Read kumam Jueces 16 Bible Online

Jueces 16 - kumam bible

Jueces 16

¹At jun maj xi' Sansón tuj tnam Gaza. Tuj tnam lu o til jun xu'j jawni twitz kyuk'il xinaq ex okx tuj tja tu'n tkub' tan tuk'il.

²Tejtzun kyb'inte xjal ate' tuj tnam Gaza qa otoq pon Sansón tuj tnam, b'aj kytxolb'an kyib' ti'jele tja xu'j ex e kub' ten xq'uqil ttzi tlamel tnam tuj enter qonik'an; in che ximantoq ti'j qa tu'n tkub' Sansón kyu'n ok tjawil q'ij.

³Ex ate Sansón noq mij aq'b'il o tan ex tuj tmij aq'b'il jaw we' ex el tletx'in tlamel tnam kyuk'ix kab'e tmarkil ex tuk'ix tze' tex te tal, jaxtzun tq'o'n Sansón tkyaqil jlu twi t-semil ex xi ti'n max twi witz tkub' twitz tnam Hebrón.

⁴Te tib'ajxi jlu, o t-xo' tgan Sansón ti'j jun xu'j Dalila tb'i, aju najl tuj chq'ajlaj Sorec.

⁵E je'xtzun qe nejenel kye aj Filisteo tuk'il Dalila ex xi kyma'n te: —Xmoxin oka Sansón ex sb'unkuya, ex q'onka kwent ti'j jatum in tzaj nim tipun, ex alkye tumel tu'n tk'alet ex tu'n tkub' ti'j qu'ne. Teyle junjun qeye jaku txi tq'o'n jun mil tuk' jun syent saq pwaq teya.

⁶Xitzun tma'n Dalila te Sansón: —B'inchama xtalb'il, q'mantza weye jatum in tzaj nim tipuna. ¿Atpe jun tumel tu'n tk'aleta ex tu'n mi'n tko'pja?

⁷Atzunte Sansón xi ttzaq'we'n: —Qa ma chin kub' k'alo'na tu'n wuq pyal na'nxtoq kytzqij, k'elel wipune ex ik chin okele ik tza'n kye txqantl xjal.

⁸Xitzun kyi'n qe nejenel kye aj Filisteo wuq pyal na'nxtoq kytzqij te Dalila, ex kyu'n qe pyal lu b'aj k'alo'n Sansón tu'n Dalila.

⁹Ex nej otoq che okx tewan junjun xinaq tuj tja. Jawtzun sch'in Dalila: —Sansón, che okel tzoqpaj aj Filisteo ti'ja. E b'ajtzun laqj qe pyal tu'n Sansón mer ik tza'n jun tam b'aq tz'e'ynaj. Minti' el kynik' aj Filisteo ti'j jatum in tzaj tipun Sansón.

¹⁰Xitzun tma'n Dalila te Sansón: —Ma chin kub' t-sb'u'na, ma nik'ana yol wuk'ile. Ja'lo b'inchama xtalb'il q'mantza weye alkye tumel tu'n tkub' k'aleta.

¹¹Xi ttzaq'we'n Sansón: —Qa ma chin kub' k'alo'ne kyu'n ak'aj saqb'aq na'nx kyajb'en jun maj, k'elel wipune ex ik chin okele ik tza'n txqantl xjal.

¹²Tzajtzun ti'n Dalila junjun ak'aj saqb'aq ex b'aj k'alo'n Sansón tu'n, ex jaw sch'in Dalila kyja': —Sansón, che okel tzoqpaj aj Filisteo ti'ja. Ex otoq che okx tewan juntl maj junjun xinaq tuj tja, ex e b'aj tlaqin Sansón qe saqb'aq tu'n tipun, mer ik tza'n in kub' laqj jun tam noq'.

¹³Xitzun tma'ntl Dalila te Sansón: —Kukx nkub' t-sb'u'na, kukx in nik'ana yol wuk'ile. Q'mantza weye alkye tumel tu'n tb'aj k'aleta. Atzunte Sansón xi ttzaq'we'n: —Qa ma txi tchmo'na wuq che'l ttzmal nwi'ye tuj tchemaja, ex qa ma ku'x tawana jun stak kyuw wen tuj tx'otx', tu'ntzun jlu k'elel wipune ex ik chin okele ik tza'n txqantl xjal. Kub'tzun watza'n Sansón tu'n Dalila ex tzaj ti'n Dalila wuq che'l ttzmal twi Sansón ex xi tchmo'n tuj tchemaj,

¹⁴ex te tib'ajxi jlu ku'x tkyuwsa'n ju stak tuj tx'otx' ex jaw sch'in: —Sansón, che okel tzoqpaj aj Filisteo ti'ja. Jawtzun we' Sansón ex b'i'x jatz b'oql stak tuj tx'otx' tu'n, tuk'ix ju telar te chmob'l xb'alun, tuk'ix ju noq' tok ti'j.

¹⁵Xitzun tma'n Dalila te Sansón: —Nik'al yola. ¿Tza'n tten in tma'na weye qa at nim tganiya wi'je? Ma b'ant ox maj in xmayina wi'je ex b'ajx tzaj tma'na weye jatum in tzaj nim tipuna.

¹⁶Tu'nju kukxtoq twulin Dalila ti'j Sansón, ex tkyaqil q'ij in xjelin ax xjel te, ya otoq b'aj tgan Sansón ex tajb'iltoq tu'n tkyim.

¹⁷Te mankb'iltzun xi tma'n Sansón te Dalila jatum in tzaj tipun. Chi kyja': —Mi jun maj o tz'el matzo'n ttxa'n nwi'ye, ex tej na'nxtoq wul itz'je, ya pa'nmaj qine tu'n Dios tu'n woke te nazareo. Qa ma tz'el matzo'n ttxa'n nwi'ye, k'elel wipune ex ik chin okele ik tza'n txqantl xjal.

¹⁸Tejtzun tel tnik' Dalila ti'j qa otoq tzaj tchik'b'a'n Sansón tkyaqil te, e je'xtzun txokb'aj qe nejenel kye aj Filisteo tu'n, chi kyja': —Kytzajtzune ja'lo, porke ma tzaj tchik'b'a'n Sansón tkyaqil weye. E je'xtzun qe nejenel kye aj Filisteo tuk'il Dalila, tuk'ix pwaq q'i'n kyu'n.

¹⁹Kub'tzun watza'n Sansón tu'n Dalila ex kub' ttx'ayb'a'n twi' twi tqan, ex jurat tzaj ttxko'n jun xinaq tu'n tel matzet wuq che'l ttzmal twi'. Kyja'tzun tten kub' ti'j Sansón tu'n Dalila ex el tipun.

²⁰Ex jaw sch'in Dalila: —Sansón, che okel tzoqpaj aj Filisteo ti'ja. Eltzun twatl Sansón, q'uqltoq tk'u'j qa tu'n tklet juntl maj ik tza'n nej, ex minti'toq b'a'n tu'n qa otoq kyaj kolin tu'n Qman.

²¹Tzyettzun Sansón kyu'n aj Filisteo ex jatz kyi'n qe tb'aq' twitz, xi q'i'n tuj tnam Gaza, b'aj k'alo'n tu'n caden q'an k'uxb'il ttx'otx'il ex ok kyq'o'n te che'l triw tuj pres.

²²Maske el matzo'n ttzmal twi', ex tzaj ch'iy juntl maj.

²³Oktzun kychmon kyib' qe nejenel kye aj Filisteo tu'n tik'set jun ninq'ij kyu'n tu'nju tkub'len ti'j Sansón kyu'n, ex tu'n t-xi kyq'o'n oyaj te kydios Dagón, ex e ok ten b'itzal kyja': Ate qdios ma tzaj q'onte Sansón tuj qq'ab', aju aj q'oj qi'j, tu'n tkub' ti'j qu'n.

²⁴Ex tej kyke'yinte xjal, ax ikx kye e ok ten b'itzal ex jaw kynimsa'n tb'i kydios kyja': Ate qdios ma tzaj q'onte Sansón tuj qq'ab', aju aj q'oj qi'j, tu'n tkub' ti'j qu'n, aju o b'aj naj qkojb'il tu'n, ex nimku qxjalil o che kub' tb'yo'n.

²⁵In che tzalajtoq wen ex xi kyqanin tu'n tpon q'i'n Sansón te kysaqchb'il. Etztzun q'i'n Sansón tuj pres ex ajb'en te kysaqchb'il, ex kub' kywab'an kyxol tqan ja.

²⁶Xitzun tma'n Sansón teju ku'xun ẍaqlul te: —Chin twab'an oka jatum b'a'n tu'n kyok nmako'ne qe tqan ja aju tzyulte tja kydiose. Waje tu'n wok q'eje'ye kyi'j.

²⁷Kykyaqil qe nejenel kye aj Filisteo ate'toq tuj tja kydios, ex nojni tuj ja kyu'n qe xinaq ex qe xu'j. Ax ikx ate'toq b'alo ox mil xjal twi ja, in che ke'yintoq kyi'j qe txqantl kyuk'il tza'n tten in b'aj saqchb'e'n Sansón kyu'n.

²⁸Oktzun ten Sansón kub'sal twitz Qman ex xi tma'n: In chin kub'sane twitza Nman Dios, chin tna'ntza noq o'kx juntl maj ja'lo, ex q'ontza wipumale tu'n tchjet kyu'n aj Filisteo b'i'x ja'lo aqeju kab'e tb'aq' nwitze o jatz kyi'n.

²⁹Oktzun ten Sansón xmakal kye kab'e tqan ja ate' tuj tmij, ex kyib'ajtzun qe tqan ja lu ttzyun tib' tja kydios xjal. Tu'n tb'anq'ab' xi tlamo'n jun tqan ja ex tu'n tnayaj xi tlamo'n juntl tqan ja,

³⁰ex jaw sch'in: E kykyim aj Filisteo junx wuk'ile. Xitzun tlamo'n qe tqan ja tu'n tkyaqil tipun. Tzajtzun tilj ja kyib'aj qe nejenel kye aj Filisteo ex kyib'aj kykyaqil qeju ate' tuj. Mas nim kyb'et xjal e naj tu'n Sansón tuj q'ij tej tkyim ik tza'n qeju otoq che naj tu'n tuj tkyaqil tanq'ib'l.

³¹Te tib'ajxi jlu, e ul qe terman Sansón ex qe xjal at kyxilen tuk'il, xi kyi'n t-ximlal ex ku'x kymaqu'n ttxlaj tpantyón Manoa aju qtzan tman, aju tkub' t-xol lugar Zora tuk'il lugar Estaol. Winqin ab'q'i o ten Sansón te nejenel kyxol aj Israel.