Read kumam Apocalipsis 15 Bible Online

Apocalipsis 15 - kumam bible

Apocalipsis 15

¹Ex o wile juntl techal ma'xix tuj kya'j, in lab'ine ti'j: At wuq anjel q'i'n wuq k'ixb'isab'l kyu'n, atzun mankb'il k'ixb'isab'l jlu, porke o'kxtzun kjapunel b'aj tq'oj Dios.

²Ex at juntl o wile ik ke'yin ik tza'n mar, ik ke'yin ik tza'n vidr t-sem tib' tuk'il q'aq'; ex o wile aqeju otoq kub' ti'j txkup kyu'n ex ti'j ju tilb'ilal, ex ti'j ju tajlal tb'i, wa'l qe ttzi' mar ik ke'yin ik tza'n vidr, tzyu'n chnab' arpa kyu'n, aju tzaj tq'o'n Dios kye.

³Ex in che b'itzan tb'itz Moisés aju tmajen Dios, ex tb'itz Tal Ẍne'l, in kyma'n: Ma'xix qe tb'inchb'ena ex in qo lab'ine kyi'j, aya Qman Dios at tipumala tu'n tb'ant tkyaqil tu'na; tz'aqlxix qe t-ximb'etza ex axix tok, aya Rey kyib'aj kykyaqil nasyon.

⁴Kykyaqil xjal che xob'el twitza, ex kjawil kynimsa'n tb'iya, aya Qman. Porke o'kx aya xjan; kyja'tzun kykyaqil nasyon che tzajel tu'n kyk'ulun twitza, porke tuj tumelxix aju sentens ma kub' tq'o'na, che chi.

⁵Tb'ajlenxitzun jlu, o wile jaqet ttzi tja Dios tuj kya'j, aju ja xb'alun te nab'l Dios, jatum k'u'n qe tz'lom ab'j tz'ib'an tley Dios kywitz.

⁶Ex e je'tz wuq anjel tuj tja Dios, aqeju q'i'n wuq k'ixb'isab'l kyu'n, tok kyxb'alun saq wen ex in qoptz'aj, b'inchamaj ti'j noq' lino, ex tok k'alb'il ttzi kyxu'k q'an pwaq ttx'otx'il.

⁷Ex at jun kyxol qeju kyaje querubín xi tq'o'n wuq laq q'an pwaq kytx'otx'il kye qeju wuq anjel, nojni qe laq lu tu'n castiw ktzajel tq'o'n Dios kyib'aj xjal, aju Dios itz' tuj tkyaqil tab'q'iyil te jumajx.

⁸Ex o noj tja Dios tu'n t-sib'el t-spik'umal Dios ex tipumal; ex mi a'l jun xjal tu'n tokx tuj tja Dios, maxitzun tu'n tokx ok tjapun b'aj aju wuq k'ixb'isab'l kyu'n wuq anjel.