Read kumam 1 Juan 1 Bible Online

1 Juan 1 - kumam bible

1 Juan 1

¹In xi ntz'ib'ane kyeye ti'j ju Yol te chwinqlal, aju at atxix t-xe tnejel, aju o qb'iye ex o qile, aju o tz'ok qke'yine tu'n tb'aq' qwitze ex o tz'ok qmako'ne tu'n qq'ab'e.

²Porke o tzaj yek'un ju chwinqlal, ex o qile, ex in xi qma'ne ax tok ti'j; ex in xi qq'o'ne tqanil kyeye ti'j ju chwinqlal te jumajx, aju at tuk'il Dios Mamb'aj ex o tzaj yek'un qeye,

³Aju ma qile ex ma qb'iye, axtzunju in xi qpakb'a'ne kyeye tu'ntzun tten qmojb'ab'l qib'; ex aju qmojb'ab'l qib', tuk'il Qman Dios ex tuk'il Jesucrist aju Tk'wa'l.

⁴In xi ntz'ib'ane tkyaqil jlu kyeye tu'ntzun kytzalaje nimxix.

⁵Atzunju yol lu o qb'iye te Jesucrist ex in xi qpakb'a'ne kyeye: ate Dios spik'un ex minti' ch'in qlolj at tuk'il.

⁶Qa in qma'n qa at qmojb'ab'l qib' tuk'il Dios ex qa kukx qb'et tuj qlolj, in qo nik'an yol ex minti' in qo ok lpe' ti'j ju yol axix tok.

⁷Ex qa in qo b'et tuj spik'un ik tza'n te Dios at tuj spik'un, at qmojb'ab'l qib' qxolx, ex aju tchk'el Jesucrist aju Tk'wa'l Dios nne'l ttx'jo'n tkyaqilju qil.

⁸Qa in qma'n qa minti' qil, in qsb'un qib' qu'nx qib', ex ju yol axix tok minti' tuj qanmi.

⁹Ex qa ma jatz qpa'n qil twitz Dios, knajsetel qil tu'n ex k'elel ttx'jo'n tkyaqil mya b'a'n tuj qanmi, porke ate Dios tz'aqlxix ex b'a'n tu'n tqe' qk'u'j ti'j.

¹⁰Qa ma qma b'ajx qo b'inchan il, nno'k qq'o'n Dios nik'al yol, ex aju tyol minti' tuj qanmi.