Read kumam 1 Samuel 18 Bible Online

1 Samuel 18 - kumam bible

1 Samuel 18

¹Tej tb'aj yolin David tuk'il Saúl, ok tamiwin tib' Jonatán tuk'il David ex o tk'ujlaxix wen ik tza'n in tk'ujlan tib'.

²Tuj q'ij lu ax kyaj ti'n Saúl David tuk'il tu'n tajb'en te, ex minti' aj ttzoqpi'n tu'n taj tja tman.

³Kyaj b'ant ti'j jun kyyol Jonatán tuk'il David tu'n tok kyamiwin kyib', porke o ten nimxix tk'ujlalil Jonatán ti'j David, ik tza'n in tk'ujlan tib'.

⁴Ax ikx el ti'n t-ẍjo'w, tuk'ix t-xb'alun toksa'n, tuk'ix t-spad, tuk'ix xob'l tplech, ex aju k'alb'il tk'u'j toksa'n, ex xi tq'o'n te David.

⁵Nimxix tnab'l David o ten ok in b'ant tkyaqilju in xi q'ma'n te tu'n Saúl tu'n tb'inchante, ex tu'ntzun jlu ok q'o'n tu'n Saúl te jun nejenel kye soldad. B'a'n ela tmod David tuj kywitz qe soldad, ax ikx tuj kywitz qe xjal ma' kyoklen ate' ttxlaj Saúl.

⁶Tej kyul meltz'aj qe soldad tkub'lenxi b'yo'n aj Filisteo tu'n David, e je'tz qe xu'j kyuj kykyaqil tnam kye aj Israel kanul ti'j rey Saúl, in che b'itzan ex in che b'ixan tu'n nim tzalajb'il, ex in che q'ajtza'ntoq ti'j jun wiq tal tampor kyuk'ix qe tal arpa ox kywitz.

⁷Tej in che b'itzantoq qe xu'j ex in che b'ixantoq in xi kyma'n kyja': Jun mil xinaq ma kub' tb'yo'n Saúl, atzunte David laj mil ma kub' tb'yo'n.

⁸A jlu mya b'a'n e'la tna'n Saúl; tzaj tq'oj wen ex xi tma'n kyja': —In kyma'n xjal qa laj mil xinaq ma kub' tu'n David, atzun weye noq jun milx. Ya noq tu'n tokka q'o'n David te rey.

⁹Atxixtzun tuj q'ij lu, ok in xi tke'yin Saúl ti'j David, in q'ojl twitz wen.

¹⁰Tujtzun juntl q'ij tzyet Saúl tu'n jun ju'ẍ tzaj t-sama'n Dios, ex ok Saúl ik tza'n jun lok tujx tja. In chimb'antoq David ti'j arpa ik tza'nx tmod, atzunte Saúl q'i'n tlans tuj tq'ab'.

¹¹Minab'en jatz ti'n Saúl tlans ex aju t-ximb'etz atzun, tu'n tok t-xayu'n ti'j David ax twitz tkajonil ja. Kab' maj tb'incha ikju, ex ate David kub' joqpaj naj ex o klet.

¹²In xob'toq Saúl twitz David, porke ate Qman attoq tuk'il David, atzunte Saúl otoq tz'el tpa'n tib' Qman ti'j.

¹³Kyja'tzun el ti'n Saúl toklen David ttxlaj ex ok tq'o'n te nejenel kyxol jun mil soldad, tu'n tkub' nej kywitz ok kyex q'ojlel ex ok kyul meltz'aj, noq tu'n mi'n ttentl David ttxlaj.

¹⁴Tu'nju ate Qman at tuk'il David, kyja'tzun puro b'a'n e'la tkyaqilju o tb'incha,

¹⁵ex kyja'tzun tzaj nim t-xob'il Saúl twitz tej tke'yinte b'a'n nne'l taq'unb'en.

¹⁶Ex kykyaqil aj Israel ex aj Judá nimxix in che tzalaj ti'j David, porke in kub' nej kywitz ok kyxi' q'ojlel ex ok in che ul meltz'aj.

¹⁷At jun q'ij xi tma'n Saúl te David: —Kxel nq'o'ne nme'jele Merab aju tzikb'aj tu'n tok te t-xu'jila, ex waje tu'n toka te jun soldad kyuw tk'u'j tuj q'oj, tu'n tq'ojina tuj q'oj tu'n Qman, chi Saúl. Xi tma'n Saúl jlu tu'nju kub' t-ximan qa mya il ti'j ax tu'n tkub' b'yonte te David, noq o'kx tu'n tkub' b'yo'n kyu'n aj Filisteo;

¹⁸atzunte David xi ttzaq'we'n: —Mya ma' woklene kyxol aj Israel ex mi qeju at nxilene kyuk'il. ¿Tza'ntzun tten tu'n woke te tji' rey?

¹⁹Maske ikju, ex tej tpon tajlal xjaw tu'n t-xi tq'o'n Saúl tme'jel te David tu'n tok te t-xu'jil, ya mya te xi tq'o'n, noq o'kx xi tq'o'n te juntl xjal Adriel tb'i, aju aj Mehola.

²⁰Atzunte Mical aju juntl tme'jel Saúl otoq t-xo' tgan ti'j David. Tejtzun t-xi q'ma'n jlu te Saúl, nim o tzalaj tej tb'inte,

²¹ex kub' t-ximan tu'n t-xi tq'o'n tme'jel lu te David tu'n tok te t-xu'jil; atzun t-ximb'etz qa noq tu'nju xu'j lu tu'n tkub' tz'aq tuj kyq'ab' aj Filisteo. Xitzun tma'n Saúl te David tkab'maji'n: —Bay, matzun k'okela te nji'ye ja'lo.

²²Xitzun tma'n Saúl kye qeju in che ajb'en te: —Che yoline tuk'il David tuj ewaj ex kymanxe te kyja': Nimxix in tzalaj rey ti'ja, ex kykyaqil xjal ma' kyoklen ate' ttxlaj rey ax ikx in che tzalaj ti'ja, kyja'tzun b'a'n tu'n toka te tji' rey, che chikuye.

²³E je'xtzun qe ajb'el te Saúl q'malte tkyaqil jlu te David, atzunte tzaj ttzaq'we'n: —¿Che chipetzune qa noq elaj tu'n tok jun xjal te tji' rey? Ik tza'n qine meb'a xjal qine ex mya ma' woklene.

²⁴E pontzun qe ajb'el te Saúl tuk'il ex xi kyma'n te aju otoq tma David.

²⁵Atzunte Saúl xi ttzaq'we'n kye: —Kymanxe te David: Minti' in chin qanine ti'j pwaq ik tza'nx in b'ant ok in xi q'o'n t-xu'jil jun xinaq, noq o'kx wajb'ile tu'n ttzaj tq'o'n David jun syent ttz'umal kytz'a'lb'il aj Filisteo te t-xel pwaq, tu'ntzun t-xelin wu'ne aju ma kyb'incha aj q'oj wi'je, chi Saúl. O tma jlu ex atzun t-ximb'etz qa tu'n tkub' tz'aq David tuj kyq'ab' aj Filisteo.

²⁶Xitzun kyma'n qe ajb'el te Saúl ju yol lu te David, ex b'a'n e'la tuj twitz David aju otoq tqana rey te tu'ntzun tok te tji'. Na'nxtoq tjapun tyemp b'animaj ti'j,

²⁷e b'aj tchmo'n David qe soldad, kub' b'e kyu'n ex e kub' kyb'yo'n kab'e syent aj Filisteo; xitzun ti'n qe ttz'umal kytz'a'lb'il aj Filisteo, ex xi tq'o'n te rey tu'ntzun tok David te tji' rey. Tej kyxi tq'o'n David te, tzajtzun tq'o'n Saúl Mical aju tme'jel te tu'n tok te t-xu'jil.

²⁸Ex tej tel tnik' Saúl ti'j qa ate Qman in onin ti'j David, ex o k'ujlanjtz wen tu'n Mical aju tme'jel,

²⁹tzaj mas t-xob'il twitz ik tza'n nej, ex tu'n jlu ok Saúl te aj q'oj ti'j David te jumajx.

³⁰Tkyaqil maj ok in che tzaj qe nejenel kye soldad aj Filisteo q'ojlel kyi'j aj Israel, ate David in kamb'an mas kywitz kykyaqil xjal ma' kyoklen ate' ttxlaj Saúl, ex kyja'tzun o nimanjtzxix David kyu'n xjal.