Read kumam Apocalipsis 12 Bible Online

Apocalipsis 12 - kumam bible

Apocalipsis 12

¹Ex tzaj yek'un jun techal ma'xix tuj kya'j: at jun xu'j tok q'ij ti'j ik tza'n jun xb'alun, ex tkub' xjaw tjaq' tqan; ex tjax jun coron tuj twi' tok kab'laj che'w ti'j coron.

²Ex otoq tz'ok ten tal xu'j ex in sch'in tu'n ta'w, ch'ixtoq tul tal ex nno'k tuj k'ixk'oj tu'n tul itz'j tal.

³Ax ikx tzaj yek'un juntl techal tuj kya'j: At jun jil ma'xix, dragón tb'i, kyaq ti'j, at wuq twi' ex laj tcach, ex tjax junjun coron tuj junjun twi'.

⁴Ex tu'n tje' dragón tzaj tjak'u'n toxin tnej che'w ate' tuj kya'j ex e ku'tz t-xo'n twitz tx'otx'. Atzun te jil dragón kub' we' twitz xu'j aju ch'ixtoq tul itz'j tal, tu'ntzun t-xi tchyo'n naj tal xu'j ok tul itz'j,

⁵ex xinaq jun tal xu'j ul itz'j, ex ate kkawil kyib'aj kykyaqil nasyon tu'n var k'uxb'il; jawtzun jub'cha'n ju tal xu'j, ex xi q'i'n tuk'il Dios jatum ta' tq'uqb'il.

⁶Atzunte xu'j el oq, xi' tuj lugar minti' kynajb'il xjal tuj, atzun ta' jun tnajb'il xu'j b'anin tu'n Dios, ex atzun tu'n tk'a'chanjtz tuj jun mil tuk'il 260 q'ij.

⁷Tb'ajlenxi jlu ok jun q'oj ma'xix tuj kya'j; ate Miguel kyuk'ix qe t-anjel e q'ojin ti'j ju jil dragón; ax ikx ju jil dragón kyuk'ix qe t-anjel e q'ojin.

⁸Ex minti' e xkye' ti'j Miguel; ex minti'tl tumel tu'n kyten tuj kya'j.

⁹Kyja'tzun etz xo'n ju nintz jil dragón, aju ojtxi lob'aj, aju tok tb'i tajaw il ex Satanás, aju in sb'un kyi'j kykyaqil xjal twitz tx'otx'; ku'tz xo'n twitz tx'otx', ex kyuk'ix qe t-anjel e ku'tz xo'n tuk'il.

¹⁰Xitzun nb'i'ne jun tq'ajq'ajel kyuwxix tuj kya'j, in tma'n: —Ja'lo ma tzul aju kolb'il tu'n Qdios, tuk'ix tipumal ex tkawb'il, ex ma pon tq'ijlalil tu'n tkawin Crist aju at toklen tu'n Dios; porke ma tz'ex xo'n tajaw il aju in si'min yol kyi'j qerman, aju in si'min yol kyi'j twitz Qdios q'ijl ex qonik'an.

¹¹Ex ma kub' ti'j tajaw il kyu'n, noq tu'nju tchk'el Tal Ẍne'l, ex tu'nju yol ax tok xi kychik'b'a'n; porke minti' kub' kyximan qa ma'xix toklen kychwinqlal, noq o'kx kyq'on kyib' tu'n kykyim.

¹²Tu'ntzun jlu tzalajxa kya'j, ex che tzalajxe aqeye najl qeye tuj kya'j. Ex b'ek'b'il kywitze aqeye najl twitz tx'otx' ex tuj mar. Porke ma ku'pun tajaw il kyxole tuk'il nim tq'oj, porke b'a'n tu'n mya nim q'ij tu'n ttentl.

¹³Tejtzun tna'nte jil dragón qa otoq ku'tz xo'n twitz tx'otx', ok ten q'ojlel ti'j xu'j, aju xinaq tal otoq tzul itz'j.

¹⁴Atzunte xu'j xi q'o'n kab'e t-xik', aju t-xik' nintz t'iw, tu'ntzun tel oq twitz lob'aj tu'n tpon lipan tuj lugar minti' kynajb'il xjal tuj, ex tu'n tpon tuj tlugar jatum tu'n tk'a'chanjtz ox ab'q'i tuk'il mey.

¹⁵Atzunte lob'aj jatz a' tuj tqul ik tza'n jun nima, xi ttilin ti'j xu'j tu'n t-xi iqan xu'j tu'n a'.

¹⁶Pero ate tx'otx' onin ti'j xu'j, ex xi k'ab'chaj tx'otx', ex xi tk'a'n tx'otx' a' aju jatz tuj tqul jil dragón.

¹⁷Tzajtzun nimxix tq'oj jil dragón ti'j xu'j, ex xi' q'ojlel kyi'j ch'intl tiyjil xu'j, aqeju in japun tmandamyent Dios kyu'n ex kukx in xi kychik'b'a'n ax tok ti'j Jesucrist.