Read kumam Jueces 2 Bible Online

Jueces 2 - kumam bible

Jueces 2

¹Aju t-anjel Qman etz tuj Gilgal ex o pon tuj lugar Boquim tb'i, ex xi tma'n kye aj Israel kyja': Aqine etz q'inte kyeye tuj Egipto ex ma che ul wi'ne tuj tx'otx' lu aju xi ntziyane kye kyxe'chele, ex xi nma'ne kye kyja': Mlayx b'aj nch'expu'ne aju nyole ma kyaj b'ant ti'j kyuk'ile,

²atzun kyeye mi'n moje' kyyole kyuk'il qe xjal najlqe tuj tx'otx' lu, noq o'kx kb'ajel kyxitune qe ky-altar, nchiye. Atzun kyeye minti' ma txi kynimane nyole. ¿Tiqu'n ma che ok tene b'inchal mya b'a'n?

³Tu'ntzun jlu kxel nma'ne kyeye ja'lo: Mlay che ik' nlajo'ne qe xjal kywitze, noq o'kx che okel qe xjal lu ik tza'n jun asyal tu'n t-xi jato'n kyi'je, ex qe kydios che ajb'el te jun k'ob'il te kyeye.

⁴Tejtzun tb'aj yolin t-anjel Qman, kykyaqil aj Israel e ok ten oq'el kyuwxix wen,

⁵kyja'tzun tten ok tb'i lugar lu Boquim.[2] Ex atzun xi kyq'o'n chojb'il te Qman.

⁶Tejtzun tb'aj tq'olb'en tib' Josué kyuk'il aj Israel, teyle junjun xi' tuj ttx'otx' aju otoq tk'am te tetzb'il.

⁷Tej itz'xtoq Josué, kukx e ajb'en aj Israel te Qman, ax ikx tej itz'xtoq qe tij xjal aqeju ax e kyaj ten tkyimlenxi Josué ex o kyil tej kyb'ant qe b'inchb'en nim kyipumal tu'n Qman te jun b'a'n kye aj Israel.

⁸Kyimtzun Josué aju tky'ajal Nun ex tmajen Qman, tej otoq japun twi' jun syent tuk' laj ab'q'i,

⁹ex axtzun ku'x maqu'n tujx ttx'otx' tuj lugar Timnat-sera, aju ta' tuj tiwitz tx'otx' kye aj Efraín, ti'jxi witz Gaas.

¹⁰Ex tej kyb'aj kyim kykyaqil aj Israel aqeju e ten tuj tq'ijlalil Josué, aqeju e itz'j te tib'ajxi minti' ch'in kyojtzqib'l ti'j Qman, ex minti' otoq kyil tkyaqilju b'a'n otoq tb'incha Qman kye aj Israel.

¹¹E oktzun ten aj Israel b'inchal mya b'a'n twitz Qman, ex e ok ten k'ulul kywitz tilb'ilal Baal, aqeju nno'k kydiosin xjal.

¹²El kypa'n kyib' aj Israel ti'j Qman aju Kydios kyxe'chel, aju etz q'inte kye tuj Egipto, e ok lpe' kyi'j kydios xjal kyvesin kyib' kyuk'il, ex e k'ulun kywitz. Tu'ntzun jlu tzaj tq'oj Qman kyi'j.

¹³El kypa'n kyib' ti'j Qman ex e ok ten k'ulul twitz Baal, ex kywitz nimku tilb'ilal Astarté aju kydios xjal.

¹⁴Tu'ntzun jlu tzaj tq'oj Qman kyi'j aj Israel, xi tq'o'n amb'il kye eleq' tu'n tel kyelq'a'n tkyaqilju at kye, kub' kyi'j kyu'n qe aj q'oj kyi'j, aqeju ate' ti'jele kytx'otx', ex minti' o ten kyipun tu'n kywe' kywitz aj q'oj.

¹⁵Tkyaqil maj tej kyxi' aj Israel q'ojlel kyi'j aj q'oj kyi'j, ax te Qman ok ten q'ojlel kyi'j aj Israel, ex mya b'a'n e'la te kye ik tza'nx otoq tma Qman kye. Maske tzaj nim yajb'il kyi'j aj Israel,

¹⁶ax ikx e jaw t-sk'o'n Qman qe xjal tu'n kyok te nejenel kye, tu'ntzun kyklet tuj kyq'ab' qe eleq' in che ok tzoqpaj kyi'j.

¹⁷Atzun kye aj Israel minti' xi kyniman qe nejenel kye, noq o'kx kyaj kykolin Qman ex e ok ten k'ulul kywitz junxitl dios. Qe kyxe'chel otoq txi kyniman qe tmandamyent Qman, atzun kye minti' o kyb'incha ik tza'n otoq kyb'incha qe kyxe'chel.

¹⁸Tkyaqil maj ok tjaw t-sk'o'n Qman jun nejenel kye, ax te Qman o tz'onin te, ex tuj tq'ijlalil junjun nejenel in che kolpet aj Israel tuj kyq'ab' aj q'oj kyi'j, ex tzaj q'aq'an tk'u'j Qman kyi'j tej kyjaw ayayan tu'n ta'w yajb'il nnik'x kyu'n.

¹⁹Ex oktzun tkyim ju nejenel kye, in che oktzun ten juntl maj b'inchalte mya b'a'n, ex masxix nim mya b'a'n in kyb'incha'n ik tza'n kye kyxe'chel, ex e ok lpe' kyi'j junxitl dios, e ajb'en kye ex e k'ulun kywitz. Minti' kyaj kykolin tu'n kyb'inchante mya b'a'n, ex e ok mib'an che b'in.

²⁰Tu'ntzun jlu tzaj nimxix tq'oj Qman kyi'j aj Israel ex tma: Qe xjal lu minti' ma japun kyu'n aju yol kyaj b'ant ti'j wu'ne kyuk'il qe kyxe'chel, ex kyk'i' che niman weye;

²¹tu'ntzun jlu mlay che ik' nlajo'ne qe xjal kywitz, aqeju minti' e ik' tlajo'n Josué tej na'nxtoq tkyim, chi Qman.

²²Tb'incha Qman ikju tu'n kyok aj Israel tuj malb'il tu'n, ex tu'n tel tnik' ti'j qa tu'n kyok lpe' ti'j ik tza'n otoq kyb'incha qe kyxe'chel.

²³Kyja'tzun minti' e jik' tlajo'n naj qe xjal kyuj tnam, aqeju minti' kub' kyi'j tu'n Josué; noq o'kx ax e kyaj ten tu'n Qman tuj kylugar.