Read kumam 1 Pedro 5 Bible Online

1 Pedro 5 - kumam bible

1 Pedro 5

¹Chin kub'sale kywitz qe anciano ate' kyxole, ax ikx weye anciano qine kyuk'il ex testiw qine ti'j tkyaqilju ik'x tu'n Crist, ax ikx at woklene tu'n njaw nimsa'ne junx tuk'il Crist ok tul tuj tajwalil.

²Aqeye anciano, kypastorin oke qe t-ẍne'l Dios o che kyaj q'o'n tuj kykwente, ex kykwentin oke qe; pero mya lajwers tu'n kyxi'ye, kyu'nx kyib'e tu'n kyxi'ye ik tza'n tajb'il Dios, ex mya tu'n kyk'monteye jun kamb'ab'l mya tuj tumel, noq o'kx tu'n kyajb'ene tu'n tkyaqil kyk'u'je.

³Ex mi'n kub' kyximane tu'n kyoke te kyajaw qeju ate' tuj kykwente, noq o'kx tu'n kyoke te jun yek'b'il tu'n kyok lpe' ẍne'l kyi'je.

⁴Oktzun tul ju Nejenel kye pastor, ok kyk'ma'ye jun oyaj mlay naj ex tb'anilxix.

⁵Ax ikx kyeye, aqeye ku'xun, che tene tjaq' kykawb'il anciano; ex kykyaqile che oke mans tu'n kyajb'ene kyxolxe, porke in tma'n tuj Tu'jil: At tq'oj Dios kyi'j qeju in jaw kyniman kyib', atzun qeju mans in tzaj tq'o'n t-xtalb'il kye, chi tuj Tu'jil.

⁶Kyja'tzun, kymansin kub' kyib'e tjaq' tipumal tq'ab' Dios, tu'ntzun kyjaw nimsa'ne tu'n ok tpon tq'ijlalil.

⁷Tkyaqilju in b'aj kyk'u'je ti'j, kyq'onxe tuj tkwent Dios, porke ate Dios kwentil kyeye.

⁸Tenx kynab'le ex che xq'uqine porke ate tajaw il aj q'oj kyi'je, ex in b'et kyi'jele, in tzanun ik tza'n jun b'alun, in jyon ti'j alkye jun tu'n t-xi tchyo'n.

⁹Che we'xixe twitz, kyuw kytene tuj kyokslab'le, porke b'a'n kyu'ne, tuj tkyaqil twitz tx'otx' nnik'x kyu'n kyermaniye ik tza'n kyeye nnik'x kyu'ne.

¹⁰Kyb'ajlenxitzun yajla'ne kab' q'ij, axte Dios ktz'aqsalte kynab'le, ex tu'n kywe'xixe tuj kyokslab'le, ex kq'olte kyipumale, ex kkyuwsal kyeye. Axte Dios in tzaj q'onte nim t-xtalb'il qe, ex ma qo txkonjtz tu'n, tu'n qten tuj t-spik'umal te jumajx noq tu'n Jesucrist.

¹¹Nimanxwit ju tb'i, ex tu'n tkawin tuj tkyaqil tab'q'iyil te jumajx. Ikxwitju.

¹²Ma txi ntz'ib'ane kab' ox yol kyeye; ate Silvano kxel q'inte u'j, porke aju erman lu ma tz'el nnik'e ti'j in japunxix tu'n tuj taq'un Dios. Ma txi ntz'ib'ane tu'n t-xi nq'o'ne kynab'le ex tu'n t-xi nchik'b'ane kyeye qa atzun t-xtalb'il Dios jlu axix tok. Ax che tenkje tuj t-xtalb'il.

¹³In che'x q'olb'e'ne kyu'n okslal ate' tuj Babilonia, aqeju ma che jaw sk'o'n junx kyuk'ile, ex in che'x q'olb'e'ne tu'n Marcos aju ik tten ik tza'n jun nk'wa'le.

¹⁴Kyq'olb'em kyib'e kyxolxe, ex kytz'ub'an el kywitze tu'n tkyaqil kyk'ujlalile. Awt Dios q'uqb'ante kyk'u'je kykyaqile aqeye okslal ti'j Jesucrist. Ikxwitju.