Read kumam 1 Juan 4 Bible Online

1 Juan 4 - kumam bible

1 Juan 4

¹Aqeye erman at nk'u'je kyi'je, mi'n txi kyoksla'ne kyyol kykyaqil pakb'al yol in kyma'n qa tu'n Dios sama'n qe, noq o'kx kyq'o'nke kwent kyi'j, tu'ntzun tel kynik'e kyi'j qa te Dios qe ex qa mi'n. Ex nimku pakb'al nik'al yol in che b'et kyxol xjal, in kyma'n qa tu'n Dios sama'n qe.

²Pero k'eleltzun kynik'e ti'j qa ax tok tu'n T-xew Dios in che yolin; porke kykyaqil pakb'al yol, qa in kychik'b'a'n qa ax tok xjal te Jesucrist tej tul tzalu twitz tx'otx', tetzun Dios xjal lu.

³Pero kykyaqil pakb'al yol, qa in kyma'n, mya ax tok xjal te Jesucrist tej tul tzalu twitz tx'otx', myatzun te Dios xjal lu. Atzun in tzaja ju yol lu tuk'il ju aj q'oj ti'j Crist, aju o kyb'iye qa tzul; ex lu at kyxol xjal ja'lo.

⁴Aqeye tal nk'wa'le, te Dios qeye ex ma kub' kyi'j pakb'al nik'al yol kyu'ne; ex mas ma' toklen Dios aju at tuj kyanmiye twitz ju tajaw il at kyxol xjal.

⁵Kye xjal qe, kyja'tzun in che yolin ti'j ju kye xjal, ex in xi kyb'i'n xjal kyyol.

⁶Atzun qe te Dios qo'. Aju xjal ojtzqi'n Dios tu'n, in xi tb'i'n qyol; atzunju xjal mya te Dios, minti' in xi tb'i'n qyol. Kyja'tzun nne'l qnik' ti'j alkyeju in yolin ax tok ex alkyeju minti' in yolin ax tok.

⁷Aqeye erman at nk'u'je kyi'je, qk'ujlam qib' qxolx, porke aju qk'ujlalil te Dioste; ex kykyaqil qeju at kyk'ujlalil, tk'wa'l Dios qe ex ojtzqi'n Dios kyu'n.

⁸Alkye minti' tk'ujlalil, na'nx tel tnik' ti'j Dios, porke ate Dios at tk'ujlalil.

⁹Tu'n jlu ma tzaj tyek'un Dios tk'ujlalil qi'j; tu'nju tzaj t-sama'n Dios o'kxku jun Tk'wa'l, ul tzalu twitz tx'otx' tu'ntzun tten qchwinqlal noq tu'n.

¹⁰Tu'ntzun jlu nne'l qnik' ti'j ju tk'ujlalil: Mya aqeqo' ma qo k'ujlante Dios, noq o'kx ate Dios ma qo tk'ujla ex tzaj t-sama'n aju Tk'wa'l tu'n tok te chojb'il qil.

¹¹Aqeye erman at nk'u'je kyi'je, qa ik tten tk'ujlalil Dios qi'j, ax ikx qe qk'ujlam qib' qxolx.

¹²Mi jun xjal o til twitz Dios, pero qa ma qk'ujla qib' qxolx, axtzun najl Dios tuj qanmi, ex aju tk'ujlalil Dios ma tz'aqet-xix tuj qanmi.

¹³Tu'ntzun jlu nne'l qnik' ti'j qa ax najl qo' tuk'il Dios, ax ikx te najl tuj qanmi, porke ma tzaj tq'o'n Dios aju T-xew qe.

¹⁴Ax qo'ye ma qile ex in xi qchik'b'a'ne ma tzaj t-sama'n Qman Dios aju Tk'wa'l tu'n tok te Kolol kye xjal.

¹⁵Alkye in tchik'b'a'n qa ax tok Tk'wa'l Dios te Jesús, ax najl Dios tuj tanmi, ax ikx te ax najl tuk'il Dios.

¹⁶Kyja'tzun nne'l qnik' ti'j tk'ujlalil Dios qi'j ex ma txi qoksla'n. Ate Dios at tk'ujlalil, ex alkyeju at tk'ujlalil tuj tanmi, ax najl tuk'il Dios, ax ikx te Dios ax najl tuj tanmi.

¹⁷Tu'n jlu in tz'aqet-xix qk'ujlalil tu'ntzun tqe'xix qk'u'j ok tul tq'ijlalil jwisi; ex kqeb'il qk'u'j, porke ik tza'n tten Jesucrist, ikxtzun qtenju tzalu twitz tx'otx'.

¹⁸Qa at qk'ujlalil mlay qo xob', ex qa tz'aqlxix qk'ujlalil, tu'n jlu nne'l ti'n ju xob'ajil. Porke aju xob'ajil in tzaj tu'n tlaj ju castiw kyja' ttzaj; kyja'tzun alkye in xob', na'nx ttz'aqet tk'ujlalil tuj tanmi.

¹⁹In qk'ujla'n Dios, porke tnejel ma qo k'ujlanjtz tu'n.

²⁰Ex qa at jun xjal in tma'n: In nk'ujla'ne Dios, qa chi, ex qa nne'l tik'un terman, nik'al yol te; ex qa minti' in tk'ujla'n xjal terman aju nno'k tke'yin, ax mlay b'ant tu'n tk'ujlanjtz Dios tu'n, aju na'nx tok tke'yin.

²¹Ex atzun mandamyent jlu ma qk'am te Jesucrist, in tma'n: Alkyeju k'ujla'n Dios tu'n, ax ikx k'ujlam terman.