Read kumam 1 Samuel 27 Bible Online

1 Samuel 27 - kumam bible

1 Samuel 27

¹Maske ikju, in ximantoq David ti'j kyja': Kpol jun q'ij chin b'el b'yo'ne tu'n Saúl. Kyja'tzun aju mas b'a'n tu'n nb'inchanteye, chin xel oqe tuj kytx'otx' aj Filisteo tu'ntzun ntene tuj txub'txaj ex tu'ntzun t-xi tkolin Saúl tu'n tjyon wi'je tuj kytx'otx' aj Israel. Qa ma nb'inchaye ikju, chin kletele tu'n mi'n nkub' b'yo'ne tu'n, chi David.

²Kub'tzun b'e tu'n David kyuk'ix qaq syent xinaq ate' tuk'il, tu'n kypon tuj kytx'otx' aj Filisteo ex xi kyq'on kyib' tuj tkwent Aquis, aju rey tuj tnam Gat. Ate Aquis tky'ajal Maoc.

³E pontzun b'ant David najal kyuk'ix qe xinaq ate' tuk'il ex e ten junx tuk'il Aquis tuj tnam Gat, ex teyle junjun najan junx kyuk'il qeju ate' tuj tja. Xi ti'n David qeju kab'e t-xu'jil ex atzun kyb'i jlu: Ahinoam aju aj Jezreel, ex Abigail aju t-xu'jilb'en qtzan Nabal aju aj Carmel.

⁴Tej tb'inte Saúl qa otoq pon oq David tuj tnam Gat, ya minti'tl xi lpe' ti'j.

⁵Xitzun tma'n David te Aquis: —Qa tajb'ila tu'n tb'inchanteya xtalb'il weye tat rey, in chin kub'sane twitza tu'n ttzaj tma'na weye tu'n nxi'ye najal noq alkyex tnam tuj tx'otx' lu, porke aqine ajb'el teya mya b'a'n tu'n nnajane junx tuk'ila tzalu tuj tnam jatum in kawina.

⁶Ax q'ij lu xi tq'o'n Aquis tnam Siclag te David tu'n tnajan tuj. Kyja'tzun aju tnam Siclag kukx tkyaj tjaq' kykawb'il qe rey kye aj Judá ja'lo.

⁷Jun ab'q'i tuk' kyaje xjaw najan David tuj kytx'otx' aj Filisteo.

⁸Tej kyten tuj tx'otx' lu, ate David kyuk'ix qe xinaq ate'toq tuk'il, in che ok tzoqpajtoq q'ojlel kyi'j aj Gesur, aj Gezer ex aj Amalec, aqeju otoq tz'elxi nim ab'q'i kykub'len ten najal tuj tx'otx' ma chixin, in tzyet-x tu'n jatum ta' tb'eyil Shur ex max in pon b'aj tuj Egipto.

⁹Ok in che ok tzoqpajtoq q'ojlel kyi'j, mi jun xinaq ex mi jun xu'j in kyaj ten kyu'n, kykyaqil in che kyim kyu'n. Ax ikx in xi kyi'n qe ẍne'l, qe wakẍ, qe bur, qe chej camey ex qe xb'alun. Oktzun t-xi kykolin tu'n kyok tzoqpaj, in che ajtz meltz'aj jatum ta' Aquis,

¹⁰atzunte Aquis in xi tqanintoq kye: ¿Alkye tnam ma che ok tzoqpaje ti'j ja'lo? Atzunte David in xi ttzaq'we'n: Ma qo ok tzoqpaje kyi'j qe tnam tkub' tuj tnayaj q'ij te Judá ex tuj tnayaj q'ij te Jerameel, ex tuj tnayaj q'ij te kytx'otx' aj Quenitas, chi David.

¹¹Mi jun xinaq ex mi jun xu'j in kyaj anq'intoq tu'n David, tu'ntzun mi jun tu'n t-xi q'malte ti'j jlu tuj tnam Gat. Tuj tkyaqil tq'ijlalil tej tten David tuj kytx'otx' aj Filisteo iklex o b'ant tu'n.

¹²Atzunte Aquis, q'uqltoq tk'u'j ti'j David ex in ximantoq ti'j kyja': Niban tok David te aj q'oj kyi'j aj Israel aqeju t-xjalil, kyja'tzun kukx k'ajb'el weye te jumajx, chi Aquis.