Read kumam Apocalipsis 10 Bible Online

Apocalipsis 10 - kumam bible

Apocalipsis 10

¹Ex o wile juntl anjel nim tipumal ku'tz tuj kya'j, tokx tuj muj, tjax t-xmakal lob'aj tuj twi'. Atzun twitz anjel ik ke'yin ik tza'n q'ij, atzun qe tqan ik tza'n tqan q'aq' ma' tk'itz.

²Tzyu'n jun tal u'j tu'n, jaqo'maj, ex aju tqan tuj tb'anq'ab' kub' tq'o'n tib'aj mar; atzun juntl tqan tuj tnayaj kub' tq'o'n twitz tx'otx'.

³Jawtzun tq'ajq'ajel twi' kyuwxix ik tza'n in tzanun jun b'alun; ex tej tjaw sch'in, e q'ajt wuq q'ankyoq.

⁴Tejtzun kyb'aj q'ajt qe wuq q'ankyoq, kyja'toq tkub' ntz'ib'ane jlu; ex o nb'iye jun tq'ajq'ajel tzaj tuj kya'j, tzaj tma'n weye kyja': —Aju ma kyma wuq q'ankyoq, mi'n tz'el tqanil tu'na, ex mi'n kub' ttz'ib'ana.

⁵Ex aju anjel aju o wile wa'l tib'aj mar ex tib'aj tx'otx' jaw tq'o'n tb'anq'ab' twitz kya'j,

⁶ex xi tma'n jun yol axix tok twitz Dios aju itz' tuj tkyaqil tab'q'iyil te jumajx, aju o b'inchante kya'j tuk'ix tkyaqilju at twitz, ex o b'inchante tx'otx' tuk'ix tkyaqilju at twitz, ex o b'inchante mar tuk'ix tkyaqilju at tuj. Ex tma anjel: —Mlay txi laq'e' txqantl tuj tq'ijlalil;

⁷porke tuj tq'ijlalil ok tok q'ajtza'n chun tu'n twuqin anjel, kjapuneltzun aju yol ewantoq tu'n Dios nej, ik tza'n o tma kye t-sanjel aqeju tmajen.

⁸Ex aju tq'ajq'ajel o nb'iye tzaj tuj kya'j, tzaj yolin juntl maj wuk'ile, ex tzaj tma'n kyja': —Txi'ya, ex k'montza aju tal u'j katl, aju tzyu'n tu'n anjel aju wa'l tib'aj mar ex tib'aj tx'otx'.

⁹Inxtzune tuk'il anjel, xi nma'ne te tu'n ttzaj tq'o'n ju tal u'j weye. Atzun te tzaj tma'n weye: —Tzyuma ex wa'nxa; chi' k'okel tuj ttzi'ya ik tza'n ta'l kab', atzun tuj tk'u'ja, k'a k'okel.

¹⁰Tzajtzun ntzyu'ne aju tal u'j tuj tq'ab' anjel ex xi nwa'ne; puro chi' ok tuj ntzi'ye ik tza'n ta'l kab', ex tej tb'aj nwa'ne, puro k'a ok tuj nk'u'je.

¹¹Tzajtzun tma'n weye kyja': —Ilxix ti'j tu'n t-xi tpakb'a'na juntl maj aju ktzajel tma'n Dios teya, ex tu'n tyolina kyi'j nimku tnam ex kyi'j nimku nasyon ex kyi'j nimku k'loj xjal junxilchaq kyyol, ex kyi'j nimku rey.