Read kumam 3 Juan 1 Bible Online

3 Juan 1 - kumam bible

3 Juan 1

¹Aqine anciano in xi ntz'ib'ane teya Gayo, axix tok at nk'u'je ti'ja.

²In chin kub'sane twitz Dios ti'ja erman, aya at nk'u'je ti'ja, kuchiwt tu'n tel b'a'n teya tuj tkyaqil ex tu'n ttena tuj txub'txaj ik tza'n tanmiya b'a'n ta'.

³Porke nimxix in tzalaje tej kyul junjun erman ex tzaj kytx'olb'a'n ti'ja, kyma qa in japunxix tu'na tuj tkyaqil, tu'nju kukx tok lpe'ya ti'j ju yol axix tok.

⁴Atzun mas in chin tzalaje ti'j jlu, ok nb'inteye qa o'kx in che ok lpe' qe nk'wa'le ti'j ju yol axix tok.

⁵Erman, at nk'u'je ti'ja, b'a'nxix in tb'incha'na ok in ajb'ena kye erman, maske minti' ojtzqi'n kywitz tu'na.

⁶Tej kyul tzalu tzaj kyma'n kywitz qe okslal ti'j ju tk'ujlalila kyi'j. B'a'nxix in tb'incha'na qa ma txi tq'o'na ch'in onb'il kye tuj kyb'e, porke in che ajb'en te Dios.

⁷Porke ma che ex tuj kyb'e noq tu'nju at kyk'ujlalil ti'j Crist, ex minti' ch'in onb'il o kyk'am kye xjal mya okslal qe.

⁸Kyja'tzun, ilxix ti'j tu'n kyk'monjtz qe jlu qu'n ex tu'n t-xi qq'o'n ch'in onb'il kye, tu'ntzun qaq'nan junx kyuk'il tu'n tpakb'anjtz ju yol axix tok.

⁹Xi ntz'ib'ane jun u'j kye okslal, pero ate Diótrefes taj tu'n tok te nejenel kyxol, ex minti' in xi tniman qyole.

¹⁰Kyja'tzun, qa ma chinxe tu'n npone kyuk'ile, kxel nma'ne te aju mya b'a'n in tb'incha'n, in yolin tok tu'n yol mya b'a'n qi'je ex in si'min yol qi'je. Ex mya conporm in kyaj tu'n jlu, ax ikx minti' in che tk'mo'n qe erman in che pon, ex minti' in tq'o'n amb'il kye txqantl okslal aqeju kyajb'il tu'n kyk'monjtz erman kyu'n, ex in che etz tlajo'n kyxol qe okslal.

¹¹Aya erman at nk'u'je ti'ja, mi'n tz'ok lpe'ya ti'j ju mya b'a'n, noq o'kx ti'j ju b'a'n. Aju xjal in tb'incha'n b'a'n, te Dios te; pero aju xjal in tb'incha'n mya b'a'n, minti' ojtzqi'n Dios tu'n.

¹²Kykyaqil xjal in che yolin b'a'n ti'j Demetrio, ax ikx aju tb'inchb'en in tyek'un qa b'a'n tmod, ax ikx qeye in qo yoline ax tok ti'j, ex b'a'n tu'na aju qyole axix tok.

¹³Nimku at tu'n t-xi nma'ne teya, pero mi'n wajb'ile tu'n t-xi ntz'ib'ane tu'n tint ex tu'n plum;

¹⁴porke ximan wu'ne mya yajxi tu'n npone ke'yil teya; oktzun qo yolil ex k'okel qke'yin qwitz.

¹⁵Kuchiwt tu'n ttena tuj txub'txaj. In xi q'olb'e'na kyu'n qe amiw. Q'onxa nq'olb'eb'le kye teyle junjun qamiw.