Read kumam Apocalipsis 1 Bible Online

Apocalipsis 1 - kumam bible

Apocalipsis 1

¹Aju tz'ib'an tuj u'j lu, atzunju tzaj tchik'b'a'n Jesucrist. Tkyaqil jlu tzaj tma'n Dios te tu'n t-xi tchik'b'a'n kye tmajen tkyaqilju at tu'n tul naj. Ex tzaj t-sama'n Jesucrist t-anjel, ex tu'nju anjel tzaj tchik'b'a'n weye, aqine Juan, tmajen Dios qine.

²Ma txi nchik'b'a'ne tkyaqilju ma wile, ex ma chin oke testiw ti'j tyol Dios ex ti'j ju yol axix tok tzaj tchik'b'a'n Jesucrist.

³At tzalajb'il kye xjal in che sch'in kyi'j qe yol tuj tu'jil lu, ex at tzalajb'il kye qeju in che b'in ti'j tyol Dios ex in japun kyu'n aju tz'ib'an tuj; porke aju tq'ijlalil in laqe'x ttzaj.

⁴Aqine Juan in xi ntz'ib'ane kyeye, okslal qeye ate'ye kyuj wuq tnam tuj tx'otx' Asia: Tzajwit q'o'n xtalb'il kyeye ex tu'n tqe'xix kyk'u'je tu'n Dios aju at ja'lo ex at ojtxi ex tzul, ex kyu'n qe wuq Xewb'aj ate' twitz tq'uqb'il jatum in kawin,

⁵ex tu'n Jesucrist aju testiw axix tok tyol, ex aju tnejel jatz anq'in kyxol kyimni, ex ate kawil kyib'aj rey ate' twitz tx'otx'. Ate Crist k'ujlal qe, ex ma qo tzoqpet tu'n tuj qil tu'nju tchk'el,

⁶ex ma qo ok tq'o'n te rey ex ma qo ok te pal tu'n qajb'en te Dios aju Tman. O'kxwit te tu'n tnimanjtz ex tu'n tkawin tuj tkyaqil tab'q'iyil te jumajx. Ikxwitju.

⁷Lu tzul Crist tuj muj. Kykyaqil xjal ok kyila', ax ikx qeju e ok xayunte te ok kyila'; ex kykyaqil tnam twitz tx'otx' che oq'el tu'n kyxob'il tu'n tlaj. Kb'antel ikju. Ikxwitju.

⁸Aqine atine t-xe tnejel ex kukx chin tele ok tjapun b'aj mankb'il tq'ijlalil, ik tza'n ju letr A ex Z, chi Qman Dios aju at ja'lo, ex at ojtxi, ex tzul, ex at tipumal tu'n tb'ant tkyaqil tu'n.

⁹Aqine Juan kyermaniye, ex ax yajb'il nnik'x wu'ne ik tza'n kyeye nnik'x kyu'ne, ex junx qoklen kyuk'ile tuj tkawb'il Dios, ex at qpasens tu'n tik'x qu'n tu'n tipumal Jesucrist. Presintoq qine tuj ju tal tx'otx' tmijil mar Patmos tb'i. Presintoq qine tu'n tlaj in xi npakb'a'ne tyol Dios ex tu'n tlaj in xi nchik'b'a'ne aju yol ti'j Jesucrist.

¹⁰Tuj tq'ij Qajaw kub' ten tipumal Xewb'aj Xjan wib'aje, ex o nb'iye jun tq'ajq'ajel ma'xix wi'jxiye, ik tza'n tq'ajq'ajel chun,

¹¹in tma'n: [—Aqine atine t-xe tnejel ex kukx chin tele ok tjapun b'aj mankb'il tq'ijlalil, ik tza'n ju letr A ex Z.] Aju k'okel tke'yina, tz'ib'an ku'xa tuj jun libro, ex samanxa kye okslal ate' tuj wuq tnam tuj tx'otx' Asia: Tuj Efeso, tuj Esmirna, tuj Pérgamo, tuj Tiatira, tuj Sardis, tuj Filadelfia, ex tuj Laodicea, chi weye.

¹²Ajtzun nke'yine tu'n nlonteye alkyeju in yolintoq wuk'ile; ex tej taj nke'yine, o wile wuq kandil q'an pwaq kytx'otx'il,

¹³ex kyxol qe wuq kandil, o wile jun ik ke'yin ik tza'n jun xinaq tok t-xb'alun ẍjo'w, ex tok jun k'alb'il ttzi t-xu'k, q'an pwaq ttx'otx'il.

¹⁴Aju twi' ex ju ttzmal twi' saq ke'yin ik tza'n saq lan, puro saq ik tza'n ttxa che'w; qe tb'aq' twitz in che qoptz'aj ik tza'n tqan q'aq'.

¹⁵Ex qe tqan in che qoptz'aj ik tza'n q'an k'uxb'il in qoptz'aj tokx tuj q'aq'; ex ju tq'ajq'ajel twi' ik tza'n tq'ajq'ajel nimku a' in jululun.

¹⁶Ex tkub' wuq che'w tuj tb'anq'ab', ex nne'tz jun spad tuj ttzi', b'anin ttzi' wen te kykab'il pak'; ex ik ke'yin twitz ik tza'n t-spik'umal q'ij in qoptz'ajxix wen.

¹⁷Tej nlonteye, in kub' tz'aqe t-xe tqan, ik tza'n kyimni in oke. Atzun te kub' tq'o'n tb'anq'ab' wib'aje, ex tma weye: —Mi'n xob'a; aqine tnejel ex mankb'il,

¹⁸ex itz' qine; in kyime, pero ja'lo itz' qine te jumajx; ex tuj nq'ab'e ate' qe tal ja te kamik ex te kynajb'il kyimni.

¹⁹Tz'ib'an ku'xtzuna tkyaqilju ma tila, kyuk'ix qeju ate' ja'lo ex qeju ok tila'ya yajxi.

²⁰Aqeju wuq che'w ma tila tuj nb'anq'ab'e ex qeju wuq kandil q'an pwaq kytx'otx'il, atzun kyxilen jlu: Qeju wuq che'w, atzun qe anjel ate' kyxol okslal kyuj wuq tnam, ex qeju wuq kandil, atzun qe okslal ate' kyuj wuq tnam.