Read kumam 2 Juan 1 Bible Online

2 Juan 1 - kumam bible

2 Juan 1

¹Aqine anciano, in xi ntz'ib'ane teya erman xu'j, kyuk'ix qe tala sk'o'maj tu'n Dios; ax tok k'ujla'n qeye wu'ne, ex mya noq o'kx wu'ne, ax ikx kyu'n kykyaqil qeju ojtzqi'n ju yol axix tok kyu'n.

²K'ujla'n qeye wu'ne tu'n tlaj ju yol axix tok at tuj qanmi ex ax ktel quk'il te jumajx.

³Ktzajel q'o'n xtalb'il kyeye tu'n Qman Dios ex tu'n Jesucrist aju Tk'wa'l, ex ktzajel q'aq'an kyk'u'j kyi'je, ex tu'n tqe'xix kyk'u'je, tu'nju ma che ok lpe'ye ti'j ju yol axix tok ex at kyk'ujlalile.

⁴Nimxix ma chin tzalaje tu'nju ma wile junjun tala in che ok lpe' ti'j ju yol axix tok, ik tza'nx ju mandamyent tzaj tma'n Qman Dios qe.

⁵Ja'lotzun chin kub'sale twitza erman xu'j, tu'n qk'ujlante qib' qxolx. Mya jun ak'aj mandamyent in xi ntz'ib'ane teya, noq o'kx aju mandamyent at quk'il atxix t-xe tnejel.

⁶Qa k'ujla'n Dios qu'n, che japunel qe tmandamyent qu'n. Axtzun tmandamyent jlu ik tza'n o kyb'iye atxix t-xe tnejel, tu'n tten kyk'ujlalile.

⁷Porke nimku in che b'et tuj tkyaqil twitz tx'otx', in kyma'n qa mya ax tok xjal te Jesucrist tej tul tzalu twitz tx'otx'. Aqeju in che q'mante jlu sb'ul qe ex aj q'oj qe ti'j Crist.

⁸Ten kykwente kyi'je tu'n mi'n tnaj twitz kyaq'unb'ene, noq o'kx tz'ok tililx kyu'ne tu'n kyk'monteye jun twi kyk'u'je tz'aqlxix.

⁹Qa at jun xjal nne'l txalpuj ex minti' in kyaj ten tuj t-xnaq'tzb'il Crist, minti' Dios tuk'il; atzun teju ma kyaj ten tuj t-xnaq'tzb'il Crist, atzunju at Qman Dios tuk'il ex at Tk'wa'l Dios tuk'il.

¹⁰Qa at jun xjal ma pon kyuk'ile ex mya a xnaq'tzb'il lu in tma'n, mi'n tz'okx kyk'mo'ne tuj kyjaye ex mi'n txi kyq'olb'e'ne;

¹¹ex alkyeju ma txi q'olb'en te, at toklen ti'j ju tb'inchb'en xjal mya b'a'n lu.

¹²At nimku tu'n t-xi nma'ne kyeye, pero mi'n wajb'ile tu'n t-xi ntz'ib'ane tuj u'j ex tu'n tint; porke ximan wu'ne tu'n nxi'ye kyuk'ile ex tu'n nyoline kyuk'ile ex tu'n tok qke'yin qwitz, tu'ntzun qtzalaj nimxix.

¹³In xi q'olb'e'na kyu'n qe tal termaniya aju sk'o'maj tu'n Dios. Ikxwitju.