Read kumam Apocalipsis 8 Bible Online

Apocalipsis 8 - kumam bible

Apocalipsis 8

¹Tejtzun tel ti'n Tal Ẍne'l aju twuqin sey, mi jun o q'ajt tuj kya'j, b'alo te mey or.

²Ex e wile qeju wuq anjel wa'l qe twitz Dios; ex xi q'o'n wuq chun kye.

³Ultzun juntl anjel ex kub' we' twitz altar, q'i'n jun ẍla'k tu'n, q'an pwaq ttx'otx'il; ex xi q'o'n nim storak te tu'n tok te tmoj kyna'j Dios kykyaqil okslal, ex tu'n tkub' tq'o'n tib'aj ju altar q'an pwaq ttx'otx'il aju tkub' twitz tq'uqb'il Dios.

⁴Jaw t-sib'el storak tuj tq'ab' anjel, japun twitz Dios tuk'ix kyna'j Dios okslal.

⁵Jawtzun ti'n anjel ju ẍla'k ex ku'x tnojsa'n tu'n q'aq' tkub' tib'aj altar, ku'tz t-xo'n twitz tx'otx'. Ex tzajtzun q'ankyoq in julin tuk'ix tqan q'ankyoq ex tuk'ix kyaqnajnab'.

⁶Atzun qe wuq anjel, aqeju q'i'n wuq chun kyu'n, b'ant kyten tu'n tok kyq'ajtza'n chun.

⁷Tej tok tq'ajtza'n tnejel anjel ju chun, tzaj saqb'aqun tuk'ix q'aq' kysmon kyib' tuk'il chik', e tzaj xo'n twitz tx'otx'; ex b'aj tz'e'y toxin piẍ twitz tx'otx', ex b'aj tz'e'y toxin tnej tze', ex b'aj tz'e'y tkyaqil cha'x k'ul.

⁸Ex tej tok tq'ajtza'n tkab'in anjel ju chun, o wile ik tza'n jun witz ma'xix in k'ant tu'n q'aq' tzaj xo'n tuj mar. Ex aju toxin piẍ mar ok te chik'.

⁹Ex e kyim qeju toxin tnej jil ate' tuj mar. Ex toxin k'loj barc e b'aj naj.

¹⁰Ex tej tok tq'ajtza'n toxin anjel ju chun, tzaj tz'aq jun che'w ma'xix twitz kya'j, in k'ant ik tza'n ttxan tzaj, ex tzaj tz'aq kyib'aj toxin k'loj nima in che b'et ex kyib'aj jatum in che jatz twi a'.

¹¹Atzun tb'i che'w, K'a K'ul; ex aju toxin k'loj a' ok puro k'a, ex nimku xjal e kyim tu'n kylaj a' otoq che ok puro k'a.

¹²Ex tej tok tq'ajtza'n tkyajin anjel ju chun, ok k'ixb'isa'n aju toxin piẍ q'ij, tuk'ix toxin piẍ xjaw, tuk'ix toxin tnej che'w, kyja'tzun kub' qloljxix toxin tnej kywitz, tu'n mi'n tten spik'un kyaje or te q'ijl ax ikx te qonik'an.

¹³Ex o wile jun anjel in lipan tmijil kya'j, ex o nb'iye tq'ajq'ajel twi' kyuwxix in tma'n: —B'ek'b'il kywitz, b'ek'b'il kywitz, b'ek'b'il kywitz qeju najl qe twitz tx'otx' tu'n kylaj qe chun ch'ixtoq kyok q'ajtza'n kyu'n oxetl anjel.