Read kumam Jueces 9 Bible Online

Jueces 9 - kumam bible

Jueces 9

¹Ate Abimelec aju tky'ajal Jerobaal[5] xi' tuj Siquem tu'n tyolin kyuk'il qe t-xib'en ttxu', ex kyuk'il kykyaqil qeju at t-xilen tman ttxu' kyuk'il, ex xi tma'n kye kyja':

²—Kyb'inchame xtalb'il, kymanxe kye kykyaqil xjal aj Siquem kyja': ¿Alkye b'a'n tuj kywitze, b'a'npe tu'n kykawin kykyaqil qeju 70 tky'ajal Jerobaal kyib'aje, ex qa mas b'a'n tu'n tkawin junx xjal kyib'aje? Che ximane ti'j qa ax kyermaniye qine, chi Abimelec, che chikuye.

³Tu'nju at t-xilen Abimelec kyuk'il qe xjal lu, kyja'tzun o moje' kyyol tuk'il, e je'xtzun q'malte kye kykyaqil xjal aj Siquem tu'n kyok lpe' ti'j, ex b'a'n e'la tuj kywitz.

⁴Ex mya noq o'kx jlu, ax ikx etz kyi'n 70 saq pwaq tuj tja kydios Baal-berit tb'i, ex xi kyq'o'n te Abimelec. Tu'ntzunju pwaq lu, e je'x tmajna'n Abimelec junjun xjal mya b'a'n ex ky'aj qe, e je'xtzun qe xjal lu tuk'il Abimelec,

⁵e pon tuj tnam Ofra jatum otoq najan qtzan tman, ex twi' junx ab'j kub' kyb'yo'n qe 70 terman Abimelec. O'kx te Jotam aju tch'i'p Jerobaal xi tewan naj tib' ex o klet.

⁶Te tib'ajxi jlu, kykyaqil aj Siquem ex qe aj Bet-milo ok kychmon kyib' t-xe tze' k'ol, twitz ab'j xjan at tuj Siquem, ex atzun ok kyq'o'n toklen Abimelec te rey.

⁷Tejtzun tb'inte Jotam jlu, jax twi witz Gerizim ex maxtzun jaw sch'in kyuw wen tu'ntzun kyb'inte kykyaqil xjal: —Chin kyb'intze aqeye xjal aj Siquem tu'ntzun ikx kyeye tu'n kytzaj b'i'ne tu'n Dios.

⁸At jun maj o kyajb'e qe tze' tu'n tok jun kyrey, ex xi kyma'n te tze' olivo tu'n tok te kyrey.

⁹Atzunte tze' olivo xi tma'n kye: Mlay, ex qa ma chin oke te kyreye, il-lo ti'j tu'n mi'n tel chib'j aseyt wi'je aju in ajb'en te nimb'il te Dios ex kye xjal.

¹⁰Xitzun kyma'n qe tze' te tqan higo tu'n tok te kyrey.

¹¹Atzunte tqan higo xi tma'n kye: Mlay, ex qa ma chin oke te kyreye, il-lo ti'j tu'n mi'n tok nwitze aju puro chi' ex puro k'ok'j tlo'njtz.

¹²Xitzun kyma'ntl qe tze' te tqan uva tu'n tok te kyrey.

¹³Atzunte tqan uva xi tma'n kye: Mlay, ex qa ma chin oke te kyreye, il-lo ti'j tu'n mi'n tel nwitze aju nno'k te vin ex in che tzalaj xjal ti'j, ax ikx te Dios.

¹⁴Te mankb'iltzun xi kyma'n qe tze' te jun wi' ch'i'x tu'n tok te kyrey.

¹⁵Atzunte ch'i'x xi tma'n kye: Qa axix tok kyaje tu'n woke te kyreye, il ti'j tu'n kykub' tene kykyaqile tjaq' nxlekumale, ex qatzun mi'n kyaje tu'n kykub' tene tjaq' nxlekumale, k'elel jukpaj jun q'aq' wi'je tu'n kyb'aj naj qe tze' wi'ten ate' twi witz Líbano, chi ch'i'x.

¹⁶Atzun ja'lo kxel nqanine kyeye: ¿Tujpe tumel ex tz'aqlxixpe aju ma kyb'inchaye tu'nju ma tz'ok kyq'o'ne Abimelec te kyreye? ¿Ex mape kyb'inchaye b'a'n te Jerobaal ex kye qe tk'wa'l, ik tza'nx te o tb'incha b'a'n kyeye?

¹⁷Porke o q'ojin qtzan nmane ex xi tq'on tib' tu'n tkyim tu'n kykolpete tu'n tuj kyq'ab' aj Madián;

¹⁸atzun kyeye ma che ok tzoqpaje kyi'j qe terman nmane, ex twi' junx ab'j ma che kub' kyb'yo'ne qeju 70 tky'ajal, ex ma tz'ok kyq'o'ne Abimelec te kyreye, aju tal tkab' t-xu'jil, noq tu'nju at t-xilen xjal lu kyuk'ile.

¹⁹Ex kxel nma'ne kyeye ja'lo: Qa tuj tumel ex qa tz'aqlxix aju ma kyb'inchaye ti'j Jerobaal ex kyi'j qe tk'wa'l, che tzalajxtzune tuk'il Abimelec, ax ikx te Abimelec tu'n ttzalaj kyuk'ile.

²⁰Qatzun minti' ma b'ant kyu'ne ikju, e tel jukpaj jun q'aq' ti'j Abimelec, tu'ntzun kynaj kykyaqil qe xjal najl tuj Siquem kyuk'ix qe xjal najl tuj Bet-milo, ex e tel jukpaj jun q'aq' ti'j Siquem ex ti'j Bet-milo tu'n tnaj Abimelec.

²¹Tb'ajlenxitzun tma'n Jotam jlu, el oq ex xi' najal tuj lugar Beer, ex tzaj t-xob'il twitz Abimelec aju terman.

²²Ox ab'q'i e ten aj Israel tjaq' tkawb'il Abimelec,

²³ex tzaj t-sama'n Dios jun pa'j tib'il kyxol aj Siquem tuk'il Abimelec, tu'n tjaw kyi'n kyib' ti'j,

²⁴tu'ntzun tchjet tu'n Abimelec aju kykub'len tb'yo'n 70 tky'ajal Gedeón, ex tu'n tchjet kyu'n aj Siquem tu'nju e ok ten onil tuk'il Abimelec tu'n kykub' tb'yo'n qe terman.

²⁵Qe xjal aj Siquem jaw kyi'n kyib' ti'j Abimelec, kyja'tzun kub' kyq'o'n junjun xjal kywi' qe witz in xi kyewan kyib' ttxlaj b'e tu'n kyelq'an kyi'j xjal in che b'et tuj b'e. Ex o tb'i Abimelec jlu.

²⁶At jun q'ij pon Gaal aju tky'ajal Ebed najal tuj Siquem, kyuk'ix qe terman, ex ok qe' kyk'u'j aj Siquem ti'j Gaal.

²⁷Tej tpon tq'ijlalil tu'n tjaw chmet twitz uva, e je'x tuj kojb'il xilil twitz uva, el kyyatz'o'n ta'l tu'n tok te vin ex kub' kyik'sa'n jun ninq'ij, e wa'n ex e k'an tuj tja kydios, ex e ok ten yolil mya b'a'n ti'j Abimelec.

²⁸Atzunte Gaal xi tma'n: ¿Titzun toklen Abimelec tuj twitz? Baqa mya jun tky'ajal Gedeón jlu ex ate Zebul onil te. Atzun qe aj Siquem qo', ¿tza'ntzun tten tu'n qok te kymajen xjal lu? Mas b'a'n tu'n qok te tmajen Hamor aju kub' xe't tnam Siquem tu'n, ex mya a tu'n qajb'en te Abimelec.

²⁹Noqwit aqine nejenel kyeye tuj tnam lu, ja'lwitlo tz'ex nlajo'ne Abimelec, ex jakulo txi nma'ne te: Chmon b'aja qe t-soldadiya ex tzaja q'ojlel quk'ile, nchiloye.

³⁰Atzunte Zebul aju gobernador te tnam, tej tb'inte tyol Gaal, tzaj nim tq'oj,

³¹ex xi t-sama'n tqanil te Abimelec kyja': Ate Gaal aju tky'ajal Ebed o tzul tuj Siquem kyuk'ix qe terman, ex nib'an tb'aj tconsejarin kyk'u'j xjal tu'n tjaw kyi'n kyib' ti'ja.

³²Kyja'tzun, b'a'n tu'n ttzaja te qonik'an kyuk'ix qe t-soldadiya, ex kyewanx kyib'e tuj kojb'il.

³³Oktzun qsqix ex ok tqoptz'aj q'ij, b'ixtzun che ok tzoqpaje kyi'j qe xjal tuj tnam, ex oktzun tetz Gaal kyuk'ix txqantl xjal tu'n kyq'ojin ti'ja, b'ixtzun tb'inchaya ti'j Gaal noq alkye b'a'n tuj twitza, chi tqanil xi t-sama'n Zebul te Abimelec.

³⁴Kyja'tzun ate Abimelec kyuk'ix kykyaqil qe t-soldad, e tzaj te qonik'an ex xi kyewan kyib' ti'jele tnam Siquem. Te kyaje k'loj e ela kyb'aj.

³⁵Tejtzun tetz Gaal ttzi tlamel tnam, etz Abimelec kyuk'ix qe t-soldad jatum kyewantoq kyib'.

³⁶Tejtzun tlonte Gaal qe t-soldad Abimelec, xi tma'n te Zebul: —Ke'yinxa, lu txqan xjal kyja' kyku'tz kywi witz. Xi ttzaq'we'n Zebul kyja': —Noq t-xlekumal witz jlu ex mer ik tza'n xjal nne'la tuj twitza.

³⁷Atzunte Gaal xi tma'ntl: —Ax ikx ma twi' tal witz aju tok tb'i Tmux Tx'otx', lu txqan soldad kyja' kyku'tz. Ex lu juntl k'loj kyja' kytzaj tuj b'e nnik' t-xe k'ol kye aj q'ij.

³⁸Xitzun tma'n Zebul: —¿Ti ma tzaj ti'ja? Aya o q'mante qa ate Abimelec minti' toklen qi'j tu'n qok te tmajen. Lu qe t-soldad lu aqeju mya nim in che ela tuj twitza. Wab'an kub' tib'a ja'lo tu'n tq'ojina kyi'j.

³⁹Kub'tzun nej Gaal kywitz aj Siquem tu'n tq'ojin ti'j Abimelec,

⁴⁰ex el oq Gaal twitz Abimelec ex xi lpe' Abimelec ti'j; nim xjal e kub' tejxi kypon ttzi tlamel tnam.

⁴¹Ax kyaj ten Abimelec tuj lugar Aruma, atzunte Gaal kyuk'ix qe terman e je'tz tlajo'n Zebul tuj Siquem.

⁴²Tujtzun juntl q'ij e je'x aj Siquem tuj kojb'il. Tej tb'inte Abimelec jlu,

⁴³e kub' tpa'n qe t-soldad te ox k'loj ex xi kyewan kyib' tuj kojb'il. Tejtzun tke'yinte Abimelec tej kyetz aj Siquem tuj tnam, e je'tztzun Abimelec jatum kyewan kyib' ex e ok tzoqpaj kyi'j aj Siquem.

⁴⁴Ate Abimelec tuk'ix jun k'loj soldad uk'in tu'n, e je'x t'ikpaj naj tu'n kykub' ten ttzi tlamel tnam, atzun qe kab'etl k'loj soldad e ok tzoqpaj tu'n tkub' kyb'yo'n qe xjal in che b'et tuj kojb'il.

⁴⁵Ate Abimelec kukxtoq tq'ojin kyi'j aj Siquem tuj enter q'ij, ex kub' ti'j tnam tu'n. B'i'x b'aj naj tnam tu'n, e kub' tb'yo'n kykyaqil xjal najl tuj, ex xi tchitun atz'an tuj enter tnam.

⁴⁶Qe xjal ate' tuj ja ma' twa'l te kykolb'il kyib' at tuj Siquem, tej kyb'inte aju otoq tb'incha Abimelec, e je'x klolte kyib' tuj tja kydios El-berit tb'i.

⁴⁷Tejtzun tb'inte Abimelec qa otoq pon kychmon kyib' kykyaqil xjal tuj ja lu,

⁴⁸xi'tzun twi witz Salmón kyuk'ix kykyaqil qe t-soldad, ex ku'tz ttx'emin jun tq'ab' tze' tu'n jun siwb'il k'uxb'il, jax tq'o'n tq'ab' tze' lu twi t-semil, ex xi tma'n kye kykyaqil t-soldad tu'n kyb'inchante jurat naj ik tza'n te otoq tb'incha.

⁴⁹Kykyaqiltzun qe t-soldad ku'tz kytx'emin jun tq'ab' kytze' ex e ok lpe' ti'j. Tejtzun kypon jatum ta' tja kydios xjal aju ma' twa'l, ok kyb'uyb'a'n kykyaqil tq'ab' tze' ti'j ja ex ok kyqoptz'i'n q'aq' ti'j. Tu'nju q'aq' lu e b'aj naj kykyaqil xjal aj Migdal-siquem, ex aju tajlal xjal e naj, aqeju ate' tuj ja ma' twa'l te kykolb'il kyib' at tuj Siquem, b'alo jun mil kyb'et; at xinaq ex xu'j.

⁵⁰Te tib'ajxi jlu, xi' Abimelec tuj tnam Tebes, ok tzoqpaj ti'j ex kub' ti'j tnam tu'n.

⁵¹Tuj tmij tnam lu tkub' jun ja ma' twa'l, ex tujtzun ja lu okx kyewan kyib' kykyaqil qe xjal najl tuj tnam, qe xinaq ex qe xu'j. Kyaj kylamo'n ttzi ja wen ex e jax max twi ja,

⁵²ex pon Abimelec max ttzi tlamel ja ma' twa'l tu'n tok tzoqpaj kyi'j xjal. Kyja'toq tok tqoptz'i'n q'aq' ti'j ja,

⁵³ku'tz xo'n jun kya' tu'n jun xu'j, ex tib'ajku twi' Abimelec kub'il tz'aq kya' ex b'i'x el k'ab'chaj twi' tu'n.

⁵⁴Tzajtzun ttxko'n naj Abimelec aju onil te tuj q'oj ex xi tma'n te: Q'in jatz t-spadiya ex chin tb'yonkuya, ex mi'n waje tu'n kymante xjal wi'je qa tu'n jun xu'j otoq chin kub' b'yo'ne, chi Abimelec. Atzunte ju onil te jatz ti'n t-spad, aq'pon t-xayu'n ti'j ex b'i'x elpun ma ti'jxi; kyja'tzun tten kyim Abimelec.

⁵⁵Tejtzun kyke'yinte aj Israel ya otoq kyim Abimelec, e aj kyja.

⁵⁶Kyja'tzun tenb'a tu'n Dios tu'n t-xelin ti'j Abimelec aju mya b'a'n otoq b'ant tu'n ti'j tman, tu'nju e kub' tb'yo'n 70 terman aqeju ax tky'ajal tman.

⁵⁷Ax ikx o tb'incha Dios kyi'j aj Siquem tu'n tchjet tkyaqil mya b'a'n kyu'n, aju otoq kyb'incha. Kyja'tzun tten o japun castiw o tma Jotam aju tky'ajal Jerobaal.