Read kumam Apocalipsis 5 Bible Online

Apocalipsis 5 - kumam bible

Apocalipsis 5

¹Ex o wile jun u'j b'alq'i'n tten tkub' tuj tb'anq'ab' Dios aju q'uql tuj tq'uqb'il jatum in kawin, tz'ib'an tujxi u'j ex ti'jtzi, jpu'n tu'n wuq sey.

²Ex o wile jun anjel at tipun in tq'o'n tqanil, in jaw tq'ajq'ajel twi' kyuw ex in tma'n: —¿Alkye jun at toklen tu'n tjaqet ju u'j tu'n ex tu'n kyel ti'n qe sey ti'j? Chi anjel.

³Ex mi a'l jun in b'ant tjaqet ju u'j tu'n ex tu'n tku'x tke'yin tuj, mi qeju ate' tuj kya'j, ex mi qeju ate' twitz tx'otx', ex mi qeju ate' tjaq'xi tx'otx'.

⁴Nimxix in jaw oq'e tu'nju minti' knet jun xjal at toklen tu'n tjaqet ju u'j tu'n, mi tu'n tjaw t-sch'i'n, mi tu'n tku'x tke'yin tuj.

⁵Ex at jun kyxol qe tij xjal tzaj tma'n weye: —Mi'n tz'oq'a; porke lu ju B'alun aju tzaj ti'j tiyjil Judá ex ti'j tiyjil rey David, ma kub' ti'j tu'n ex at toklen tu'n tjaqet ju u'j ex tu'n kyel ti'n qe wuq sey ti'j.

⁶Ex o wile jun Tal Ẍne'l wa'l twitz ju q'uqb'il, ex tkub' kyxol qe kyaje querubín ex kyxol qe tij xjal, ik tza'n otoq kub' b'yo'n, at wuq tkach ex wuq tb'aq' twitz, atzun qe tb'aq' twitz aqeju wuq t-xew Dios in che'x sama'n tuj tkyaqil twitz tx'otx'.

⁷Ex pon laq'e' ju Tal Ẍne'l, ex tzaj ttzyu'n ju u'j aju tkub' tuj tb'anq'ab' Dios aju q'uqltoq tuj tq'uqb'il.

⁸Ex tej ttzaj ttzyu'n ju u'j, e kub' ẍmeje' qeju kyaje querubín ex qeju 24 tij xjal twitz ju Tal Ẍne'l. Teyle junjun tij xjal q'i'n jun chnab' arpa kyu'n, ex q'i'n laq kyu'n, q'an pwaq kytx'otx'il, nojni qe laq tu'n storak, atzun jlu kyna'j Dios qe okslal.

⁹Ex xi kyb'itzan jun b'itz ak'aj, in kyma'n: Aya at toklena, kyja'tzun b'a'n tu'n tk'monteya ju u'j ex tu'n tel ti'na qe sey ti'j; tu'nju kub' b'yo'na, ex ma che laq'et qe xjal tu'n tchk'ela tu'n kyten tuk'il Dios, te tkyaqil k'loj kyiyjil xjal ex te tkyaqil k'loj xjal junxilchaq kyyol, ex kye kykyaqil tnam, ex kye kykyaqil nasyon.

¹⁰Ex ma che ok tq'o'na te rey ex te pal tu'n kyajb'en te Qdios, ex che kawil kyib'aj xjal twitz tx'otx', che chi tuj kyb'itz.

¹¹O wile ex o nb'iye tq'ajq'ajel kywi' nimku anjel ate' ti'jele ju q'uqb'il, kyuk'ix qe kyaje querubín ex kyuk'ix qe tij xjal; nimku kyajlal anjel, mib'an kyajlanjtz;

¹²ex jaw tq'ajq'ajel kywi' kyuwxix in kyma'n: Aju Tal Ẍne'l kub' b'yo'n, b'a'n tu'n tk'monte toklen, ex q'inumab'l, ex nab'l, ex ipumalj, ex nimb'il te, ex tajwalil, ex tu'n tjaw nimsa'n tb'i, che chi.

¹³Ax ikx xi nb'i'ne kykyaqil tch'isb'en Dios ate' tuj kya'j, ex ate' twitz tx'otx', ex ate' tjaq'xi tx'otx', ex tuj mar, in kyma'n kykyaqil: Qq'onx chjonte te Dios aju q'uql tuj tq'uqb'il, ex teju Tal Ẍne'l; b'a'n tu'n kyk'monte nimb'il, ex tu'n tjaw nimsa'n kyb'i, ex tu'n kykawin tib'aj tkyaqil tuj tkyaqil tab'q'iyil te jumajx.

¹⁴Ex qeju kyaje querubín in kyma'n: —Ikxwitju. Ex qeju 24 tij xjal e kub' ẍmeje', ex e k'ulun twitz Dios aju itz' tuj tkyaqil tab'q'iyil te jumajx.