Read kumam Apocalipsis 16 Bible Online

Apocalipsis 16 - kumam bible

Apocalipsis 16

¹Ex o nb'iye jun tq'ajq'ajel wib'aj kyuwxix etz q'ajt tuj tja Dios, ex xi tma'n kye qeju wuq anjel: —Kyxi'ye ex kyqonxe twitz tx'otx' aju tku'x tuj wuq laq, aju castiw in tzaj tq'o'n Dios.

²Xi'tzun tnejel anjel, ex xi tqo'n twitz tx'otx' aju tku'x tuj tlaq. Ex e jawil tx'a'k plojxix ex nim ta'w kyi'j qe xjal, aqeju tok techal txkup kyi'j, ex in che k'ulun twitz ju tilb'ilal txkup.

³Atzunju tkab'in anjel xi tqo'n tib'aj mar aju tku'x tuj tlaq, ex ok mar te chik' ik tza'n tchk'el jun xjal b'yo'n in kub', ex e b'aj kyim kykyaqil qeju najl qe tuj mar.

⁴Atzunju toxin anjel xi tqo'n aju tku'x tuj tlaq, xi tqo'n kyib'aj qe a' ex kyib'aj twi a', ex qe a' e ok te chik'.

⁵Ex xi nb'i'ne tyol ju anjel tajaw a', tma: Aya Qman, aya at ja'lo, aya at ojtxi, ex aya Xjan, tuj tumelxix ma kub' kycastiw jlu tu'na.

⁶Porke el kychk'el qe okslal ex kychk'el qe t-sanjela kyu'n, ax ikx kye ja'lo ma tzaj tq'o'na chik' te kyk'a'; porke tuj kyilx jlu.

⁷Ex o nb'iye at juntl tzaj q'ajt twitz altar, tma: —Ax tok Qman Dios, at tipumala tu'n tb'ant tkyaqil tu'na, axix tok ex tuj tumelxix aju kysentens ma kub' tq'o'na.

⁸Atzunju tkyajin anjel xi tqo'n ti'j q'ij aju tku'x tuj tlaq, ex xi q'o'n amb'il te q'ij tu'n kytz'e'y qe xjal tu'n ta'w q'ij.

⁹Ex e b'aj tz'e'y xjal tu'nju nim kyaq; ex minti' ajtz ti'j kyanmi tu'n tjaw kynimsa'n tb'i Dios, noq o'kx e ok ten yasul ti'j Dios aju at tipumal tu'n kytzaj tq'o'n qe k'ixb'isab'l lu.

¹⁰Atzunju tjwe'yin anjel xi tqo'n aju tku'x tuj tlaq, xi tqo'n tib'aj tq'uqb'il txkup jatum in kawin, ex aju tkawb'il txkup b'i'x kyaj ten tuj qlolj, ex kub' kytx'a'n kyaq' xjal tu'n ta'w k'ixb'isab'l.

¹¹Maske ikju, pero minti' ajtz ti'j kyanmi ti'j kyb'inchb'en mya b'a'n, noq o'kx e ok ten yasul ti'j Dios aju at tuj kya'j, tu'n tlaj k'ixk'oj kyi'j ex tu'n tlaj tx'a'k kyi'j.

¹²Atzunju tqaqin anjel xi tqo'n aju tku'x tuj tlaq, xi tqo'n tib'aj nintz nima Éufrates, ex b'i'x aj tzqij ju nima, tu'ntzun kyik'tz qe rey che tzajel tuj tjawitz q'ij.

¹³Ex o wile ox ju'ẍ ik che ke'yin ik tza'n wo', e jatz tuj ttzi' jil dragón ex tuj ttzi' txkup ex tuj ttzi' ju pakb'al nik'al yol.

¹⁴Porke aqe jlu ju'ẍ qe puro ploj qe in che b'ant qe señ kyu'n, ex in che pon kyuk'il rey tuj tkyaqil twitz tx'otx' tu'n kyok kychmo'n, tu'ntzun kyq'ojin ti'j Dios tuj jun q'ij ma' toklen, aju Dios at tipumal tu'n tb'ant tkyaqil tu'n.

¹⁵Kyb'intze, chin ule ik tza'n eleq'; at tzalajb'il teju xjal in xq'uqin ex tok t-xb'alun, tu'ntzun mi'n tb'et sqi't ti'j ex tu'n mi'n tkub' tq'o'n tch'ixwi kywitz xjal, chi Jesús.

¹⁶Ex e ok kychmo'n qe rey tuj lugar Armagedón tb'i tuj yol hebreo.

¹⁷Atzunju twuqin anjel xi tqo'n tuj kyq'iq' aju tku'x tuj tlaq; ex etz jun tq'ajq'ajel wib'aj kyuwxix tuj tja Dios, tzaj q'ajt max twitz tq'uqb'il, ex tma: —O'kxtzun, ma b'aj.

¹⁸Ex tzaj tqan q'ankyoq tuk'ix q'ankyoq in jululun ex jun kyaqnajnab' kyuwxix, na'nx ttzaj jun kyaqnajnab' ikju atxix tej tb'ant xjal twitz tx'otx'.

¹⁹Ex aju nintz tnam b'i'x el k'ab'chaj, ox piẍ el, ex qe nintz tnam tuj junjun nasyon e kub' xitj; ex tzaj tna'n Dios aju nintz tnam Babilonia tu'n t-xi tq'o'n jun vas te nojni tu'n nimxix tq'oj Dios, tu'n t-xi kyk'a'n te jun kycastiw ma'xix.

²⁰Ex kykyaqil qe tal tx'otx' tmijil mar e je'l oq, ex qe witz e kub' naj.

²¹Ex tzaj nimxix saqb'aqun twitz kya'j, kub' tz'aq kyib'aj xjal, aju kyalil junjun saqb'aqun b'alo jun quintal junjun; e oktzun ten xjal yasul ti'j Dios tu'nju saqb'aqun tzaj te k'ixb'isab'l, porke ma'xix k'ixb'isab'l tu'n saqb'aqun.