Read kumam 1 Samuel 2 Bible Online

1 Samuel 2 - kumam bible

1 Samuel 2

¹Oktzun ten Ana na'l Dios, ex tma: Nman, in chin tzalaje ti'ja tu'n tkyaqil wanmiye, tu'nju in tzaj tq'o'na ak'aj wipumale. At tumel tu'n njaw tze'ne kyi'j qe aj q'oj wi'je, porke aya ma tz'onin weye. Ex kyja'tzun in chin tzalaje.

²Aya Dios xjan, mi a'l juntl ik tza'n teya. Minti' juntl Dios, noq o'kx aya. Ex mi a'l juntl kolol ik tza'n teya.

³Aqeye xjal, mi'n che yoline jun yol te nimb'il kyib'e, mi'n jaw kyniman kyib'e, porke ate Qman atzun Diosju, b'a'n tkyaqil tu'n, ex nno'k tq'o'n kyb'inchb'en xjal tuj malb'il, qa tz'aql.

⁴In che kub' ttoqin qe xob'l kyplech qe xjal at kyipun, ex qeju minti' kyipun in kyk'mo'n kyipumal;

⁵qeju in kyajten kywa nej, in xi kyq'on kyib' te majen noq tu'n tlaj ch'in kywa; atzun qeju nne'l kyk'u'j nej, minti'tl nne'l kyk'u'j ja'lo. Aju xu'j mib'antoq alin, ma tzaj wuq tal; atzunju attoq nim tal nej, ja'lo in b'isun wen tu'nju o che kyim tal.

⁶Ate Qman nne'l q'inte kychwinqlal xjal, ex ax in tzaj q'onte kychwinqlal, in che ku'x tq'o'n Qman qe xjal tuj kynajb'il kyimni, ex in che jaw itz'j juntl maj tu'n.

⁷Tu'n Qman in che ok xjal te meb'a, ex tu'n in che ok te q'inun; in che kub' tz'aq xjal tu'n, ex in che jaw twab'an.

⁸Aju xjal meb'a, a Dios in tzaj oninte te, ex aju xjal misikyer ch'in at te, in tzaj tq'o'n Dios aju at tajb'en te. A Dios in tzaj onin kye tu'n kykub' qe' kyxol qe xjal ma' kyoklen; che b'el qe' tuj jun q'uqb'il tb'anilxix tu'n kyjaw nimsa'n; porke a Qman tajwil tq'uqb'il tx'otx', ex tib'ajtzun jlu kub' tq'o'n enter tx'otx'.

⁹Qe okslal ti'j Dios kwentin qe tu'n tuj kyb'e, atzun qeju b'inchal mya b'a'n che kymel tuj qlolj, ex mi jun jaku kub' ti'j aj q'oj ti'j tu'n, tu'n tex tipumal.

¹⁰Kb'ajel tpaẍu'n Qman qe aj q'oj ti'j, ex max twitz kya'j ktzajel t-sama'n q'ankyoq kyib'aj. Ate Qman kkawil tib'aj tkyaqil twitz tx'otx', ex kxel tq'o'n tipumal rey aju ma jaw t-sk'o'n, ex kch'iyil tipumal tu'n, chi Ana tuj tna'j Dios.

¹¹Ajtztzun Elcana tu'n tpon tja tuj Ramá, atzunte tal q'a Samuel ax kyaj ten tu'n tajb'en te Qman ttxlaj pal Elí.

¹²Qe tky'ajal Elí puro ploj kymod ex minti' in che nimante Qman.

¹³Minti' in b'ant kyu'n ik tza'nx at tu'n tb'ant kyu'n pal kyuk'il xjal. Ok tpon jun xjal q'ol chojb'il, jurat naj in pon jun tmajen pal q'i'n jun jakb'il twitz chib'j tu'n, ex matoq in tzq'aj chib'j,

¹⁴in ku'x tlamo'n naj ju jakb'il twitz chib'j tuj k'il, ex tkyaqilju in tzyet tu'n jakb'il in xi ti'n te pal. Atzun in b'ant kyu'n kyi'j kykyaqil aj Israel ok kypon tuj lugar Silo tb'i.

¹⁵Ax ikx in b'ant kyu'n ti'j t-sebyil alumaj na'nxtoq tkub' patun tib'aj altar, jurat naj in pon tmajen pal tuk'il xjal otoq pon q'ol chojb'il, ex in xi tma'n te: Q'ontza chib'j te pal tu'n tb'aj ntxo'ne twitz q'aq'; ex mlay txi tk'mo'n pal ju chib'j tzq'ajsa'n tuj txikb'il, noq o'kx cha'x kxel wi'ne.

¹⁶Ex qatzun ma tma xjal q'ol chojb'il: E tkub' patit sebo nej, jakutzun txi ti'na noq nik'punx taja qa chi, atzunte tmajen pal in xi ttzaq'we'n: Mlay, b'i'x q'ontza ja'lo, ex qa mi ma tzaj tq'o'na, k'elel wi'ne tuj tq'ab'a lajwers, chi tmajen pal.

¹⁷Aju il kyb'incha ku'xun lu ma'xix tuj twitz Qman, tu'n tlaj minti' tchiylal oyaj tuj kywitz, aju in xi kyq'o'n xjal te Qman.

¹⁸Atzunju ku'xun Samuel in ajb'entoq tuj tja Dios, ex toktoq jun t-ẍjo'w saq ke'yin ik tza'nju in ajb'en kyu'n pal.

¹⁹Tkyaqil ab'q'i in b'aj tb'incha'ntoq ttxu Samuel jun tal t-xb'alun, ex in xi ti'ntoq ok kyxi' tuk'il tchmil q'ol chojb'il tuj tja Dios ik tza'n in b'ant kyu'n junjun ab'q'i.

²⁰Ok tpon Elcana tuk'ix t-xu'jil, in che kub' ky'iwla'n tu'n Elí ex in xi tma'n Elí te Elcana kyja': Awt Qman Dios tzaj q'onte txqantl tk'wa'la ti'j xu'j lu, te t-xelju ma txi tq'o'n tu'n tajb'en te Qman, chi Elí. Ex e ajtzun meltz'aj kyja.

²¹Kub'tzun tky'iwla'n Qman aju xu'j Ana, ex ok ten tal. Kyja'tzun tten, ul itz'j oxetl tal Ana q'a ex kab'e txin, atzunte Samuel in ch'iytoq tuj tja Dios.

²²Atzunte Elí otoq tijin wen, ex o tb'i tkyaqilju in kyb'incha'ntoq qe tky'ajal kyi'j kykyaqil aj Israel, ax ikx in che kub' tantoq kyuk'il qe xu'j in che ajb'entoq ttzi ja xb'alun jatum in kub' tyek'un tib' Dios.

²³Kyja'tzun xi tma'n Elí kye tky'ajal: ¿Tiqu'n in kyb'incha'ne aju mya b'a'n lu? Porke in nb'i'ne kye kykyaqil xjal aju kyb'inchb'ene mya b'a'n.

²⁴Mi'n, aqeye nky'ajal, mya b'a'n yolb'il kyeye in nb'i'ne kyu'n aj Israel, aqeju etzan tu'n Qman.

²⁵Qa at jun xjal ma b'inchan mya b'a'n ti'j juntl xjal, ate Dios jaku txi b'inchante kyi'j; ex qa ti'jku Qman ma tb'incha jun xjal il, ¿alkye jaku onin ti'j? Chi Elí kye tky'ajal. Atzun kye minti' xi kyniman tyol kyman tu'nju otoq kub' t-ximan Dios tu'n kykyim.

²⁶Atzunte ku'xun Samuel in ch'iytoq, ex b'a'n e'la tmod tuj twitz Dios ex tuj kywitz xjal.

²⁷Tujx tq'ijlalil lu pon jun t-sanjel Dios tuk'il Elí ex tma: Chi Qman ma tma: Tej kyten qe t-xe'chela tuj Egipto te tmajen rey Faraón, axix tok kub' nyek'un wib'e kywitz.

²⁸Ex kyxol kykyaqil k'loj kyiyjil aj Israel, aqine in jaw sk'onte kye t-xe'chela tu'n kyok te pal, tu'ntzun kyajb'en weye ex tu'n tkub' kypatun qe alumaj tib'aj n-altare, ex tu'n tkub' kypatun storak, ex tu'n tok kyq'o'n kapiẍay, aju nno'k tq'o'n pal ok nno'kx tuj Lugar Mas Xjan. Ax ikx xi nq'o'ne kyoklen qe t-xe'chela tu'n kyanq'in ti'j chojb'il aju in kub' kypatun aj Israel te nimb'il weye.

²⁹¿Tiqu'ntzun nne'l kyik'une qe chojb'il ex qe oyaj o txi nma'ne tu'n ttzaj kyq'o'n aj Israel weye tuj njaye? ¿Tiqu'n mas ma che'x tnimana qe tk'wa'la nwitze, ex ma che gordiyix tu'n tkyaqilju tb'anil kyoyaj aj Israel, aqeju etzan wu'ne?

³⁰Tu'ntzun jlu, aqine Kymane aju Kydios aj Israel, maske o nmaye qa aya kyuk'ix qe tk'wa'la ax che ajb'ele weye te jumajx, atzun ja'lo kxel nma'ne teya: Mlayx nb'inchaye jlu, noq o'kx che jawil nnimsa'ne qeju in che niman weye, atzun qeju in che ik'un weye, ax ikx kye che elel wik'une. Aqine Dios in chin q'mante jlu.

³¹Ya ch'ix tul laq'e' tq'ijlalil tu'n tel wi'ne toklena, ax ikx kyoklen qe tiyjila che ul itz'j te tib'ajxi, ex mi jun kyxol qe tiyjila ktijil.

³²K'okel tke'yina ok ttzaj mya b'a'n kyib'aj qeju ate' tuj tjaya, atzun qe aj Israel che b'el ky'iwla'n tu'n Dios ex mi jun kyxol qe tiyjila ktijil.

³³Ex kyxol qe tiyjila che kyjel anq'in junjun wu'ne tu'n kyajb'en twitz n-altare, tu'ntzun kyb'aj naj qe tb'aq' twitza tu'n oq'el, ex ktzajel nim tb'isa kyi'j tu'nju mya b'a'n kymod, atzun qe txqantl tiyjila che b'el b'yo'n na'nxtoq kytijin.

³⁴Tuj junx q'ij che kymel kab'e tky'ajala, Ofni ex Finees, ex atzun jlu k'ajb'el te jun techal teya.

³⁵Te tib'ajxi kjawil nsk'o'ne jun pal tz'aqlxix, in japun wajb'ile ex nximb'etze tu'n, ex che tel qe tiyjil wu'ne, ex kukx ktel tkyaqil q'ij twitz ju rey aju kjawil nsk'o'ne.

³⁶Ex atzun qeju otoq che kyaj klet wu'ne kyxol qe tiyjila, che ul ex che b'el ẍmeje' twitz pal qanilte jun saq pwaq ex qa jun piẍ pan, ex ok kyma': Chin kub'sale twitza tu'n ttzaj tq'o'na ch'in waq'une ttxlaja tuj tja Dios, tu'ntzun nwa'n ch'ine.