Read kumam 1 Samuel 26 Bible Online

1 Samuel 26 - kumam bible

1 Samuel 26

¹Qe xjal najl tuj tnam Zif e pon tuk'il Saúl tuj tnam Gabaa ex xi kyma'n te kyja': Lu David in ewan twi witz Haquila, aju tkub' tuj tjawitz q'ij teju lugar minti' kynajb'il xjal tuj, che chi xjal.

²Kub'tzun b'e tu'n Saúl kyuk'ix ox mil soldad mas at kynab'l tuj q'oj kyxol aj Israel, ex e je'x jyolte David tuj lugar Zif aju minti' kynajb'il xjal tuj.

³Atzun e kub' ten ttxlaj jun b'e twi witz Haquila aju tkub' tuj tjawitz q'ij teju lugar minti' kynajb'il xjal tuj. Atzun ta'toq David tuj lugar minti' kynajb'il xjal tuj, ex el tnik' ti'j qa otoq pon Saúl jyolte te;

⁴kyja'tzun xi t-sama'n junjun sanjel ke'yilte jatum otoq kub' ten Saúl.

⁵Te tib'ajxi xi' David jatum otoq kub' ten Saúl, ex o til ju lugar jatum in che kub' tantoq Saúl tuk'ix Abner aju nejenel kye t-soldad Saúl ex tky'ajal Ner. Ax in tantoq Saúl kyxol qe t-soldad tuj campament.

⁶Oktzun ten David yolil tuk'il Ahimelec aju aj Heteo, ex tuk'il Abisai aju tal Sarvia ex terman Joab, ex xi tqanin kye: —¿Alkye jun kyeye jaku txi' wuk'ile tu'n qpon max jatum ta' Saúl tuj campament kye t-soldad? —Jaku chinx weye tuk'ila, chi Abisai xi ttzaq'we'n.

⁷Tujx qonik'an lu xi' David tuk'ix Abisai jatum otoq che kub' ten Saúl kyuk'ix qe t-soldad. Ax in tantoq Saúl tuj campament, ex aju tlans ax tkub' ttxlaj twi', awa'n tuj tx'otx'. Atzunte Abner ex qe txqantl soldad in che tantoq ttxlaj Saúl.

⁸Xitzun tma'n Abisai te David: —Ax Dios ma tzaj q'onte aj q'oj ti'ja tuj tq'ab'a. Q'ontza amb'il weye ja'lo tu'n t-xi nxayu'ne lans tuj tk'u'j ex b'i'x kyjel q'e't tuj tx'otx', junx kxel ntzoqpi'ne ti'j, ex tu'n jlu b'i'x kymel, chi Abisai.

⁹Atzunte David xi ttzaq'we'n: —Mi'n kub' tb'yo'na, porke aju ma kub' b'yonte teju rey sk'o'maj tu'n Qman kb'el tcastiw.

¹⁰Kxel nma'ne jun nyole axix tok twitz Qman; tu'nxte Qman knajel, tu'nju otoq pon or te ex qa tuj q'oj tu'n tkyim.

¹¹Miwt taq' Qman amb'il weye tu'n tkub' nb'yo'ne aju rey jaw t-sk'o'n. Kyja'tzun o'kx q'intza tlans tkub' ttxlaj twi', tuk'ix xar tkub'il a', ex qo', chi David.

¹²Xitzun ti'n David aju lans tuk'ix xar tkub'il a' ex e aj meltz'aj. Mi jun o ke'yinte kye ex mi jun o b'inte; ax ikx mi jun ul tnab'l tu'nju kykyaqil in che tantoq, ex tu'nju ax Qman otoq tzaj q'onte nim watl tuj kywitz.

¹³Te tib'ajxi ik'x David jlajxi chq'ajlaj kyxol witz ex kub' ten twi' jun witz, ex najchaq kyxol.

¹⁴Tzajtzun sch'in David ti'j Abner ex kyi'j qe soldad ex tma: —Aya Abner, chin ttzaq'wentza. Atzunte Abner xi ttzaq'we'n: —¿Alkyeya tu'nju in tzaj sch'ina ti'j rey?

¹⁵Xitzun tma'n David te: —¿Myapetzun xinaqa? ¿Alkye juntl jaku pon ik tza'n teya kyxol kykyaqil aj Israel? ¿Tiqu'ntzun minti' nno'k tkwentina tpatrona aju rey? At jun xjal ma tz'okx aj kyxole ex ma tajb'e tu'n tkub' b'yo'n tpatrona tu'n, aju rey.

¹⁶Mya b'a'n aju ma tb'inchaya. Kxel nma'ne jun nyole axix tok twitz Qman, mas b'a'n tu'n kykyime porke minti' nno'k kykwentine aju kyreye sk'o'maj tu'n Qman. Jyoma aju tlans rey ex aju xar tkub'il a', aqeju tkub'toq ttxlaj twi', chi David.

¹⁷Tejtzun tel tnik' Saúl ti'j qa a David in yolintoq, tma: —¿Apeya in yolin wuk'ile, nky'ajal David? Atzunte David xi ttzaq'we'n: —Aqine in chin yoline Tat Rey.

¹⁸Pero Tat Rey, ¿tiqu'n nno'k lpe'ya wi'je tu'n nkub' tb'yo'na aqine ajb'el teya? ¿Ti o nb'inchaye? ¿Alkye mya b'a'n o b'ant wu'ne?

¹⁹In chin kub'sane teya Tat Rey tu'n t-xi tb'i'na qe nyole aqine ajb'el teya: Qa tu'n Qman ma tz'ok q'o'na te aj q'oj wi'je, kuchiwt txi tk'mo'n Qman jun oyaj kxel nq'o'ne te; qatzun kyu'n xjal in kyma'n teya tu'n tok tena q'ojlel wi'je, kuchiwt tzaj jun mya b'a'n kyib'aj tu'n Qman. Porke ma chin etz kylajo'n tuj tx'otx' etzan tu'n Qman, ex kyaj tu'n wajb'ene kye junxitl dios.

²⁰Mi'n waje tu'n nkyime tuj junxitl tx'otx' mya ttx'otx' Qman, ex aya Tat Rey ma tz'etza jyolte weye; aqine ik ntene ik tza'n jun ky'aq, ex ma tz'ok lpe'ya wi'je kywi' qe witz ik tza'n ti'j jun tz'uchin, chi David.

²¹Xitzun ttzaq'we'n Saúl: —Aya nky'ajal David, b'a'n wu'ne ma chin b'inchane il. Ik ntene ik tza'n jun xjal minti' tnab'l ex jumajx ma tzpet nnab'le. Pero tajtz meltz'aja, ex ya mi'n tz'ok nb'incha'ne jun mya b'a'n ti'ja tu'nju ma tzaj q'aq'an tk'u'ja juntl maj wi'je ex minti' ma chin kub' tb'yo'na, chi Saúl.

²²Atzunte David xi ttzaq'we'n: —Lu tlansa lu, aya Tat Rey. E ttzaj jun tmajena q'ilte te,

²³ex awt Qman q'onte t-xel teyle junjun ik tza'nx tb'inchb'en. Maske a Qman ma tzaj q'onte teya tuj nq'ab'e ja'lo, pero minti' xwajb'eye tu'n tkub' nb'yo'ne, aya rey sk'o'maj tu'n.

²⁴Ik tza'n weye Tat Rey, ma' toklen tchwinqlala ma tz'e'la tuj nwitze, ikxwittzun tz'e'la ju weye nchwinqlal tuj twitz Qman, ex tz'elxwit ti'n tkyaqil b'is wi'je, chi David.

²⁵Xitzun tma'ntl Saúl kyja': —Awt Dios ky'iwla'n teya nky'ajal David. Tkyaqilju kb'antel tu'na puro b'a'n k'elel. Tb'ajlenxi jlu aj meltz'aj Saúl tja, atzunte David xi tlajo'ntl tb'e.