Read kumam Rut 1 Bible Online

Rut 1 - kumam bible

Rut 1

¹Tuj tq'ijlalil tej kykawin qe jwes kyib'aj aj Israel, at jun maj tzaj nim we'yaj kyxol kykyaqil aj Israel. Attoq jun xinaq aj Belén tuj kytx'otx' kyiyjil Judá xi' jun tyemp najal tuj kytx'otx' aj Moab tu'n tlaj we'yaj, tuk'ix t-xu'jil, ex kyuk'ix kab'e tky'ajal.

²Aju xinaq lu Elimelec tb'i, atzun t-xu'jil Noemí tb'i, ex atzun qe tky'ajal, Mahlón tb'i jun, atzun juntl Quelión tb'i. Aj Efrateo qe jlu, ex ax juntl tb'i tnam Belén. E pontzun tuj kytx'otx' aj Moab ex ax e kyaj ten najal.

³Kyimtzun Elimelec aju tchmil Noemí, atzunte Noemí kyaj ten meb'a xu'j kyuk'il kab'e tal.

⁴E moje'tzun qe kab'e tal Noemí kyuk'il kab'e txin aj Moab; Orfa tb'i jun, atzun juntl Rut tb'i. Ex tej tb'ant laj ab'q'i kyponlen tuj kytx'otx' aj Moab,

⁵e kyim Mahlón ex Quelión, atzunte Noemí kyaj ten meb'a xu'j, minti'tl tchmil ex minti'tl tal.

⁶At jun q'ij o tb'i Noemí qa otoq tzaj q'aq'an tk'u'j Qman kyi'j aj Israel, ex ya minti'toq we'yaj tuj tx'otx' Judá.

⁷Etztzun Noemí kyuk'ix kab'e tlib' tuj lugar jatum najlqetoq, ex kub' b'e kyu'n tu'n kypon juntl maj tuj tx'otx' Judá.

⁸Matoq in che b'et, xi tma'n Noemí kye kab'e tlib': —Ku kyaje kyjaye, ex ax kykyaj tene tuk'il kytxu'ye; awt Qman b'inchante xtalb'il kyeye, ik tza'n ma kyb'inchaye weye ex kye qtzan wale,

⁹ex awt Qman onin kyeye tu'n tknet juntl kychmile, ex tu'n kytzalaje tuj kyjaye kyuk'il kychmile, chi Noemí kye. B'ajtzun tq'olb'en tib' Noemí kyuk'il qe tlib' ex el ttz'ub'an kywitz, atzun kye elib'aj e ok ten oq'el

¹⁰ex xi kyma'n te: —Mi'n. Qo xe'l qeye tuk'ila max tuj ttanmiya.

¹¹Atzunte Noemí xi tma'n juntl maj kye tlib': —Ku kyaje, wal. ¿Tiqu'n kyajb'ile tu'n kyxi'ye wuk'ile? Ya minti'tl we wal ktzajel tu'n kymoje'ye kyuk'il.

¹²Ku kyaje kyjaye, porke weye mlay chin najantle tu'nju ma chin tijine. Ex maske atx tumlal tu'n nnajane tuj aq'b'il ja'lo, ex tu'n kytzaj txqantl wale,

¹³ex baqa jaku kyyoye okxi kych'iy tu'n kynajane kyuk'il. ¿Kukxpetzun che b'el tene tu'n mi'n kynajane ex tu'n kyayone okxi kych'iy qe wale? Mi'n, aqeye wal, mlaylo b'ant ikju. Ate Qman ma tzaj samante nim yajb'il weye, ex mas nim in chin b'isune ik tza'n kyeye, chi Noemí.

¹⁴Atzun kye elib'aj e ok ten oq'el juntl maj ex b'ajtzun tq'olb'en tib' Orfa tuk'il tlib' ex el ttz'ub'an twitz; atzunte Rut ax kyaj ten tuk'il tlib'.

¹⁵Atzunte Noemí xi tma'n te Rut: —Ke'yinxa, lu Orfa ma tz'aj tuj ttanmi ex tu'n tk'ulun twitz tdios, ax ikx teya taja tuk'il.

¹⁶Atzunte Rut xi ttzaq'we'n: —Mi'n tzaj tma'na weye tu'n tkyaj nkolina ex tu'n tel npa'n wib'e ti'ja. Chin xe'le tuk'ila noq jaxja ma txi'ya ex junx chin najale tuk'ila. Aju ttanmiya k'okel te ntanmiye ex aju Tdiosa k'okel te Ndiose.

¹⁷Jatum kymela, axtzun chin kymele, jatum kb'elex maqu'na, axtzun chin b'elex maqu'ne. Awt Qman kub' q'onte ncastiwoye kyuwxix qa ma tz'el npa'n wib'e ti'ja, qa mya tu'n kamik, chi Rut.

¹⁸Tejtzun tel tnik' Noemí ti'j qa axix tok otoq kub' t-ximan Rut tu'n tok lpe' ti'j, ya minti' q'ajt mastl.

¹⁹Kyja'tzun e je'x kykab'il tuj kyb'e tejxi kykanun tuj Belén. Tejtzun kyokx tuj Belén, b'i'x e lab'in xjal kyi'j ex in kyma'ntoq qe xu'j kyja': —¿Maj atzun Noemí jlu?

²⁰Atzunte Noemí xi ttzaq'we'n: —Ya mi'n tz'ok kyq'o'ntle nb'iye Noemí; ja'lo kyq'onke nb'iye Mara, porke ate Dios, aju at tipumal tu'n tb'ant tkyaqil tu'n, ma tzaj tq'o'n jun yajb'il ma'xix wib'aje.

²¹Tej wexe tzalu, nimku xi wi'ne, ex tej ma chin ul meltz'aje, minti' ch'in q'i'n wu'ne, tu'nju iklo tajb'il Qman. ¿Tiqu'ntzun k'okel kyma'ne nb'iye Noemí?, porke ma tzaj yajb'il ex nim mya b'a'n wi'je tu'n Qman aju at tipumal tu'n tb'ant tkyaqil tu'n, chi Noemí.

²²Kyja'tzun tten ajtz Noemí tuj Moab tuk'ix tlib' aju Rut tb'i, aju aj Moab. Tej kypon tuj Belén matoq in xe't tu'n tjaw chmet twitz sebad.