Read kumam 1 Samuel 11 Bible Online

1 Samuel 11 - kumam bible

1 Samuel 11

¹Pon Nahas aju rey te Amón kyuk'ix qe t-soldad tuj tnam Jabes tuj tx'otx' Galaad, tu'n kyok tzoqpaj ti'j tnam. Atzun kye xjal najl tuj tnam Jabes xi kyma'n te: —E tb'ant ti'j jun qyol tuk'ila, ex jaku qo ajb'ene teya.

²Atzunte Nahas aju aj Amón tzaj ttzaq'we'n kye: —Jaku b'ant ti'j jun nyole kyuk'ile, ex o'kx qa jaku kub' tuj kywitze tu'n tjatz wi'ne jun tb'aq' twitz tuj tb'anq'ab' teyle junjun kyeye, tu'ntzun ttzaj kych'ixwi kykyaqil aj Israel.

³Atzun kye kytijil xjal tuj tnam Jabes xi kytzaq'we'n: —Q'ontza wuq q'ij amb'il qeye tu'n t-xi qsama'ne qe xjal q'ol tqanil tuj tkyaqil tx'otx' kye aj Israel; qatzun mi a'l jun jaku kolin qi'je, jakutzun txi qq'on qib'e tuj tkwenta.

⁴E pontzun qe xjal q'malte tqanil tuj tnam Gabaa jatum najltoq Saúl, ex xi kyma'n tqanil lu kye xjal. Kykyaqiltzun qe xjal e ok ten oq'el kyuwxix wen tej kyb'inte jlu.

⁵Ex lutoq te Saúl kyja' ttzaj, otoq tz'ajtz tuj kojb'il kyuk'ix qe wakẍ q'i'n tu'n, ex xi tqanin kye: —¿Ti ma b'aj kyi'j xjal? ¿Tiqu'n in che oq'? Atzun kye xjal xi kyma'n te aju tqanil otoq pon kyu'n qe xinaq tzajni qe tuj tnam Jabes.

⁶Tejtzun tb'inte Saúl jlu, o noj tu'n tipumal T-xew Dios ex tzajxix nim tq'oj.

⁷Tzajtzun ti'n Saúl kab'e wakẍ, e kub' tpaẍu'n ex xi tq'o'n kye junjun sanjel tu'n t-xi kyi'n tuj tkyaqil kytx'otx' aj Israel. E je'xtzun qe sanjel ex xi kyma'n kye xjal kyja': Iktzun kb'ajel paẍu'n kywakẍ qe xjal aqeju kyk'i' che ok lpe' ti'j Saúl ex ti'j Samuel tuj q'oj. Tzajtzun jun xob'ajil ma'xix kyib'aj xjal tu'n Qman; ok kychmon kyib' tuk'il Saúl, mojl taq'pon kyu'n kykyaqil.

⁸Tej tok ten Saúl q'il kyajlal xjal tuj tnam Bezec, otoq b'aj kychmon kyib' ox syent mil xinaq aj Israel, ex 30 mil aj Judá.

⁹Ex xi tma'n kye qe xjal otoq che pon q'ol tqanil: —Kymanxe kye xjal najl tuj Jabes: Nchi'j qo pone te chilkuq'ij ex ok che kletele qu'ne, chi Saúl, che chikuye. E ajtzun qe xjal ex xi kyma'n tqanil lu kye xjal najl tuj Jabes, atzun kye aj Jabes nimxix o che tzalaj tej kyb'inte ju tqanil lu,

¹⁰ex xi kyma'n te Nahas: —Nchi'j txi qq'on qib'e tuj tkwenta tu'ntzun tb'inchanteya qi'je noq alkye b'a'n tuj twitza.

¹¹Tujtzun juntl q'ij b'aj b'ant kyten qe t-soldad Saúl; tuj ox k'loj e je'l tu'n, ex na'nxtoq tkub' q'ij tej kyokx tzoqpaj tuj tmijil kycampament aj q'oj; ex e kub' b'yo'n aj Amón kyu'n, kukxtoq tok q'oj tej tpon chilkuq'ij. Atzun junjun e kyaj anq'in b'aj kysputun kyib', kyja'tzun mi jun kye aj Amón kyaj ten tuk'in tib' tuk'il juntl.

¹²Xitzun kyma'n xjal te Samuel: —¿Alkye qeju e q'mante qa mlay tz'ok Saúl te qrey? Kyq'ontze qe xjal lu tu'ntzun kykub' qb'yo'ne.

¹³Atzunte Saúl xi tma'n kye: —Tuj q'ij ja'lo mi jun b'a'n tu'n tkyim, porke ate Qman ma klonte kye aj Israel.

¹⁴Ex xi tma'n Samuel kye kykyaqil xjal: —Qo'qe tuj Gilgal tu'ntzun tqe' tkawin rey ma chixin.

¹⁵Kyja'tzun tten, kykyaqil xjal e je'x tuj Gilgal ex ok kyq'o'n Saúl te rey ma chixin twitz Qman. Ex axtzun xi kyq'o'n qe oyaj te mojb'ab'l tib'il te Qman; ex nimxix o tzalaj Saúl wen kyuk'ix kykyaqil xjal aj Israel.