Read kumam Apocalipsis 4 Bible Online

Apocalipsis 4 - kumam bible

Apocalipsis 4

¹Tb'ajlenxitzun q'ma'n jlu, o wile jun ttzi ja katl tuj kya'j. Ex tzaj q'ajt aju otoq yolin wuk'ile nej, aju o nb'iye tq'ajq'ajel twi' ik tza'n twi' chun, ex tma weye: —Tjatza tzalu ex kxel nyek'une teya tkyaqilju tzul te tib'ajxi jlu, chi Jesús weye.

²Ex jurat naj kub' ten tipumal Xewb'aj Xjan wib'aje, ex o wile jun q'uqb'il tuj kya'j jatum in kawin Dios, ex ax Dios q'uql tuj q'uqb'il.

³Ex aju q'uqltoq tuj q'uqb'il lu ik ke'yin ik tza'n jun tal ab'j jaspe ex ik tza'n jun tal ab'j cornalina; ex at jun t-xmakal lob'aj ti'jele ju q'uqb'il ik ke'yin ik tza'n tal ab'j esmeralda.

⁴Ex ti'jele ju tq'uqb'il Dios at 24 q'uqb'il, ex o wile at 24 tij xjal q'uql qe kyuj q'uqb'il, tok kyxb'alun saq ex tjax coron q'an pwaq tuj kywi'.

⁵Ex ti'j tq'uqb'il Dios in che etztoq tqan q'ankyoq tuk'ix q'ankyoq in jululun; ex in che k'ant wuq kandil twitz ju tq'uqb'il; atzun qe jlu aqeju wuq T-xew Dios.

⁶Ex twitz ju q'uqb'il at jun tkub' ik ke'yin ik tza'n mar, puro ẍtilun, ik ke'yin ik tza'n jun vidr saq. Ex ti'jele ju q'uqb'il ate' kyaje querubín nimku tb'aq' kywitz at, ax ikx ttzal kyi'j at tb'aq' kywitz.

⁷Aju tnejel querubín ik ke'yin ik tza'n jun b'alun; atzunju tkab'in ik ke'yin ik tza'n jun wakẍ, atzunju toxin ik ke'yin twitz ik tza'n twitz jun xjal; ex atzunju tkyajin ik ke'yin ik tza'n jun t'iw in lipan.

⁸Aqeju kyaje querubín lu teyle junjun at qaq t-xik', ex nim tb'aq' kywitz at kyi'jele ex tjaq' kyxik'; ex minti' in che q'ajen q'ijl ex qonik'an in che b'itzan, in kyma'n: Xjante, xjante, xjante, Qman Dios aju at tipumal tu'n tb'ant tkyaqil tu'n, aju at ojtxi, ex at ja'lo, ex tzul.

⁹Ex tkyaqil maj ok in jaw kynimsa'n qe querubín lu tb'i Dios aju q'uql tuj tq'uqb'il, ex in kyq'o'n nimb'il te ex in kyq'o'n chjonte te porke itz' tuj tkyaqil tab'q'iyil te jumajx;

¹⁰ax ikx qe 24 tij xjal in che kub' ẍmeje' twitz Dios aju q'uql tuj tq'uqb'il, ex in che k'ulun twitz porke itz' tuj tkyaqil tab'q'iyil te jumajx, ex in kub' kyq'o'n kycoron twitz tq'uqb'il, in kyma'n:

¹¹Aya Qman Dios, b'a'n tu'n tjaw nimset tb'iya, ex tu'n tnimanjtza, ex tu'n tk'monteya ipumalj; porke aya b'inchante tkyaqil, ex noq tu'nju tajb'ila ate', ex e b'inchanjtz.