Read kumam 1 Juan 5 Bible Online

1 Juan 5 - kumam bible

1 Juan 5

¹Kykyaqil qeju in xi kyoksla'n qa ate Jesús ju Crist aju at toklen tu'n Dios, atzun qe tk'wa'l Diosju; ex kykyaqil qeju k'ujla'n Mamb'aj kyu'n, ax ikx k'ujla'n qe tk'wa'l Mamb'aj kyu'n.

²Qa k'ujla'n Dios qu'n ex qa ma che japun qe tmandamyent qu'n, tu'ntzunju nne'l qnik' ti'j qa k'ujla'n qe tk'wa'l Dios qu'n.

³Qa k'ujla'n Dios qu'n, che japunel qe tmandamyent qu'n; ex qe tmandamyent mya kyuw qe.

⁴Porke kykyaqil qeju ma che ok te tk'wa'l Dios, in kub' ti'j ju mya b'a'n kyu'n, aju at twitz tx'otx'. Kyja'tzun tten noq tu'nju qokslab'l in kub' ti'j mya b'a'n qu'n, aju at twitz tx'otx'.

⁵¿Alkyetzunju in kub' ti'j mya b'a'n tu'n, aju at twitz tx'otx'? ¿Myapetzun aju in xi toksla'n qa ate Jesús Tk'wa'l Dios? Atzunju.

⁶Ate Jesucrist ul, o b'yan tuj a' ex el tchk'el twitz crus; mya noq o'kx o b'yan tuj a', ax ikx el tchk'el. Axju Xewb'aj Xjan testiw ti'j jlu, porke aju Xewb'aj Xjan ax tok tyol.

⁷At ox testiw [tuj kya'j in che yolin ti'j jlu, ex atzun qe jlu: Mamb'aj, tuk'ix ju Yol, tuk'ix Xewb'aj Xjan; aqeju ox testiw lu junx kyten.

⁸Ex at ox testiw twitz tx'otx'], ex atzun qe jlu: Aju Xewb'aj Xjan, tuk'ix ju a', ex ju tchk'el Jesucrist; ex aqeju ox lu ax yol in kyma'n.

⁹Qa ma txi qoksla'n aju kyyol xjal, yajtzun tyol Dios, ¿myapetzun mas ma' toklen tu'n t-xi qoksla'n? Ex atzun tyol Dios jlu tzaj tchik'b'a'n ti'j Tk'wa'l.

¹⁰Alkye ma tz'okslan ti'j Tk'wa'l Dios, in tna'n tuj tanmi qa ax tok tyol Dios. Alkye minti' ma txi toksla'n tyol Dios, nno'k Dios nik'al yol tu'n, porke minti' ma txi toksla'n tyol Dios aju tzaj tchik'b'a'n ti'j Tk'wa'l.

¹¹Atzunju yol lu tzaj tchik'b'a'n Dios qe: Ma tzaj tq'o'n Dios qchwinqlal te jumajx, ex aju chwinqlal lu tu'nju Tk'wa'l in tzaj tq'o'n.

¹²Alkye at Tk'wa'l Dios tuk'il, at tchwinqlal; ex alkye minti' Tk'wa'l Dios tuk'il, minti' tchwinqlal.

¹³Tkyaqil jlu ma txi ntz'ib'ane kyeye, aqeye ma che okslane ti'j Tk'wa'l Dios, tu'ntzun tqe'xix kyk'u'je ti'j qa at kychwinqlale te jumajx.

¹⁴Qa at jun ma txi qqanin te Dios ik tza'nx ju tajb'il, in qo tzaj tb'i'n, kyja'tzun tten in qe'xix qk'u'j ti'j.

¹⁵B'a'n qu'n in tzaj tb'i'n Dios alkyeju ma txi qqanin te; kyja'tzun ax ikx b'a'n qu'n in qk'mo'n aju ma txi qqanin te.

¹⁶Qa at jun okslal ma til in b'inchan terman il, mya jun il in tzaj kamik tu'n, b'a'n tu'n tkub'san twitz Dios ti'j terman, ex ktzajel tq'o'n Dios tchwinqlal terman; in xi nma'ne jlu kyi'j qeju in che b'inchan il, qa mya jun il in tzaj kamik tu'n. At il in tzaj kamik tu'n. Minti' in xi nma'ne tu'n qkub'san twitz Dios ti'j jlu.

¹⁷Tkyaqilju mya b'a'n in qb'incha'n, atzun ilju; ex at il minti' in tzaj kamik tu'n.

¹⁸B'a'n qu'n, aqeju ma che ok te tk'wa'l Dios mya kukx in che b'inchan il; ex kwentin qe tu'n Tk'wa'l Dios, ex minti' in che tzyet tu'n tajaw il.

¹⁹B'a'n qu'n, te Dios qo', ex kykyaqil xjal twitz tx'otx' ate' tjaq' tipumal tajaw il.

²⁰Ex b'a'n qu'n, o tzul aj Tk'wa'l Dios ex ma tzaj tq'o'n qnab'l tu'n qojtzqinte alkyeju Dios axix tok. Ax ato' tuk'il ju Dios axix tok, ex tuk'il Jesucrist aju Tk'wa'l. Atzunte Diosju axix tok ex q'olte qchwinqlal te jumajx.

²¹Aqeye tal nk'wa'le, ten kykwente kyi'je tu'n mi'n kyk'ulune kywitz qe tilb'ilal. Ikxwitju.