Read kumam Jueces 14 Bible Online

Jueces 14 - kumam bible

Jueces 14

¹Pon jun q'ij ku'x Sansón tuj tnam Timnat ex ok tke'yin jun q'apoj aj Filisteo.

²Tejtzun tul meltz'aj tja, xi tma'n kye tma'n: —Ma wile jun q'apoj aj Filisteo tuj tnam Timnat, kyxi'ye qanilte tu'ntzun nmoje'ye tuk'il.

³Atzun kye tman xi kytzaq'we'n: —Baqa minti' xu'j kyxol xjal at qxilen kyuk'il, ex qa kyxol kykyaqil aj Israel. ¿Ti tganara ti'j tu'nju alix txi'ya jyolte t-xu'jila kyxol aj Filisteo, aqeju mya okslal ti'j Dios? Atzunte Sansón xi ttzaq'we'n: —Aju q'apoj lu at nganiye ti'j, ex atzunju waje tu'n ttzaj kyi'ne te nxu'jile.

⁴Minti'toq b'a'n kyu'n tman Sansón qa tu'n Qman b'ant ikju, porke in jyontoq Qman tumel tza'n tten tu'n tok tzoqpaj kyi'j aj Filisteo, aqeju in che kawintoq kyib'aj aj Israel tuj tyemp lu.

⁵Kyja'tzun tten xi' Sansón tuj tnam Timnat tuk'ix tman ex ttxu'. Tej tpon Sansón t-xol tqan uva, niqayin ttxlaj tnam, ok tzoqpaj jun tal tman b'alun ti'j, in tzanuntoq wen.

⁶Tzaj q'o'n naj tipumal Sansón tu'n T-xew Dios, cabal o kub' tman b'alun tu'n, ex b'i'x b'aj ttzaqun tu'n tq'ab' mer ik tza'n in b'aj tzaqat jun tal chip, ex misikyer xi tma'n kye tman aju otoq b'aj.

⁷Pontzun ex o yolin tuk'il q'apoj ex o t-xo' tgan ti'j.

⁸Tb'ajlenxitzun junjun q'ij, xi' Sansón juntl maj tu'n tmoje' tuk'il q'apoj, ex ik'x ttxlaj b'e tu'n t-xi' ke'yilte tal tman b'alun otoq kub' tb'yo'n, ex tej tpon o til txqan ttxu colmen, tuk'ix txqan ta'l kab' tuj t-ximlal b'alun kyimni.

⁹Eltzun tloch'in Sansón ttxk'omil kab' tu'n tq'ab' tu'n tetz ta'l kab' tu'n, ex ik'tzun in lo'n kab'. Tej kypon knet qe tman tu'n, xi tq'o'n ta'l kab' te kylo', ex minti' xi tma'n kye qa tuj tk'u'j kyimni b'alun otoq tz'etz ti'n ta'l kab'.

¹⁰Xitzun tman Sansón ma tja q'apoj, ex ok jun ninq'ij tu'n Sansón ik tza'nx in b'ant kyu'n ku'xun.

¹¹Tej kylonte aj Filisteo otoq pon Sansón, tzaj kyi'n 30 ku'xun tu'n kyten tuk'il.

¹²Xi tma'n Sansón kye qeju 30 ku'xun: —Kxel nma'ne jun yol kyeye tu'n kyna'ne ti'j. Qatzun otoq che na'ne ti'j ex otoq tzaq'wet kyu'ne tuj tumelxix tuj wuq q'ij ninq'ij lu, kxel nq'o'ne jun xb'alun tb'anilxix b'inchamaj ti'j noq' lino te teyle junjun kyeye, ex jun txkaj xb'alun aju in ajb'en te ninq'ijb'il.

¹³Qatzun minti' ẍe na'ne ti'j, teyletzun junjun kyeye ktzajel tq'o'n jun xb'alun puro tb'anilxix weye, b'inchamaj ti'j noq' lino, tuk'ix jun txkaj xb'alun aju in ajb'en te ninq'ijb'il. Atzun kye tzaj kytzaq'we'n: —Q'mantza qeye alkye yol tu'n qna'ne ti'j. Lu qo'ye lu qo b'ile ti'j.

¹⁴Xitzun tma'n Sansón aju yol tu'n kyna'n ti'j ex chi kyja': Ti'j ju b'a'n chyo'n, ma tz'etz ju b'a'n tlo'njtz; ex aju attoq nim tipun, puro chi' ma tz'etz tuj. Tejtzun tel ox q'ij, na'nxtoq kyna'n qe xjal ti'j ju yol.

¹⁵Tuj tkyajin q'ij xi kyma'n te t-xu'jil Sansón: —Q'o'nka tilil tu'n ttzaj tma'n tchmila aju yol minti' in qo na'ne ti'j, ex qa mi'n, kb'el qpatuna kyuk'ix qeju ate' tuj tja tmana. Aju txokb'il qeye kyu'ne, mer ik tza'n noq tu'n tel kyi'ne aju at qeye.

¹⁶Oktzun ten t-xu'jil Sansón oq'el ex xi tma'n te: —Minti' tganiya wi'je. Ik'un qine tu'na. Ma txi tma'na jun yol kye nxjalile tu'n kyna'n ti'j, ex na'nx ttzaj tma'na weye alkye tzaq'web'l ti'j yol. Atzunte Sansón xi ttzaq'we'n: —Na'nxpe t-xi nma'ne te nmane ex te ntxu'ye, ex ¿tza'ntzun tten tu'n t-xi nma'ne teya?

¹⁷Atzunte xu'j kukxtoq t-oq' ttxlaj Sansón tuj wuq q'ij ninq'ij, ex tu'nju kukx twulin xu'j, kyja'tzun tuj twuqin q'ij xi tma'n Sansón aju tzaq'web'l ti'j yol. Xi'tzun xu'j q'malte tzaq'web'l ti'j yol kye t-xjalil.

¹⁸Tujtzun twuqin q'ij, tej na'nxtoq tex q'ij, e je'xtzun aj Filisteo q'malte tzaq'web'l te Sansón. Che chi kyja': Minti' juntl mas chi' twitz ta'l kab', ex minti' juntl at nim tipun ik tza'n te b'alun. Atzunte Sansón xi ttzaq'we'n: Noqwit minti' xi kyqanine te nxu'jile aju t-xilen yol, minti'wtlo ẍe na'ne ti'j.

¹⁹Te tib'ajxi jlu tzaj q'o'n tipumal Sansón tu'n T-xew Dios, xi' tuj tnam Ascalón, e kub' tb'yo'n 30 xjal tuj tnam lu, el ti'n kyxb'alun kyi'j, ex aju xb'alun lu ajb'en tu'n te chojb'il kye xjal otoq tzaj kyma'n tzaq'web'l ti'j yol. Tzaj nim tq'oj Sansón ex ajtzun tja tman.

²⁰Atzunju t-xu'jil Sansón xi q'o'n te jun tuk'il otoq ten tuj mejeb'le'n.