Read kumam Jueces 8 Bible Online

Jueces 8 - kumam bible

Jueces 8

¹Atzun kye tiyjil Efraín tzaj kyq'oj ex tzaj kyyol ti'j Gedeón tu'nju minti' otoq che tzaj ttxko'n tej t-xi' q'ojlel kyi'j aj Madián.

²Atzunte Gedeón xi ttzaq'we'n: —Kyeye mas nim ma b'ant kyu'ne ik tza'n weye ma b'ant wu'n. Aju ch'in ma b'ant kyu'ne, aqeye tiyjil Efraín, mas nim t-xilen twitz tkyaqilju ma b'ant qu'ne.

³Ate Dios ma tzaj q'onte Oreb tuj kyq'ab'e, tuk'ix Zeeb, aqeju nejenel kye aj Madián. Aju kyeye ma b'ant kyu'n, mas ma' t-xilen twitzju weye ma b'ant wu'n. Tejtzun kyb'inte qe tiyjil Efraín aju tyol Gedeón, o chewix kyk'u'j ti'j.

⁴Pontzun Gedeón ttzi nima Jordán kyuk'ix ox syent xinaq tuk'il, ex e ik'x tuj nima maske otoq che sikt wen, ex kukx e je'x lpe' kyi'j aj q'oj tu'n tkub' kyi'j kyu'n.

⁵Xitzun tma'n Gedeón kye xjal najl tuj tnam Sucot: —Kyb'inchame xtalb'il, kyq'onxe ch'in kywa qe xjal uk'in wu'ne, ex nimxix ma che sikt. Lepchqo'ke ti'j Zeba ex Zalmuna, aqeju rey kye aj Madián tu'n kytzyet qu'ne.

⁶Atzun kye nejenel kye xjal tuj tnam Sucot xi kytzaq'we'n: —¿Tza'n tten tu'n t-xi qq'o'ne kywa qe t-soldadiya? Baqa ma che tzyet Zeba tuk'ix Zalmuna kyu'ne.

⁷Atzunte Gedeón xi ttzaq'we'n: —Ok ttzaj q'o'n Zeba tuj nq'ab'e tu'n Qman, tuk'ix Zalmuna, chin ul meltz'aje kyuk'ile ex kb'ajel nluẍin kychib'jale tu'n ch'i'x ex tu'n xok ch'i'x in ch'iy tuj tzqij tx'otx'.

⁸Ik'tzun ex xi' tuj Peniel, ex xi tqanin wab'j ik tza'n otoq txi tqanin tuj Sucot. Atzun kye xjal tuj Peniel ax yol tzaj kyma'n ik tza'n otoq kyma qe xjal tuj Sucot.

⁹Xitzun tma'n Gedeón kye: —Ok wul meltz'aje tkub'lenxi kyi'j qe rey wu'ne, kb'el nxitune aju nintz ja ma' twa'l lu.

¹⁰Atzunte Zeba tuk'ix Zalmuna otoq che kanun tuj lugar Carcor tb'i, kyuk'ix qe kysoldad; b'alo olaj mil kyb'et. O'kxtzun jlu e kyaj klet kyxol txqan soldad otoq che tzaj tuj tjawitz q'ij, tu'nju otoq che b'aj kyim jun syent tuk' winqin mil.

¹¹Aju tb'e Gedeón xi ti'n tu'n tok tzoqpaj kyi'j aj Madián tuj kycampament, atzunju nno'kx ttzi'yile lugar tzqij tx'otx', kytxlaj tnam Noba ex Jogbeha tuj tjawitz q'ij. Minti'toq b'a'n kyu'n aj Madián qa kyja'toq kyok tzoqpaj qe kyajq'oj kyi'j.

¹²E je'l oq Zeba tuk'ix Zalmuna aqeju kab'e rey kye aj Madián, ex ok lpe' Gedeón kyi'j ex e tzyet tu'n, ex kykyaqil soldad tzaj nim kyxob'il ex e b'je'l oq.

¹³Tejtzun tajtz Gedeón tuj q'oj, ik' t-xol witz tuj lugar Heres tb'i,

¹⁴atzun tzyet jun ku'xun aj Sucot tu'n ex ok ten xjelil te. Tzajtzun ttz'ib'an ku'xun kyb'i 77 xjal nejenel ex qa tij xjal tuj Sucot.

¹⁵Xi'tzun Gedeón tuj Sucot ex xi tma'n kye xjal tuj tnam lu: —¿Na'npe kyu'ne tza'n tten e ok tene xmayil wi'je tu'n tlaj Zeba ex Zalmuna? ¿Ex na'npe kyu'ne tej minti' tzaj kyq'o'ne kywa qe xinaq uk'in wu'ne otoq che sikt wen, ex o kymaye qeye: Mlay txi qq'o'ne kywaye, ex baqa ma che tzyet Zeba ex Zalmuna kyu'ne? Che chiye. Atzun ja'lo lu qe lu.

¹⁶Tzajtzun ti'n Gedeón ch'i'x tuk'ix xok ch'i'x tuj tzqij tx'otx', ex atzun jlu ajb'en tu'n te k'ixb'isab'l kye qe kytijil xjal tuj tnam Sucot.

¹⁷Ax ikx kub' t-xitun aju ja ma' twa'l tuj tnam Peniel, ex e kub' tb'yo'n qe xinaq tuj tnam lu.

¹⁸Xitzun tqanin Gedeón te Zeba ex te Zalmuna: —¿Tza'n che ke'yin qe xjal e kub' kyb'yo'ne twi witz Tabor? Atzun kye tzaj kytzaq'we'n: —Ik che ke'yin ik tza'n aya. Teyle junjun kye ik che ke'yin ik tza'n tky'ajal jun rey.

¹⁹Xitzun tma'n Gedeón kyja': —Atzun qe wermaniye, tal ntxu'ye qe. Kxel nma'ne kyeye jun yol axix tok twitz Qman, noqwit minti' e kub' kyb'yo'ne qe wermaniye, ikxwitlo weye mlaywitlo che kub' nb'yo'ne.

²⁰Xi tma'n Gedeón te Jeter aju nej tky'ajal: —We'ktza ex b'yonkuya qe jlu. Ex ate Jeter ne'xtoq ta', tu'ntzunju tzaj tchi ti'j ex minti' jatz ti'n t-spad.

²¹Atzunte Zeba ex Zalmuna xi kyma'n te Gedeón: —Axa b'a'n tu'n tkub' b'yonte qeye. Aju xinaq nne'l nik'b'aj ti'j tu'n tipumal. Jawtzun we' Gedeón ex e kub' tb'yo'n, ex el ti'n qe uwj tb'anilxix kotl tkub' kyqul qe chej camey te Zeba ex te Zalmuna.

²²Atzun kye aj Israel xi kyma'n te Gedeón: —Yake ma qo kolpete tu'na tjaq' kykawb'il aj Madián, ja'lo qajb'ile aya tu'n toka te kawil qib'aje, ax ikx qe tiyjila che ul itz'j te tib'ajxi tu'n kyok te kawil qib'aje.

²³Atzunte Gedeón xi ttzaq'we'n: —Mya we qin ex mya we nk'wa'l kkawil kyib'aje. Ate Qman kkawil kyib'aje.

²⁴Noq o'kx waje txi nqanine jun ti'xti kyeye: Teyle junjun tu'n ttzaj tq'o'n jun tuj ẍkyinb'aj weye, kyxol qeju ma tz'el kyi'ne kyi'j qe xjal tuj q'oj, chi Gedeón. Aqeju tuj ẍkyinb'aj lu q'an pwaq kytx'otx'il ex in che ajb'entoq kye aj Madián, ex aj Ismael qe.

²⁵Kub'tzun kylik'un aj Israel jun xb'alun twitz tx'otx', ex teyle junjun kub' tq'o'n jun tuj ẍkyinb'aj twitz xb'alun, ex xi kyma'n te Gedeón: —Tu'n tkyaqil qk'u'je kxel qq'o'ne tuj ẍkyinb'aj teya, ex lu qe lu.

²⁶Aju talil kykyaqil tuj ẍkyinb'aj q'an pwaq ttx'otx'il, b'alo jun arrob tuk' wuqlaj libr o b'ant, ex minti' e ok qe uwj te tajlal, mi qe tal ab'j puro tb'anil ex mi qe xb'alun ẍjulin che ke'yin q'i'n kyu'n qe rey kye aj Madián, ex mi kyu qe chej camey.

²⁷Tu'nju q'an pwaq lu b'aj noj ti'j jun kapiẍay tu'n Gedeón ik tza'n ju kapiẍay in ajb'en kyu'n pal ttzi kyxu'k, ex xi tk'u'n Gedeón tuj ttanmi aju Ofra tb'i, ex kykyaqil aj Israel e je'l tzpet tu'n tlaj kapiẍay lu, ex e k'ulun twitz ex ok te jun tolsab'l te Gedeón ex kye qeju ate' tuj tja.

²⁸Kyja'tzun tten e kyaj aj Madián tjaq' kykawb'il aj Israel ex minti' ok juntl maj kyipun. Tuj tq'ijlalil tej tten Gedeón, puro tuj tzalajb'il e ten aj Israel 40 ab'q'i.

²⁹Ate Jerobaal aju ax juntl tb'i Gedeón, xi' najal tuj tja,

³⁰ex tzaj 70 tk'wa'l tu'nju ela'toq t-xu'jil at.

³¹At jun tkab' t-xu'jil Gedeón o ten tuj tnam Siquem, ax ikx o tzaj jun tky'ajal ti'j ex ok tq'o'n tb'i Abimelec.

³²Otoq tijin Gedeón wen tej tkyim, ex okx maqu'n ttxlaj tpantyón Joás aju qtzan tman, tuj tnam Ofra aju kytanmi qe tiyjil Abiezer.

³³Tejtzun tkyim Gedeón, el kypa'n kyib' aj Israel juntl maj ti'j Dios, e ok ten k'ulul kywitz nimku tilb'ilal Baal, ex jaw kysk'o'n tilb'ilal Baal-berit tu'n tok te kydios.

³⁴Ik'tzun tna'l Qman Dios kyu'n, aju otoq klonte kye tuj kyq'ab' kykyaqil aj q'oj e ten kyi'jele,

³⁵ex minti' o kyb'incha b'a'n kyi'j qe tk'wa'l Gedeón te t-xel ju b'a'n otoq tb'incha Gedeón kye.