Read kumam 1 Samuel 28 Bible Online

1 Samuel 28 - kumam bible

1 Samuel 28

¹Tuj tq'ijlalil lu b'aj kychmo'n aj Filisteo qe kysoldad tu'n kyq'ojin kyi'j aj Israel, ex atzunte Aquis xi tma'n te David: —B'a'n tu'na il ti'j tu'n texa wuk'ile tuj q'oj kyuk'ix qe xinaq ate' tuk'ila.

²Atzunte David xi ttzaq'we'n: —B'a'n, tat rey. Ja'lo k'elel tnik'a ti'j alkye jaku b'ant wu'ne, aqine tmajena. Atzunte Aquis xi tma'ntl te David: —K'okel nq'o'ne te nejenel te jumajx kyxol qe soldad xq'uqil weye.

³Ya otoq kyim Samuel ex otoq che b'aj oq' kykyaqil aj Israel ti'j, ex otoq ku'x maqu'n ax tuj ttanmi, tuj tnam Ramá. Atzunte Saúl otoq che ex tlajo'n qe aj q'ij kyuk'ix qeju in tzaj kytxko'n kyanmi kyimni.

⁴Ok kychmon kyib' aj Filisteo ex kub' b'e kyu'n tu'n kykub' ten tuj lugar Sunem, ex atzunte Saúl e ok tchmo'n kykyaqil aj Israel ex atzun e kub' ten twi witz Gilboa;

⁵ex tej ttil Saúl kycampament aj Filisteo, tzaj nim t-xob'il ex b'i'x naj tnab'l.

⁶Xitzun tqanin Saúl te Qman alkye tu'n tb'ant tu'n, ex minti' tzaj tzaq'we'n tu'n Qman, mi tuj witzik', mi tu'n swert ex mi kyu'n qe t-sanjel Dios.

⁷Tu'ntzun jlu xi tma'n Saúl kye qe nejenel kyxol t-soldad: —Kyjyontze jun xu'j b'a'n txokon kyi'j kyanmi kyimni, tu'ntzun t-xi nqanin jun nxjele te. —At jun xu'j tuj lugar Endor b'a'n txokon kyi'j kyanmi kyimni, che chi qe nejenel kye soldad, xi kytzaq'we'n.

⁸Eltzun tch'expu'n Saúl t-xb'alun tu'n mi'n tel nik'b'aj ti'j ex junxitl t-xb'alun ok tq'o'n; xi' tuk'il xu'j te qonik'an ex xi tuk'in kab'e xinaq tu'n kyxi' tuk'il. Xitzun tma'n te xu'j: —In chin kub'sane twitza tu'n tjaw ti'na jun nswerte ex tu'n tul tanmi jun kyimni tu'na, aju kxel nma'ne teya.

⁹Atzunte xu'j tzaj ttzaq'we'n: —B'a'n tu'na aju o tb'incha Saúl, o che etz tlajo'n qe aj q'ij tuj tnam, kyuk'ix qeju in tzaj kytxko'n kyanmi kyimni. ¿Tiqu'n in chin okx tq'o'na tuj jun xob'ajil tu'n nkyime?

¹⁰Ex xi tma'n Saúl jun tyol axix tok twitz Qman te xu'j kyja': —Kxel nma'ne jun yol axix tok twitz Qman, mlay kub' tcastiwoya tu'n tlaj jlu, chi Saúl.

¹¹¿Alkyetzun taja tu'n ttzaj ntxko'ne? Chi xu'j xi tqanin. —Txkontza Samuel, chi Saúl.

¹²Minab'en o til xu'j Samuel ex b'i'x jaw sch'in; xitzun tma'n te Saúl: —¿Tiqu'n ma chin kub' t-sb'u'na? Aya Saúl.

¹³Atzunte rey xi tma'n te: —Mi'n xob'a. ¿Ti ma tila? —Ma wile tanmi jun kyimni kyja' tjatz tuj tx'otx', chi xu'j.

¹⁴¿Tza'n ke'yin? Chi Saúl, xi tqanin. —Jun xinaq tij xjal, toksa'n jun t-ẍjo'w, chi xu'j. Eltzun tnik' Saúl ti'j qa a Samuel, ex kub' ẍmeje' ex max pon takl tib'aj twitz twitz tx'otx'.

¹⁵Xitzun tma'n Samuel te Saúl: —¿Tiqu'n ma lab'ta wi'je tu'n ntzaj ttxko'na? Xi ttzaq'we'n Saúl: —Tu'nju ma tzaj nimxix nb'ise, porke ma che ok tzoqpaj aj Filisteo tu'n kyq'ojin wi'je ex ma chin kyaj koline tu'n Dios. Minti' in chin tzaj tzaq'we'ne tu'n, mi kyu'n qe t-sanjel ex mi tuj witzik'. Kyja'tzun ma tzaj ntxko'ne tu'n ttzaj tma'na weye alkye tu'n nb'inchanteye.

¹⁶Atzunte Samuel tzaj ttzaq'we'n: —¿Tiqu'n in tzaj tqanina weye qa ma kyaj kolina tu'n Qman ex qa ma tz'ok te aj q'oj ti'ja?

¹⁷Ma tb'incha Qman ti'ja aju tzaj tma'n weye. Ma tz'el ti'n toklena te rey ex ma txi tq'o'n te David aju tuk'ila.

¹⁸Tu'nju minti' xi tnimana aju tyol tzaj tma'n teya tu'n kynaj aj Amalec tu'na, kyja'tzun ma b'ant jlu tu'n Qman ti'ja.

¹⁹Ex mya o'kx jlu, ax ikx che xel q'o'n aj Israel tuk'ix aya tu'n Qman tuj kyq'ab' aj Filisteo, ex nchi'j kpola wuk'ile kyuk'ix qe tky'ajala. Ikx kxel tq'o'n Qman kykyaqil soldad aj Israel tuj kyq'ab' aj Filisteo, chi Samuel.

²⁰B'i'x kub' tz'aq Saúl twitz tx'otx' ex kub' tx'ile'. Nimxix t-xob'il tzaj tu'n tyol Samuel ex otoq b'aj tipun tu'n tlaj na'nxtoq twa'n tuj enter q'ij ex enter qonik'an.

²¹Tejtzun tok tke'yin xu'j otoq naj tnab'l Saúl, pon laq'e' ttxlaj ex xi tma'n te: —Aqine tmajena ma txi nnimane aju xtqaniya, ex ma waq' wib'e tu'n nkyime noq tu'n t-xi nnimane aju saj tma'na weye.

²²Ja'lo in chin kub'sane twitza tu'n nxi tnimana: Kxel nq'o'ne ch'in twaya tu'n tok tipuna ex tu'n tkub' b'e tu'na.

²³Minti' kub' tuj twitz Saúl tu'n twa'n, ex aqeju nejenel kye t-soldad ate' tuk'il ex ju xu'j e ok ten lajwersilte maxi tej t-xi tniman tu'n twa'n. Jawtzun we' twitz tx'otx' ex kub' qe' twi' jun watb'il.

²⁴Atzunte xu'j kub' tb'yo'n jun tal tor ulni tnab'l almi'n tu'n tja, ex b'aj t-xyoq'in ch'in arin minti' t-samel tuj tu'n tjaw mal tk'u'j tu'n tokx ttxo'n.

²⁵Xitzun ti'n jlu te Saúl tuk'ix kye qe nejenel kye t-soldad, ex tej kyb'aj wa'n, b'aj kyq'olb'en kyib' ex kub' b'e kyu'n ax qonik'an lu.