Read kumam 1 Samuel 12 Bible Online

1 Samuel 12 - kumam bible

1 Samuel 12

¹Xitzun tma'n Samuel kye kykyaqil xjal aj Israel: —Ma kyile ma b'ant wu'ne tkyaqilju tzaj kyqanine weye, ex ma tz'ok nq'o'ne jun rey tu'n tkawin kyib'aje.

²Ex lutzun aju rey lu, aju kb'el nej kywitze. Bay weye ma chin tijine ex ma saqix nwi'ye, ex ate' qe nky'ajale kyxole. Aqine in kub' nej kywitze ojtxi atxix tuj nku'xumale ax ikx ja'lo,

³ex lu qine atine kywitze: Qatzun ma tz'el wi'ne twakẍ jun xjal ex qa tchej, ex qa at jun kyeye ma b'aj nyajla'ne, ex qa at jun ma nb'inchaye mya b'a'n ti'j, ex qa at jun ma tz'el nqanine tpwaq noq tu'n mi'n tkub' t-sentens tu'n tlaj mya b'a'n otoq tb'incha, b'a'n tu'n ttzaj kyma'ne jlu twitz Qman ex twitz ju rey ma jaw t-sk'o'n, ex jaku tz'aj nchjo'ne tkyaqil, chi Samuel.

⁴Atzun kye xjal xi kyma'n: —Mi jun maj ma qo b'aj tyajla'na, ex minti' jun mya b'a'n ma tb'inchaya qi'je, ex minti' ma tzaj tk'mo'na tpwaq jun xjal tu'n tkub' tewana til.

⁵Atzunte Samuel xi tma'n kye: —Lu Qman te testiw kyi'je tuk'ix aju rey ma jaw t-sk'o'n, tu'nju minti' ma knet jun wile kyu'ne, chi Samuel. —Ax tok jlu, che chi.

⁶Ex xi tma'ntl Samuel kye tnam xjal: —Ate Qman xi q'onte toklen Moisés ex Aarón tu'n kyetz qe kyxe'chele tuj Egipto.

⁷Kyja'tzun kyb'incham kytene, porke twitz Qman chin yolile kyuk'ile ti'j tkyaqilju b'a'n ma tb'incha kyeye ex kye qe kyxe'chele.

⁸Tej tpon Jacob kyuk'ix qe tiyjil tuj Egipto, e oktzun ten qe kyxe'chele kub'sal twitz Qman; atzunte Qman xi t-sama'n Moisés tuk'ix Aarón, ex atzun qe e je'tz q'inte kye kyxe'chele tuj Egipto, ex atzun e ul najal tuj lugar lu.

⁹Atzun kye el kypa'n kyib' ti'j Qman aju Kydios, ex ate Qman xi q'onte kye tuj tq'ab' Sísara aju nejenel kye t-soldad Jabín aju rey tuj Hazor, ex tuj kyq'ab' aj Filisteo, ex tuj tq'ab' rey kye aj Moab, atzun qe jlu e ok ten q'ojlel kyi'j qe kyxe'chele.

¹⁰E kub'santzun twitz Qman ex kyma kyja': Ma qo b'inchane il twitza Qman, tu'nju ma kyaj qkolina ex ma qo ok tene k'ulul kywitz tilb'ilal Baal ex kywitz tilb'ilal Astarot. Qo tklomtzuna ja'lo tuj kyq'ab' qe aj q'oj qi'je, ex qo ajb'eltzune o'kx teya, che chi.

¹¹Kyja'tzun, ate Qman xi samante Gedeón, tuk'ix Barac, tuk'ix Jefté, ex wuk'ixe aqine Samuel, tu'ntzun kyklete tuj kyq'ab' qe aj q'oj kyi'je, ex kyja'tzun ẍe anq'ine tuj txub'txaj.

¹²Atzun kyeye, tej kylonteye kyja'toq tok tzoqpaj Nahas kyi'je, aju rey kye aj Amón, tzaj kyqanine jun rey weye tu'n tkawin kyib'aje, maske aju kyeye kyrey ate Qman aju Kydiose.

¹³Ex lutzun rey lu, aju ma jaw kysk'o'ne. Ate Qman ma tzaj q'onte rey aju xi kyqanine.

¹⁴Atzun ja'lo, qa ma txi kynimane Qman ex qa ma che k'ulune te, ex qa ma txi kynimane tyol ex qa mi'n ma che ik'e kyib'aj qe tmandamyent, tza'nx aqeye ax ikx aju rey in kawin kyib'aje, ex qa ma che anq'ine ik tza'nx tajb'il Qman aju Kydiose, oktzun che anq'ile b'a'n.

¹⁵Ex qa minti' ma txi kynimane, ex qa minti' ma che japun qe tmandamyent kyu'ne, kb'el tq'o'n Qman kycastiwoye, ik tza'n o tb'incha kyi'j kyxe'chele.

¹⁶Kyja'tzun ax che tenkje, ex k'okel kyke'yine qe techal ma'xix che b'antel tu'n Qman kywitze.

¹⁷Aju tq'ijlalil ja'lo, atzun tu'n tjaw chmet triw ex minti' jb'al, ¿jek ax? Ex aqine chin xel qaninte te Qman tu'n ttzaj tq'o'n jb'al tuk'ix q'ankyoq, tu'ntzun tok kyke'yine ex tu'n tel kynik'e ti'j qa mya b'a'n aju ma kyb'inchaye twitz Qman, tu'nju ma txi kyqanine tu'n tok jun kyreye, chi Samuel.

¹⁸Oktzun ten Samuel qanilte te Qman, jurattzun tzaj jb'al ex q'ankyoq; atzun kye kykyaqil xjal tzaj nim kyxob'il twitz Qman ex twitz Samuel.

¹⁹Kyja'tzun xi kyma'n kykyaqil xjal te Samuel: —Kub'sana qi'je twitz Qman Dios tu'ntzun mi'n qkyime aqo'ye tmajena, ex mas ma ch'iytl qile tu'nju ma txi qqanine jun rey.

²⁰Atzunte Samuel xi ttzaq'we'n: —Mi'n che xob'e. Ax tok o kyb'inchaye mya b'a'n; atzun ja'lo mi'n tz'el kypa'n kyib'e ti'j Qman, noq o'kx che k'ulune te tu'n tkyaqil kyanmiye.

²¹Mi'n che'x lpe'ye kyi'j qeju mya ax tok Dios qe, ex mlay che onin ex mlay che kolin kyi'je, porke mya ax tok Dios qe.

²²Atzunte Qman, mlay che kyaj koline tu'n noq tu'nju ma' toklen tb'i; ex tajb'il tu'n kyoke te jun tnam tekuxix.

²³Ik tza'n weye, qa ma txi nkoline tu'n nna'ne Dios kyi'je, jun il jlu twitz Qman, ex kuchiwt tu'n mi'n ttzaj tq'o'n Qman amb'il weye tu'n t-xi nkoline tu'n nna'ne Dios kyi'je. Ex che xel nxnaq'tza'ne tza'n tten tu'n kyb'ete tuj tumelxix ex tuj tjiqumal ti'j.

²⁴Kyja'tzun, kynimanxe Qman ex che k'ulune twitz axix tok ex tu'n tkyaqil kyanmiye, ex kyna'ntze aju nimxix ma tb'incha Qman kyeye.

²⁵Ex qa kukx ma kyb'inchaye mya b'a'n, che najele tuk'ix ju kyreye, chi Samuel, b'aj tma'n.