Read kumam 1 Samuel 14 Bible Online

1 Samuel 14 - kumam bible

1 Samuel 14

¹At jun q'ij xi tma'n Jonatán aju tky'ajal Saúl teju onilte: —Qo', qo ik'x tuj tq'ab' xaq ex e qok tzoqpaj kyi'j jun k'loj soldad ate' ma jlajxi. Ex minti' xi tma'n Jonatán jlu te tman.

²Otoq txi' Saúl tu'n tkub' ten niqayin ttxlaj tnam Gabaa, tjaq' jun wi' karnad ẍoq' tuj lugar Migrón, kyuk'ix qaq syent soldad lepchqe'k ti'j.

³Aju tok kwentil kapiẍay in ajb'en te pal, atzun Ahías aju tky'ajal Ahitob. Ate Ahitob terman Icabod aju tky'ajal Finees, ex tal tchman Elí aju pal otoq tz'ajb'en te Qman tuj tnam Silo. Ex minti'toq b'a'n kyu'n xjal jatum otoq txi' Jonatán.

⁴In jyontoq Jonatán tumel tza'n tten tu'n tpon max jatum kykub'sa'n jun k'loj soldad kye aj Filisteo. Aju b'e, atzun nne'x kyxol kab'e nintz pik; jun pik Boses tb'i, atzun juntl, Sene tb'i.

⁵Jun pik tkub' tumlal tb'anq'ab' q'ij te tnam Micmas ex juntl pik tkub' tumlal tnayaj q'ij te tnam Gabaa.

⁶Ex xi tma'n Jonatán teju onilte: —Qo', qo ik'x ma jlajxi max jatum kykub'sa'n qe soldad mya nimal Dios qe. Mya yajku jaku qo tzaj onin tu'n Qman, bay te Qman mya kwest jaku qo kamb'an tu'n, qa kyuk'il nim xjal ex qa kyuk'il nik'xi xjal, chi Jonatán.

⁷—B'inchama tkyaqilju ma kub' t-ximana ex lu qine te onil teya tuj tkyaqilju ok tb'incha'ya, chi ju onil te.

⁸Xitzun tma'n Jonatán te: —B'intza, qo ik'ex ma jlajxi jatum ate' qe soldad, ex tuj q'ancha'l qo xe'l tu'ntzun qilwaj kyu'n.

⁹Ex qa ma tzaj kyma'n qe tu'n qayon kyi'j tu'n kyku'b'il max jatum ato', axtzun qo ayol kyi'j ex mi'n qo jax ma jatum ate'.

¹⁰Qatzun ma tzaj kyma'n qe tu'n qjax max jatum ate', oktzun qo jawix, ex atzun jun techal jlu qa otoq che tzaj tq'o'n Qman qe jlu tuj qq'ab' tu'n tkub' kyi'j qu'n, chi Jonatán.

¹¹Kyja'tzun xi kyyek'un kyib' kykab'il tu'ntzun kyilwaj kyu'n jun k'loj soldad aj Filisteo. Ex tejtzun kyilwaj, kymatzun qe soldad aj Filisteo: Kyke'yinxe, nib'an kyetz qe aj Hebreo kyuj qe toy' jul jatum otoq txi kyewan kyib'.

¹²E tzajtzun sch'in ti'j Jonatán ex ti'j ju onil te, che chi kyja': —Kytzaje max tzalu quk'ile, kxel qma'ne jun qyole kyeye. Xitzun tma'n Jonatán teju onil te: —Lpetza wi'je, ok che tzajel q'o'n qe jlu tu'n Qman tuj kyq'ab' aj Israel tu'n tkub' kyi'j.

¹³Jaxtzun txakun Jonatán tuk'ix ju onilte lepcho'k ti'j. Aqeju in che kub'xi tu'n Jonatán, atzunju onilte in kub' b'antzinte kye.

¹⁴Tuj tnejel maj q'oj lu, kub' winqin soldad tu'n Jonatán tuk'ix onilte tuj kab'e ech tx'otx'.

¹⁵Kykyaqil qe soldad ate'toq tuj campament ex kyuk'ix qeju ate' tuj kojb'il, tzaj nimxix kyxob'il. Ax ikx qe soldad ate'toq tuj destacament, kyuk'ix qeju otoq che'x elq'al, tzaj nim kyxob'il. Ex tzaj lu'lun tx'otx', ex tu'ntzun jlu tzaj jun nintz xob'ajil ma'xix kyi'j.

¹⁶Qe soldad kykub'sa'n te xq'uqil tu'n Saúl tuj tnam Gabaa tuj kytx'otx' tiyjil Benjamín o kyil tej kyel sputj aj Filisteo tu'n kyxi oq tuj tkyaqil part.

¹⁷Xitzun tma'n Saúl kye soldad ate' tuk'il: —E tjaw tajlal qxol tu'ntzun tel qnik' ti'j alkyeqe mi a'l at qxol. Tejtzun tjaw tajlal kyu'n, eltzun kynik' ti'j qa ate Jonatán mi a'ltoq kyxol ex tuk'ix ju onilte.

¹⁸Ex tuj q'ij lu, atzun ta'toq kax k'ub'l tley Dios kyuk'il aj Israel. Xitzun tma'n Saúl te Ahías: —Q'intza kax k'ub'l tley Dios tu'ntzun qb'inte alkye tu'n tb'ant qu'n.

¹⁹Ex tej matoq in yolin Saúl tuk'il pal, mas e jaw tilj qe soldad aj Filisteo tuj kycampament, kyja'tzun xi tma'n Saúl te pal: —Ya mi'n tzaj ti'na kax k'ub'l tley Dios.

²⁰Oktzun tchmo'n Saúl kykyaqil qe soldad ex e ok tzoqpaj tu'n kyq'ojin kyi'j aj Filisteo. Atzun kye aj Filisteo b'i'x otoq b'aj tzpet kynab'l ex in kub' kyb'yo'ntoq kyib' kyxolx.

²¹Qe aj Hebreo,[5] aqeju otoq b'et-xi nim q'ij kytenlen kyxol aj Filisteo ex otoq che ul kyxol qe soldad aj Filisteo, kyja' aj kyq'on kyib' kyxol aj Israel, aqeju lepchqe'ktoq ti'j Saúl ex ti'j Jonatán.

²²Tejtzun kyb'inte aj Israel, aqeju otoq txi kyewan kyib' tuj tiwitz tx'otx' kye tiyjil Efraín, qa otoq che el oq aj Filisteo, e oktzun lpe' kyi'j aj Filisteo tu'n kyq'ojin kyi'j.

²³Aju q'oj max pon b'aj twi' tuj tnam Bet-avén; kyja'tzun tten e klet aj Israel tu'n Qman tuj q'ij lu.

²⁴Ex tuj q'ij lu otoq che sikt qe aj Israel wen ex mi jun kye otoq wa'n, tu'nju otoq txi tmayo'n Saúl tu'n mi'n kywa'n xjal, ex otoq tma kyja': Tzajxwit tcastiw xjal qa ma txi tnik'b'e'n ch'in wab'j qa na'nxtoq tex q'ij, ex qa na'nxtoq tkub' kyi'j aj q'oj wu'ne.

²⁵Ex e pon qe soldad tjaq' txqan chk'ul jatum attoq nim tja kab'.

²⁶Tej kyokx xjal tjaq' chk'ul, attoq nim ta'l kab', ex mi jun kye xi nik'b'ente ch'in porke in che xob' tu'nju yol otoq txi tma'n Saúl.

²⁷Atzunte Jonatán tu'nju minti' otoq tb'i ju yol otoq txi tma'n Saúl kye soldad, ku'x tq'o'n twi tky'aqo'ch tuj tja kab' ex ok ten lo'l kab'; tu'ntzun jlu ok tipun.

²⁸Xitzun tma'n jun soldad aj Israel te Jonatán: —Ma txi tma'n tmana jun yol kye xjal tu'n mi jun txi nik'b'ente jun ti'xti, ex qa at jun ma txi tnik'b'e'n, il ti'j tu'n ttzaj tcastiw, tu'ntzun jlu ya minti'tl kyipun xjal, chi soldad.

²⁹Xitzun ttzaq'we'n Jonatán: —Ma tzaj ti'n nmane jun mya b'a'n kyib'aj kykyaqil xjal lu. Ke'yintza, ma nna'ye ma tz'ok wipune tu'nju t-xilen nlo'ne ch'in ta'l kab'.

³⁰Ex maswitlo ma tz'ok kyipun xjal noqwit ma che wa'n ti'j wab'j ma tz'el kyi'n kye aj q'oj. Ex maswitlo nim aj Filisteo ma che kub' kyu'n, chi Jonatán.

³¹Tuj q'ij lu aqe aj Filisteo kub' kyi'j kyu'n aj Israel; tzaj qe' kyq'ojin tuj tnam Micmas ex max pon b'aj twi' kyu'n tuj tnam Ajalón, ex qe soldad aj Israel ya otoq che sikt wen.

³²Te tib'ajxitzun jlu e je'x tu'n tb'aj kychmo'n tkyaqil ti'xti otoq kyaj ten kyu'n aj q'oj, ex tzaj kyi'n qe ẍne'l, qe wakẍ, qe tal tor, ex jurat naj e kub' kyb'yo'n tu'n t-xi kychyo'n tkyaqil tuk'ix chik'.

³³Ex at junjun e je'x q'malte te Saúl: —Lu qe xjal in che b'inchan il twitz Qman, porke in che chyo'n chib'j tuk'ix tchk'el. Xitzun tma'n Saúl kye: —Ma che ik'e tib'aj tley Qman. Ja'lo kytolintze jun ab'j matij tzalu wuk'ile.

³⁴Ex kyxi'ye kyuk'il qe xjal, ex kymanxe kye tu'n ttzaj ti'n teyle junjun jun twakẍ ex qa jun tal t-ẍne'l tu'ntzun tkub' kyb'yo'ne, ex mi'n txi kychyo'ne chib'j tuk'ix chik', tu'ntzun mi'n kyb'inchane il twitz Qman. Te qonik'an lu teyle junjun xi ti'n jun twakẍ ex kub' kyb'yo'n jatum otoq pon kyi'n.

³⁵Atzunte Saúl jaw tb'incha'n jun altar te patb'il chojb'il te Qman, ex atzun tnejel altar jlu jaw tb'incha'n Saúl te Qman.

³⁶Te tib'ajxi jlu o tma Saúl: —Qo ku'x tuj qonik'an ja'lo tu'n qok lpe' kyi'j aj Filisteo, ex tu'n ttzaj qi'n tkyaqilju at kye, ex ok tkub' q'ij otoq che kub' b'aj qb'yo'n kykyaqil. Xitzun kytzaq'we'n kykyaqil xjal: —B'inchama alkye b'a'n tuj twitza. Atzunte pal xi ttzaqa'we'n: —Na'nxtoq tb'inchet jlu, qqaninx te Dios.

³⁷Xitzun tqanin Saúl te Dios: —¿Okpe chin okel lpe'ye kyi'j aj Filisteo tu'n tkub' kyi'j wu'ne? ¿Che tzajelpe tq'o'na tuj kyq'ab' aj Israel? Atzunte Qman minti' tzaj ttzaq'we'n tuj q'ij lu.

³⁸Tu'ntzun jlu o tma Saúl kyja': —Che laq'etze tzalu kykyaqile aqeye nejenel kye soldad, ex kyb'i'n b'aje alkye ma b'inchan il ja'lo.

³⁹Kxel ntziyane jun yol axix tok twitz Qman aju Klol kye aj Israel, maske a nky'ajale Jonatán ma b'inchan il, il ti'j kymel, chi Saúl. Ex mi jun soldad xi tzaq'wente te.

⁴⁰Kyja'tzun xi tma'n Saúl kye kykyaqil aj Israel: —Kykub' ten kyeye tzalu, atzun weye tuk'ix nky'ajale Jonatán part qo b'el tene. —B'inchama alkye b'a'n tuj twitza, che chi soldad, xi kytzaq'we'n.

⁴¹Xitzun tma'n Saúl: —Aya Nman aju Kydios aj Israel: ¿Tza'n tten na'nx ntzaj ttzaq'we'na aqine tmajena? Kuchiwt ok tjaw swert ja'lo tu'n tel qnik'e ti'j alkye ma b'inchan il, qa a qine ex qa a nky'ajale, ex qa aqe xjal etzan tu'na, chi Saúl. Aju swert atzun kub' tz'aq tib'aj Jonatán ex Saúl, atzun kye aj Israel minti' kyil.

⁴²Xitzun tma'n Saúl: —Kyi'n jawe swert ti'j nky'ajale Jonatán ex wi'je. Aju swert kub' tz'aq tib'aj Jonatán.

⁴³Kyja'tzun xi tma'n Saúl te Jonatán: —Q'ma'n jatza alkye il ma tb'inchaya. Jatztzun tma'n Jonatán: —Ax tok xi nlo'ne ch'in ta'l kab' tu'n twi nky'aqo'che q'i'n tu'n nq'ab'e, ex lu qine lu, b'a'n tu'n nkyime.

⁴⁴Xitzun tma'n Saúl te: —Awt Dios tzaj q'onte ncastiwoye kyuwxix qa mi'n ma kyima, aya Jonatán.

⁴⁵Atzun kye xjal xi kyma'n te Saúl: —Pero, ¿tza'n tten tu'n tkyim Jonatán, baqa mya tu'n ma che kamb'an aj Israel? Mi'n mlay kyim. Kxel qma'ne jun yol axix tok twitz Qman, mi jun kb'ajel ti'j, porke aju ma b'ant tu'n ja'lo ma tb'incha tu'nju ma onin Dios ti'j, che chi. Kyja'tzun tten klet Jonatán kyu'n xjal tu'n mi'n tkyim.

⁴⁶Ex minti'tl xi lpe' Saúl q'ojlel kyi'j aj Filisteo, ex tqanx e aj tuj kytanmi.

⁴⁷Kyja'tzun tten ok Saúl te kyrey aj Israel, ex tuj tkyaqil part ok ten q'ojlel kyi'j aj q'oj. O q'ojin kyi'j aj Moab, kyi'j aj Amón, kyi'j aj Edom, kyi'j qe rey tuj tnam Soba ex kyi'j aj Filisteo. Ex noq jatum ok t-xi' in kub' kyi'j aj q'oj tu'n.

⁴⁸Ok ten q'ojlel kyuwxix kyi'j aj Amalec, aqeju in che ul aj elq'al, ex kub' kyi'j tu'n. Kyja'tzun tten e klet aj Israel tu'n tuj kyq'ab' aj Amalec.

⁴⁹Qe tky'ajal Saúl, atzun qe jlu: Jonatán, Isúi ex Malquisúa; ex at kab'e tme'jel: Merab tb'i aju tzikb'aj ex atzunte tz'inb'aj Mical tb'i.

⁵⁰Ahinoam tb'i t-xu'jil Saúl, aju tme'jel Ahimaas. Aju nejenel kye t-soldad Saúl, Abner tb'i, aju tky'ajal Ner aju tkyan Saúl.

⁵¹Ate Cis tman Saúl, ex atzunte Ner tman Abner, tky'ajal Abiel qe jlu.

⁵²Kyuwxix e q'ojin aj Israel kyi'j aj Filisteo tuj tkyaqil tanq'ib'l Saúl, kyja'tzun e tzaj ti'n kykyaqil qe xinaq at kyipun ex minti' in che xob' tu'n kyok te t-soldad.