Read kumam 1 Samuel 13 Bible Online

1 Samuel 13 - kumam bible

1 Samuel 13

¹Otoq tz'ok tk'u'j Saúl tej ttzyet tkawin kyib'aj aj Israel, ex tej tjapun kab' ab'q'i ttzyetlen tkawin,

²e jaw t-sk'o'n ox mil soldad kyxol aj Israel. Kab'e mil kyaj ten tuk'il tuj tnam Micmas ex tuj tiwitz tx'otx' ti'jele tnam Betel, ex atzun juntl mil kyaj ten tuk'il Jonatán tuj tnam Gabaa tuj kytx'otx' aj Benjamín. Atzun kye txqantl xjal xi tma'n Saúl kye tu'n kyaj kyja.

³Ok tzoqpaj Jonatán q'ojlel kyi'j qe soldad aqeju kykub'sa'n te xq'uqil kyu'n aj Filisteo tuj tnam Gabaa, ex o kyb'i aj Filisteo jlu. Xitzun tma'n Saúl tu'n tok q'ajtza'n chun tuj tkyaqil tx'otx' Israel, tu'ntzun kyb'inte aj Hebreo.

⁴Kykyaqil aj Israel o kyb'i qa otoq tz'ok tzoqpaj Saúl kyi'j aj Filisteo, ex noqtzun tu'n tlaj jlu e el ik'un aj Israel kyu'n aj Filisteo; kyja'tzun tten ok tchmo'n Saúl qe t-soldad tuj lugar Gilgal.

⁵Ax ikx b'aj kychmon kyib' aj Filisteo tu'n kyq'ojin kyi'j aj Israel. Attoq ox mil kycarwaj in che ajb'en tuj q'oj, ex qaq mil soldad kyjax kyib'aj chej, ex txqantl soldad in che b'et tu'n kyqan, nim kyajlal wen ik tza'n ttxa tz'a'n ttzi mar. Kub'tzun b'e kyu'n tu'n kyxi' tuj tnam Micmas, ex e kub' ten ti'jxi tnam Bet-avén tuj tjawitz q'ij.

⁶Tejtzun kyke'yinte aj Israel qa ate'toq tuj nim xob'ajil ex kyja'toq kyok tzoqpaj aj q'oj kyi'j, kyja'tzun e je'x ewal kyib' tuj toy' pik, ex tuj jul ex kyxol qe pik, ex tuj tq'ab' xaq ex tuj tjulil a'.

⁷Ex at txqantl e ik'x jlajxi nima Jordán tu'n kypon tuj kytx'otx' aj Gad ex tuj kytx'otx' aj Galaad; atzunte Saúl max kyaj ten tuj Gilgal, ex kykyaqil qe t-soldad lepchqe'k ti'j in che xob' wen.

⁸Kub' tyo'n Saúl wuq q'ij ik tza'nx otoq tma Samuel te; ex ate Samuel ntz'inix tpon tuj Gilgal, ex kyja'tzun kub' b'e kyu'n junjun tu'n kyaj kyja.

⁹Xitzun tma'n Saúl kye xjal: —Kyi'ntze qe alumaj tzalu wuk'ile tu'n kykub' patit, ex tuk'ix oyaj te mojb'ab'l tib'il, chi Saúl. Ex ax Saúl kub' patunte kye alumaj.

¹⁰Tej matoq in kub' b'aj tpatun Saúl qe alumaj, pontzun Samuel. Etz Saúl kanul ti'j Samuel ex ok ten q'olb'el te,

¹¹ex xi tma'n Samuel te: —¿Tiqu'n ma tb'inchaya jlu? Atzunte Saúl tzaj ttzaq'we'n: —Tej sok nke'yine nib'antoq kyaj oq xjal kyja, ax ikx teya minti' sula tuj tajlal xjaw b'animaj ti'j, ex qe aj Filisteo otoq b'aj kychmon kyib' tuj tnam Micmas;

¹²ex nchiye kyja': Mya yaj in che ku'tzku aj Filisteo tuj Gilgal tu'n kyq'ojin wi'je, ex atzun weye na'nx t-xi woqxenan wib'e tuj tq'ab' Qman; kyja'tzun ax qine ẍin ok ten patul kye alumaj, chi Saúl.

¹³Xitzun tma'n Samuel te: —Aju ma b'ant tu'na misikyer ch'in tnab'l, noqwit ma txi tnimana aju tma Qman teya, mawtlo kyuwsanjtz toklena te rey kyxol aj Israel te jumajx.

¹⁴Atzun ja'lo mya kukx ktel toklena te rey. Ktzajel tjyo'n Qman juntl xjal aju in tzalaj ti'j ex k'okel tq'o'n te nejenel kyxol qe xjal etzan tu'n, porke ma tzik'a tib'aj orden tzaj tma'n Qman teya, chi Samuel.

¹⁵Ik' Samuel tuj Gilgal ex xi ti'ntl tb'e. Atzun qe txqantl soldad e ok lpe' ti'j Saúl tu'n ttzyet q'oj kyu'n, e etz tuj Gilgal tu'n kypon tuj tnam Gabaa tuj kytx'otx' aj Benjamín. Atzun e b'aj tajla'n Saúl qe t-soldad, aqeju lepchqe'ktoq ti'j, b'alo noq qaq syent kyb'et.

¹⁶Ate Saúl tuk'ix Jonatán aju tky'ajal, ex kyuk'ix qe soldad lepchqe'k ti'j, e kub' ten tuj tnam Gabaa tuj kytx'otx' tiyjil Benjamín, ex atzun kye aj Filisteo e kub' ten tuj tnam Micmas.

¹⁷At ox k'loj soldad kye aj Filisteo e etz tuj kycampament tu'n kyxi' elq'al, jun k'loj kyja' e je'x tuj tnam Ofra tuj lugar tok tb'i Sual,

¹⁸atzun juntl k'loj kyja' e je'x tuj tnam Bet-horón ex atzunju toxin k'loj kyja' e je'x ttxa'nile witz tib'aj chq'ajlaj Seboím, tlugaril tzqij tx'otx'.

¹⁹Tuj tkyaqil kytx'otx' aj Israel misikyer jun tx'inol k'uxb'il at, ex atzun kyximb'etz aj Filisteo tu'n mi'n tten jun tx'inol k'uxb'il kyxol aj Hebreo, tu'ntzun mi'n kyb'ant spad ex lans kyu'n.

²⁰Kykyaqil aj Israel in che'x kyuk'il aj Filisteo tu'n tjuqet ttzi kypunt, ex ttzi kych'ok ex ttzi kysiwb'il k'uxb'il, ex ttzi kypik.

²¹Kab'e tal saq pwaq nne'l q'i'n tu'n tjuqet kytzi punt ex kytzi kych'ok, ex jun tal saq pwaq nne'l q'i'n tu'n tjuqet kytzi kysiwb'il k'uxb'il ex tu'n kyb'aj ju'xit kywi' qe puy.

²²Tu'ntzun jlu, mi jun spad ex mi jun lans q'i'n kyu'n xjal lepchqe'k ti'j Saúl ex Jonatán tej tok q'oj tuj q'ij lu. Noq o'kx te Saúl ex Jonatán q'i'n spad ex lans kyu'n.

²³Ex matoq kyja' kyik' jun k'loj soldad kye aj Filisteo tuj b'e nne'x t-xol witz ttxlaj tnam Micmas.