Read kumam Jueces 17 Bible Online

Jueces 17 - kumam bible

Jueces 17

¹Tuj tiwitz tx'otx' kye aj Efraín najltoq jun xinaq Micaía tb'i.

²Xi tma'n Micaía te ttxu' kyja': —Aju jun mil tuk' jun syent saq pwaq xi elq'a'n teya, ex o nb'iye tej t-xi tqanina mya b'a'n tib'aj eleq', aqine q'ilte pwaq lu, aqine inx elq'ante tpwaqa, chi Micaía. Tmatzun ttxu' kyja': —Awt Qman ky'iwlante teya, wal.

³Ajtzun tq'o'n Micaía aju jun mil tuk'il syen saq pwaq te ttxu', atzunte ttxu' tma: —Ax tok aju pwaq lu kxel nq'o'ne te Qman tu'n tajb'en teya wal, tu'n tb'inchanteya jun tilb'ilal lo'tzin ti'j tu'n saq pwaq; ja'lotzun k'ajel nq'o'ne juntl maj tuk'ila.

⁴Atzunte Micaía aj tq'o'n juntl maj saq pwaq te ttxu', ex atzunte ttxu' xi tq'o'n kab'e syent saq pwaq ti'j pwaq lu te jun xjal b'a'n b'inchan tilb'ilal, tu'ntzun tkub' tb'incha'n jun tilb'ilal lo'tzin ti'j tu'n saq pwaq, ex okx tq'o'n tuj tja Micaía.

⁵Attoq jun lugar te k'ulb'il tuj tja Micaía. Kub' tb'incha'n Micaía jun kapiẍay in ajb'en kyu'n pal ex txqantl tilb'ilal nno'k kydiosin xjal tuj kyja, ex ok tq'o'n jun tky'ajal te pal.

⁶Tuj tq'ijlalil lu minti'toq rey kyxol aj Israel, ex teyle junjun in tb'incha'ntoq noq alkye b'a'n tuj twitz.

⁷Tuj tnam Belén tuj tx'otx' kye aj Judá, attoq jun ku'xun aj Leví noq in posadiyin.

⁸Aju ku'xun lu etz tuj tnam Belén tu'n t-xi' jyolte jun lugar jatum tu'n tnajan. Tej in b'ettoq tuj tiwitz tx'otx' kye aj Efraín o pon tja Micaía.

⁹Xitzun tqanin Micaía te: —¿Jatum tzajniya? —Tzajni qine tuj Belén, aj Leví qine ex in chin jyone jun lugar jatum tu'n nnajane tuj, chi ku'xun, xi ttzaq'we'n.

¹⁰Xitzun tma'n Micaía te: —Tencja wuk'ile tu'ntzun tajb'ena weye te pal, ex tu'n toka ik tza'n aya nmane. Jaku txi nchjo'ne laj saq pwaq tuj ab'q'i, ex jaku txi nq'o'ne t-xb'aluna ex twaya, chi Micaía. Kub'tzun tuj twitz aj Leví tu'n tkyaj ten najal tuk'il Micaía, okxtzun tuja, ex ok ik tza'nx tky'ajal Micaía.

¹²Oktzun tq'o'n Micaía toklen ku'xun aj Leví te tpal, ex axtzun kyaj ten najal tuk'il.

¹³Tmatzun Micaía kyja': Ja'lo axix tok chin b'el ky'iwla'ne tu'n Dios, tu'nju at jun pal aj Leví wuk'ile.