Read kumam 1 Samuel 29 Bible Online

1 Samuel 29 - kumam bible

1 Samuel 29

¹Oktzun kychmo'n aj Filisteo kykyaqil qe kysoldad tuj lugar Afec, atzun qe aj Israel e kub' ten ttxlaj jun twi a' at tuj lugar Jezreel.

²Nejni qe aj Filisteo tuj k'lojin te jun syentchaq ex te jun milchaq kyb'et, ex teyle junjun k'loj atlex nejenel kye; atzunte David kyuk'ix qe xinaq ate' tuk'il ex tuk'ix Aquis lepch qe kyi'j.

³Xitzun kyqanin qe nejenel kye aj Filisteo te Aquis: —¿Ti nb'aj kye aj Hebreo tzalu? Atzunte Aquis xi ttzaq'we'n: —A David jlu aju o ten ttxlaj Saúl aju rey kye aj Israel. Ex ma b'ant-xi ela' q'ij ax ta' wuk'ile, ex atxix tuj q'ij tej tpon wuk'ile ax ikx ja'lo minti' jun tb'inchb'en mya b'a'n o wile, chi Aquis.

⁴Tzajtzun kyq'oj qe nejenel kye aj Filisteo ti'j Aquis ex xi kyma'n te: —Q'manxa te tu'n taj meltz'aj tuj lugar o txi tq'o'na te ex tu'n mi'n ttzaj quk'il tuj q'oj, ex jaku b'ant ax tz'ok te aj q'oj qi'j ok qq'ojin, ex qa ma che kub' tb'yo'n qe qsoldad, jakulo moje' juntl maj tyol tuk'il Saúl.

⁵Baqa mya a David jlu, aju in che b'itzantoq xjal ti'j ex in che b'ixantoq ti'j ex in kyma'ntoq: Jun mil xinaq ma che kub' tu'n Saúl, atzunte David laj mil, che chi qe nejenel.

⁶Tzajtzun txko'n David tu'n Aquis ex xi tma'n te: —Kxel nma'ne jun yol teya axix tok twitz Qman, aya jun xinaq tz'aqlxix ex nim in chin tzalaje ti'j tb'inchb'ena kyxol qe soldad. Mi jun tb'inchb'ena mya b'a'n o wile atxix tej tpona wuk'ile. Ex minti' in che tzalaj qe nejenel kye aj Filisteo ti'ja,

⁷kyja'tzun taj meltz'aja ex mi'n b'isuna, tu'ntzun mi'n tb'inchanteya aju minti' in che tzalaj aj Filisteo ti'j, chi Aquis.

⁸Atzunte David xi ttzaq'we'n: —Ex, ¿ti ma nb'inchaye? ¿Alkye mya b'a'n o nb'inchaye twitza tat rey atxix tej npone tuk'ila, tu'nju mi'n taja tu'n nxi'ye q'ojlel kyi'j aj q'oj ti'ja?

⁹Xitzun tma'n Aquis te: —B'a'n wu'ne ik ttena ik tza'n jun t-anjel Dios tu'nju b'a'n tb'inchb'ena, ex qe nejenel kye aj Filisteo ma kyma tu'n mi'n t-xi'ya q'ojlel quk'ile.

¹⁰Kyja'tzun, primx we'ktza nchi'j kyuk'ix qe xinaq ma che tzaj tuk'ila, tu'n kyaj meltz'aje, chi Aquis.

¹¹Te juntl q'ij primx jaw we' David kyuk'ix qe xinaq ate' tuk'il ex e aj meltz'aj tuj kytx'otx' aj Filisteo; atzun qe aj Filisteo xi kylajo'n kyb'e tu'n kypon max tuj lugar Jezreel.