Read kumam Jueces 21 Bible Online

Jueces 21 - kumam bible

Jueces 21

¹Qe aj Israel otoq txi kytziyan jun yol axix tok tuj Mizpa, tu'n mi'n t-xi kyq'o'n amb'il tu'n kymoje' qe kyme'jel kyuk'il tiyjil Benjamín.

²Oktzun kychmon kyib' tuj Betel ex e kub' ten twitz Dios; ex ate'x tejxi ttzaj qlolj in che oq'toq wen ex in kyma'ntoq:

³Aya Qman aju Kydios aj Israel, ¿tiqu'n ma tzaj jlu qi'je, ex tiqu'n kb'el naj jun k'loj kyiyjil aj Israel ja'lo?

⁴Tuj juntl q'ij primxix e jaw we' aj Israel, jaw kyb'incha'n jun altar ex xi kyq'o'n oyaj te Qman, aqeju patun in che kub', kyuk'ix qe chojb'il te mojb'ab'l tib'il.

⁵Ex in kyma'ntoq kyxolx: ¿Alkye jun qxol minti' o ten tuj b'uyj tib'il ok tuj Mizpa? Tu'nju otoq txi kytziyan jun yol axix tok tu'n tkub' kyb'yo'n aqeju minti' e ten tuj b'uyj tib'il.

⁶Nimxix in che b'isuntoq aj Israel ti'j ju otoq b'aj kyi'j tiyjil Benjamín, aqeju kyerman, ex in kyma'ntoq: Ja'lo ma naj jun k'loj kyiyjil aj Israel.

⁷¿Ti kb'antel qu'n tu'n tknet kyxu'jil tiyjil Benjamín, aqeju ma che kyaj anq'in? Porke o txi qtziyan jun yol axix tok twitz Qman, tu'n mi'n t-xi qq'o'n amb'il tu'n kymoje' qe qme'jel kyuk'il.

⁸¿Atpe jun k'loj qiyjil minti' pon tyek'un tib' twitz Qman tuj Mizpa? Che chi. Eltzun kynik' ti'j qa mi jun aj Jabes aju at tuj tx'otx' Galaad otoq ten tuj b'uyj tib'il,

⁹ex tej tjaw list, mi jun kye qe xjal najl tuj lugar lu o tzaj tzaq'wente.

¹⁰Kyu'n enter tnam xjal e je'x sama'n kab'laj mil soldad, aqeju kyuw kyk'u'j tuj q'oj, ex xi q'o'n orden kye tu'n tkub' kyb'yo'n tu'n spad kykyaqil qe xinaq najlqe tuj tnam Jabes, kyuk'ix qe k'wa'l ex qe xu'j otoq kyilxi xinaq.

¹²Kyxol qeju najlqe tuj tnam Jabes e knet kyaje syent q'apoj na'nxtoq kylonte xinaq, ex e tzajtzun kyi'n tu'n kyul tuj campament tkub'sa'n tuj Silo, tuj tx'otx' Canaán.

¹³Kykyaqiltzun tnam xjal e q'mante tu'n kyxi' junjun xjal q'malte kye tiyjil Benjamín, aqeju ate'toq tuj pik Rimón, tu'n mi'n kukx tten q'oj kyxol.

¹⁴E ajtztzun meltz'aj qe tiyjil Benjamín ex atzun kye aj Israel xi kyq'o'n kye aqeju xu'j otoq che tzaj kyi'n tuj tnam Jabes, ex minti' e kanun qe xu'j lu kye kykyaqil.

¹⁵Atzun kye aj Israel tzaj tz'e'y kyk'u'j kyi'j qe tiyjil Benjamín, tu'nju otoq txi tq'o'n Qman amb'il tu'n tnaj jun k'loj kyiyjil aj Israel.

¹⁶Atzun qe nejenel kye tnam xjal in kyma'ntoq kyxolx: ¿Tza'n tten knetel kyxu'jil qe txqantl qu'n? Porke qe xu'j tiyjil Benjamín b'i'x o che naj kykyaqil.

¹⁷Ate Benjamín il ti'j kukx ktel toklen kyxol qe qiyjil noq kyu'n qeju o che kyaj anq'in, tu'ntzun mi'n tnaj jun k'loj tiyjil Israel.

¹⁸Atzun qe mlay b'ant che'x qq'o'n qme'jel tu'n kymoje' kyuk'il, ex qkyaqil aj Israel qo' o txi qtziyan jun yol axix tok tu'n mi'n kyxi qq'o'n qme'jel kye tiyjil Benjamín, tu'ntzun mi'n ttzaj mya b'a'n qib'aj.

¹⁹Ex kykyaqil ab'q'i nno'k jun nintz ninq'ij te Qman tuj Silo, aju tkub'sa'n tuj tb'anq'ab' q'ij te tnam Betel, tuj tjawitz q'ij te b'e in xi' tuj Betel tu'n tpon tuj Siquem, ex tuj tnayaj q'ij te tnam Lebona, che chi.

²⁰Xitzun kysama'n qe nejenel kye aj Israel ju tqanil lu kye tiyjil Benjamín: Kyxi'ye ex kyewanx kyib'e kyxol tqan uva ate' niqayin ti'j tnam Silo,

²¹ex listtzun che tenkuye. Oktzun kyetz qe txin ate' tuj Silo tuj k'lojin kyten ex in che b'ixun, ax ikxtzun kyeye b'ix che etze tuj lugar jatum kyewan kyib'e, ex teyle junjun kyeye b'a'n tu'n t-xi telq'a'n jun txin te t-xu'jil, ex b'i'xtzun che aje tuj kytx'otx'e.

²²Ex qatzun ma che ul kyman ex qa kyerman qe txin q'malte qeye, kxe'ltzun qma'ne kye kyja': In qo kub'sane kywitze tu'n tkub' kynajsa'ne kyil qe jlu, porke minti' ma che knet xu'j qu'ne te kye kykyaqil tuj q'oj ok tuj tnam Jabes. Ax ikx, mya kyu'ne ma che'x kyq'o'ne, kyja'tzun minti' kyile ti'j ju yol axix tok o txi kytziyane.

²³Atzun kye tiyjil Benjamín b'a'n ela tuj kywitz tu'n tb'ant kyu'n ikju, kyja'tzun, teyle junjun kye xi telq'a'n jun txin, aqeju in che b'ixuntoq, ex xi kyi'n tu'n tok te kyxu'jil. E ajtzun tuj kytx'otx' ex jaw kyb'incha'n juntl maj qe tnam ex e najan kyuj.

²⁴Ax ikx qe txqantl aj Israel e aj meltz'aj, ex teyle junjun xi' tuj tex ttx'otx', kyxol tex tiyjil ex kyxol qeju at kyxilen kyuk'il.

²⁵Tuj tq'ijlalil lu, minti'toq rey kyxol aj Israel ex teyle junjun in tb'incha'ntoq noq alkye b'a'n tuj twitz.