Read kumam Rut 3 Bible Online

Rut 3 - kumam bible

Rut 3

¹At jun q'ij xi tma'n Noemí te Rut: —Aya wal, kxel njyo'ne jun tchmila tu'ntzun tanq'ina b'a'n tuk'il.

²B'intza, ate Booz at qxilen tuk'il ex atzun tajwil tx'otx' jatum xi aja sukwil. Tuj qonik'an ja'lo kxe'l tuj kojb'il tu'n tel tpa'n twitz sebad ti'j tqan.

³Ja'lotzun b'incham ttena, tx'jon b'aj tib'a, q'onka perjum ti'ja, q'onka t-xb'aluna mas tb'anilxix, ex t-xi'tzuna jatum in b'aj b'ujet sebad tu'n tel ttxk'omel. Ex mi'n txi tyek'un tib'a twitz Booz qa na'nxtoq tb'aj wa'n ex tb'aj k'an.

⁴Q'onka kwent ti'j jatum kb'el tan, ex oktzun tik' tan b'ix txi laq'eya ttxlaj, ex b'ix tz'el ti'na ttxo'w ti'j tqan, ex axtzun kb'el tana t-xe tqan. Axtzun te kq'malte teya alkye tu'n tb'inchanteya, chi Noemí.

⁵Atzunte Rut xi ttzaq'we'n: —Ok nb'incha'ye tkyaqil aju ma tmaya.

⁶Xi'tzun Rut jatum in b'aj b'ujet sebad, ex tb'inchatzun tkyaqil aju otoq tma tlib' te.

⁷Tejtzun tb'aj wa'n Booz ex tej tb'aj k'an o tzalaj, ex xi'tzun tal ttxlaj jun ch'uquj twitz sebad. Te yajxitzun ch'intl, cheb'a xi laq'e' Rut ex minti' o q'ajt, eltzun ti'n xnoq'al ti'j tqan Booz ex kub'tzun tan t-xe tqan.

⁸Eltzun twatl Booz tmij aq'b'il, jaw txale' ex b'i'x jaw sek'paj tej ttil lu jun xu'j in tan t-xe tqan.

⁹Xitzun tqanin Booz te: —¿Alkyeya? —Aqine Rut aju tmajena, aya at t-xilena tuk'il qtzan nchmile, kyja'tzun at toklena wi'je tu'n wok tkwentina ex tu'n tmoje'ya wuk'ile, chi Rut xi ttzaq'we'n.

¹⁰Xi tma'n Booz te Rut: —Awt Qman ky'iwlante teya txin, puro b'a'n ma tb'inchaya tu'nju k'ujla'n nana tlib'a tu'na, ex masxix b'a'n ma tb'inchaya ja'lo ik tza'n nej, ex mawtlo knet juntl tchmila mas ku'xun nwitze, qa q'inun ex qa meb'a, ex minti' ma tb'inchaya jlu.

¹¹Mi'n xob'a txin, kykyaqil xjal tuj ntanmiye b'a'n kyu'n aya jun xu'j b'a'n tmod, kyja'tzun kb'antel wu'ne aju in tqanina weye.

¹²Maske ax tok aqine at ch'in nxilene tuk'il qtzan tchmila, ex at juntl xinaq mas at-xix t-xilena tuk'il.

¹³Tenkja tzalu te qonik'an ja'lo, atzun nchi'j, qa tajb'il xinaq lu tu'n tjapun costumr tu'n tu'n tnajan tuk'il jun xjal at t-xilen tuk'il, e tb'ant tu'n. Qa mi'n ma b'ant tu'n, kxe'ltzun ntziyane teya jun yol axix tok twitz Dios tu'n tb'ant wu'ne. Tanxtzuna ja'lo okxi tkub' q'ij, chi Booz.

¹⁴Axtzun o tan Rut te qonik'an t-xe tqan Booz. Primx jaw we' te juntl q'ij, na'nxtoq tkub' spik'un, qloljxtoq ta' twitz tx'otx', ex tma Booz: Mi jun tu'n tb'inte qa otoq tzul aj jun xu'j tal jatum nne'l b'ujet sebad.

¹⁵Ex xitzun tma'n Booz te Rut: —Q'i'mel t-xmuja ex lik'pun ela. Eltzun tlik'pu'n Rut t-xmuj, ex ku'x tq'o'n Booz qaq almi sebad tuj, jax tq'o'n Booz iqtz twi t-semil Rut, ex ajtzun Rut tuj tnam.

¹⁶Tejtzun tkanun Rut tuk'il tlib', xi tqanin tlib' te: —¿Tza'n ma tz'el tb'eya, wal? Xitzun ttx'olb'a'n Rut tkyaqilju otoq tb'incha Booz te,

¹⁷ex tmatl Rut: —Ma tzaj tq'o'n qaq almi sebad lu weye, ex saj tma'n weye: Mlay tz'aj meltz'aja tuk'il tlib'a minti' ch'in q'i'n tu'na.

¹⁸Atzunte Noemí xi tma'n te Rut: —Ja'lo wal, o'kx ayona ti'j ti kb'ajel. Aju xinaq lu mlay tz'ojlan ch'in maxi ok tb'ant ti'j jlu.