Read kumam Apocalipsis 13 Bible Online

Apocalipsis 13 - kumam bible

Apocalipsis 13

¹Ex in kub' we'ye tib'aj ttxa tza'n ttzi mar, ex o wile jatz jun txkup tuj mar at wuq twi' ex laj tcach, ex tjax junjun coron twi' junjun tcach, ex tz'ib'an tb'i txkup ti'j junjun twi', te yasb'il ti'j Dios.

²Aju txkup o wile ik ke'yin ik tza'n tigre, qe tqan ik che ke'yin ik tza'n tqan jun jil oso, atzun ttzi' ik ke'yin ik tza'n ttzi b'alun. Ex xi tq'o'n jil dragón tipumal txkup ex tu'n tkawin ex tu'n tten nim toklen.

³Ex o wile jun twi' txkup otoq k'ixb'i mer ik tza'n otoq kyim; ex aju tk'ixb'len o b'anix, ex kykyaqil xjal twitz tx'otx' e lab'in ti'j txkup, ex e ok lpe' ti'j.

⁴Ex e k'ulun twitz ju jil dragón, aju xi q'onte toklen txkup, ex e k'ulun twitz txkup, ex kyma: —¿Alkye jun jaku pon ik tza'n te txkup lu, ex alkye jun jaku q'ojin tuk'il? Che chi.

⁵Ex xi q'o'n amb'il te txkup tu'n tyolin nimku yol te tnimb'il tib' ex tu'n tyasun ti'j Dios; ex xi q'o'n toklen tu'n tkawin tuj 42 xjaw.

⁶Ex ok ten yolil tu'n tyasun ti'j Dios ex tu'n tyasun ti'j tb'i Dios ex ti'j ju ja xb'alun te nab'l Dios, ex kyi'j qeju najl qe tuj kya'j.

⁷Ex xi q'o'n amb'il te tu'n tq'ojin kyi'j okslal ex tu'n tkub' kyi'j tu'n. Ax ikx xi q'o'n toklen tu'n tkawin kyib'aj kykyaqil kyiyjil xjal, ex kykyaqil tnam, ex kykyaqil k'loj xjal junxilchaq kyyol, ex kykyaqil nasyon.

⁸Ex kykyaqil xjal twitz tx'otx' e k'ulun twitz txkup, aqeju mya tz'ib'an kyb'i tuj tu'jil chwinqlal atxix tb'antlen twitz tx'otx'; aju tu'jil chwinqlal lu te Tal Ẍne'l aju kub' b'yo'n.

⁹Qa at jun at t-ẍkyin, b'inx ju yol lu.

¹⁰Aqeju b'anin kyi'j tu'n kyxi q'i'n pres, che xel q'i'n pres; ex aqeju b'anin kyi'j tu'n kykub' b'yo'n tu'n spad, che b'el byo'n tu'n spad. Kyja'tzun il ti'j tu'n tten kypasens okslal ex tu'n tqe' kyk'u'j ti'j Dios.

¹¹Ex tb'ajlenxi jlu o wile juntl txkup tzaj twitz tx'otx'; at kab'e tcach ik tza'n tcach jun tal ẍne'l, ex o yolin ik tza'n jil dragón.

¹²Ex junx ta' toklen ik tza'n toklen tnejel txkup, ex in kawin ttxlaj tnejel txkup, nno'k tq'o'n tilil kyi'j xjal najl qe twitz tx'otx' tu'n kyk'ulun twitz tnejel txkup, aju ch'ixtoq tkyim nej tu'n k'ixb'len, ex o b'anix.

¹³In tb'incha'n qe techal ma'xix kyxilen; ax ikx in ku'tz q'aq' tu'n twitz kya'j in kub'il twitz tx'otx' kywitz xjal.

¹⁴Ex in sb'un kyi'j xjal najl twitz tx'otx', porke o tzaj q'o'n tipumal tu'n tb'inchante qe techal twitz tnejel txkup, ex xi tma'n kye xjal najl twitz tx'otx' tu'n kyb'inchante jun tilb'ilal txkup, aju otoq k'ixb'isanjtz tu'n spad ex anq'intl.

¹⁵Ex xi q'o'n tipumal tkab'in txkup tu'n tokx tq'o'n t-xew tuj tilb'ilal tnejel txkup, tu'n tb'ant tyolin ju tilb'ilal ex tu'n kykub' b'yo'n xjal tu'n, aqeju minti' in che k'ulun twitz.

¹⁶Ex xi tq'o'n txkup orden kye kykyaqil xjal tu'n tok jun techal ti'j kyb'anq'ab' ex qa tib'aj kywitz, tza'nx qeju ch'in kyoklen ikx qeju ma' kyoklen, qe q'inun ex qe meb'a xjal, qe xjal tzoqpi'n qe ex qe majen tzyu'n.

¹⁷Ex tma txkup tu'n mi'n kyloq'on xjal ex tu'n mi'n kyk'ayin qa minti' techal txkup tok kyi'j ex qa tb'i ex qa tajlal tb'i.

¹⁸A jlu taj nim nab'l tu'n tel qnik' ti'j. Alkye at tnab'l, ximanx ti'j alkye tajlal in ajb'en tu'n txkup, ex ax tajlal in ajb'en ti'j tb'i jun xjal. Ex atzun tajlal jlu, 666.