ik kytene ik tza'n qe ẍne'l tzpetni qe; atzun ja'lo ma che ul meltz'aje tuk'il Crist aju Pastoril kyeye ex Kwentil kyanmiye.