Read kumam 2 Pedro 3 Bible Online

2 Pedro 3 - kumam bible

2 Pedro 3

¹Aqeye erman at nk'u'je kyi'je, atzun tkab'in u'j jlu in xi ntz'ib'ane kyeye; tuj kykab'il u'j ma txi nq'o'ne kynab'le ex ma jaw nk'asune kynab'le tu'n kyximane tuj tumelxix,

²tu'ntzun ttzaj kyna'ne aju yol o q'manjtz ojtxi kyu'n qe t-sanjel Dios xjan, ex tu'n ttzaj kyna'ne tmandamyent Qajaw ex Klolqe, aju xi kypakb'a'n qe apostol e ten kyuk'ile.

³Tnejel tz'elx kynik'e ti'j jlu: Tuj mankb'il tq'ijlalil che ul qe xmayil in kyb'incha'n aju kyex kyajb'il,

⁴ex in kyma'n: ¿Jatumtzun ta' tu'n tul Crist ik tza'n tzaj tma'n? Porke atxix tej kykyim qe qxe'chel, ttenx tkyaqil ik tza'n t-xe tnejel tej tb'ant twitz tx'otx', che chi.

⁵Kyu'nx mi'n kyaj tu'n tel kynik' ti'j jlu: Ojtxi o b'inchanjtz kya'j tuk'ix tx'otx' tu'n tyol Dios, atzun jatz jlet tx'otx' tuj a' ex axtzun tkub' tx'otx' tib'aj a',

⁶kyja'tzun kykyaqil qeju ate' twitz tx'otx' ojtxi e kyaj mulq'aj tjaq' a' ex e naj.

⁷Atzun te kya'j tuk'ix tx'otx' aqeju ate' ja'lo, tzyu'n qe tu'nx tyol Dios, k'u'n qe tu'n kyb'aj tz'e'y tu'n q'aq' tuj tq'ijlalil jwisi ex tuj tq'ijlalil ok kynaj qe xjal mya nimal Dios qe.

⁸Ex aqeye erman, at nk'u'je kyi'je, tz'elx kynik'e ti'j jlu: Tuj twitz Qajaw jun q'ij junx ta' ik tza'n jun mil ab'q'i, ex jun mil ab'q'i junx ta' ik tza'n jun q'ij.

⁹Ate Qajaw mlay tzik'x ti'j tyol aju tziyimaj tu'n ik tza'n in kyma'n junjun: Ma tzik'x ti'j tyol, che chitzun. Mya ma tzik'x ti'j tu'n, noq o'kx tu'nju at tpasens qi'j, porke mi'n tajb'il Qajaw tu'n tnaj jun xjal, noq o'kx tajb'il tu'n tajtz ti'j kyanmi kykyaqil.

¹⁰Aju tq'ijlalil Qajaw minab'en tzul, ik tten ik tza'n jun eleq' nnu'l qonik'an; tujtzun tq'ijlalil lu knajel kya'j tuk'il jun tq'ajq'ajel in julin wen, ex tkyaqilju at kb'el ulj tu'n q'aq', ex ju tx'otx' tuk'ix kyb'inchb'en xjal at twitz kb'ajel tz'e'y tu'n q'aq'.

¹¹Qatzun il ti'j tu'n tkub' ulj tkyaqil jlu, ¿yajtzun kyeye, myapelo il ti'j tu'n kyanq'ine b'a'n, ex tu'n tel kypa'n kyib'e ti'j tkyaqil mya b'a'n, ex tu'n kynimane te Dios?

¹²Tz'ok tililx kyu'ne tu'n tb'ant kytene ex tu'n kyayone ti'j tq'ijlalil ok tul Dios; ex ok tpon tq'ijlalil ok tul Dios, k'okel tq'aq'al kya'j, kb'el ulj, ex tkyaqilju at kb'el ulj tu'n q'aq'.

¹³Atzun qe in qo ayon ti'j ak'aj kya'j ex ak'aj tx'otx' jatum kb'inchetel aju tz'aqlxix kyu'n kykyaqil, ik tza'n tzaj ttziyan Dios qe.

¹⁴Kyja'tzun erman, aqeye at nk'u'je kyi'je, che ayone ti'j tkyaqil jlu, tz'ok tililx kyu'ne tu'n kytene minti' ch'in tz'il kyi'je ok tul Qajaw, ex minti' kypaltile, ex tu'n tten kymojb'ab'l kyib'e.

¹⁵Tz'elx kynik'e ti'j jlu: Tu'nju at nim tpasens Qajaw at kolb'il qe, ik tza'n tyol qerman Pablo aju at-xix qk'u'j ti'j xi ttz'ib'an kyeye, ik tza'nx ju tnab'l tzaj tq'o'n Dios te.

¹⁶Tuj tkyaqil tu'j Pablo in yolin ti'j tkyaqil jlu; at junjun yol tuj tu'j kyuw tu'n tel qnik' ti'j; qe xjal mya xnaq'tzamni qe ex mya kyuw kyten in b'aj kymeltz'un ju yol lu, ex in b'aj kymeltz'u'n txqantl yol tz'ib'an tuj Tu'jil, kyja'tzun kyu'nx che najel.

¹⁷Kyja'tzun erman, aqeye at nk'u'je kyi'je, b'i'maj jlu kyu'ne, kykwentin ok kyib'e tu'n mi'n kyxi lach'o'ne kyu'n xjal mya b'a'n qe ex ma che el tzpet ti'j ju yol axix tok; kykwentin ok kyib'e tu'n kykyaj tene wa'lxix tu'n mi'n kykub' tz'aqe.

¹⁸Ex che ch'iyxe tuj t-xtalb'il Qajaw ex Klol qe Jesucrist ex tz'elx kynik'e ti'j. Nimanxwit ju tb'i ja'lo ex te jumajx. Ikxwitju.