Read kumam Jueces 12 Bible Online

Jueces 12 - kumam bible

Jueces 12

¹B'aj kychmon kyib' qe xinaq tiyjil Efraín, e ik'x tuj nima Jordán tumlal lugar Zafón, ex xi kyma'n te Jefté: —¿Tiqu'n xi'ya tu'n tok tzoqpaja kyi'j aj Amón ex minti' o tmaya qeye tu'n qxi'ye tuk'ila? Atzun ja'lo kb'el qpatune tjaya tuk'ix aya tokx tuj.

²Atzunte Jefté xi ttzaq'we'n: —Qe nxjalile ex aqine kub' ten jun q'oj qxole kyuk'il aj Amón, ex e tzaj ntxko'n qeye, atzun kyeye minti' e tzaje kolol qi'je.

³Tej tel nnik'e ti'j minti' tu'n kytzaje onil qeye, xi woyin wib'e tu'n nkyime ex in ok tzoqpaje kyi'j aj Amón. Ate Qman e tzaj q'onte kye tuj nq'ab'e. ¿Tiqu'ntzun ma che tzaje q'ojlel wi'je ja'lo?

⁴E b'ajtzun tchmo'n Jefté kykyaqil qe xinaq aj Galaad, ex ok ten q'ojlel kyi'j qe tiyjil Efraín ex o kub' kyi'j tu'n. Qe tiyjil Efraín in kyma'ntoq kye aj Galaad, aqeju najl kyxol tx'otx' kye aj Efraín ex kye aj Manasés, che chi kyja': Kyeye noq o che ex oqe qxole.

⁵Qe aj Galaad el kyi'n qe xajb'il a' te nima Jordán kye qe tiyjil Efraín, ex oktzun tpon jun aj Efraín in oqtoq ex in xi tqanin amb'il tu'n tik'x, atzun kye aj Galaad in xi kyqanin te qa aj Efraín te; qatzun ma tma qa mya aj Efraín,

⁶tu'n jlu in xi kyqanin te tu'n ttzaj tma'n ju yol Shibolet. Qa ma tma Sibolet, tu'nju minti' otoq b'ant tu'n, in tzajtzun kytzyu'n ex axtzun in kub' b'yo'n ttzi xajb'il a' te nima Jordán. Tuj tq'ijlalil lu e kyim 42 mil xinaq aj Efraín.

⁷Qaq ab'q'i o ten Jefté te nejenel kye aj Israel. Tej tkyim, atzun ku'x maqu'n tuj Galaad tuj tnam jatum o itz'j.

⁸Tkyimlenxi Jefté ok Ibzán te nejenel kye aj Israel, aju aj Belén.

⁹Ate Ibzán tzaj 30 tky'ajal ex 30 tme'jel, ex kykyaqil qe jlu e jaw tmojb'a'n kyuk'il qe xjal te junxitl tnam. Wuq ab'q'i o ten Ibzán te nejenel kye aj Israel,

¹⁰ex tej tkyim ku'x maqu'n tuj Belén.

¹¹Tkyimlenxi Ibzán, ate Elón aju tiyjil Zabulón ok te nejenel kye aj Israel. Laj ab'q'i o ten Elón te nejenel

¹²ex tej tkyim, ku'x maqu'n tuj tnam Ajalón tuj kytx'otx' aj Zabulón.

¹³Tkyimlenxi Elón, ate Abdón aju tky'ajal Hilel aju aj Piratón, ok te nejenel kye aj Israel, ex wajxaq ab'q'i o ten te nejenel.

¹⁴Ate Abdón tzaj 40 tky'ajal ex 30 tal tchman, ex teyle junjun kye tib'aj bur in che b'et.

¹⁵Tejtzun tkyim Abdón, ku'x maqu'n tuj tnam Piratón aju at tuj kytx'otx' aj Efraín, tuj tiwitz tx'otx' kye aj Amalec.