Read kumam 1 Samuel 31 Bible Online

1 Samuel 31 - kumam bible

1 Samuel 31

¹E oktzun tzoqpaj aj Filisteo q'ojlel kyi'j aj Israel, ex aqe aj Israel e je'l oq kywitz; ex nimku aj Israel e kub' b'yo'n twi witz Gilboa.

²E je'xtzun qe aj Filisteo tu'n kyok lpe' ti'j Saúl, tu'n tkub' ti'j kyu'n kyuk'ix qe tky'ajal, ex kub' b'yo'n Jonatán kyu'n tuk'ix Abinadab ex Malquisúa.

³Te tib'ajxi e ok tzoqpaj ti'j Saúl, ex tu'nju ch'ixtoq kypon kanun ti'j, ex otoq k'ixb'isanjtz tu'n kyplech, tzaj t-xob'il;

⁴kyja'tzun xi tma'n teju onil te: —Q'i'n jatz t-spadiya ex chin t-xayunkuya tu'n, tu'ntzun mi'n kytzaj qeju mya nimal Dios q'ojlel wi'je, ex tu'n mi'n nkub' b'yo'ne kyu'n, ex tu'n mi'n kyxmayin wi'je, chi Saúl. Atzun teju onil te minti' kub' tuj twitz ex tzaj nim t-xob'il. Jatztzun ti'n Saúl t-spad ex xi t-xo'n tib' tib'aj twi t-spad.

⁵Tejtzun tke'yinte ju onilte ya otoq kyim Saúl, ax ikx te xi t-xo'n tib' tib'aj twi t-spad ex kyim junx tuk'il.

⁶Kyja'tzun tten, ax q'ij kyim Saúl kyuk'ix ox tky'ajal, tuk'ix ju onilte ex kyuk'ix kykyaqil t-soldad.

⁷Atzun qe txqantl aj Israel najl ma jlajxi chq'ajlaj ex jlajxi nima Jordán tuj tjawitz q'ij, tej tkyil otoq che el oq qe kysoldad ex otoq kyim Saúl kyuk'ix qe tky'ajal, kyaj kykolin qe kytanmi ex e je'l oq. E pontzun qe aj Filisteo kyuj qe kytanmi ex ax e kyaj ten najal kyuj.

⁸Tuj juntl q'ij, tej kyxi' aj Filisteo tu'n tel kyi'n tkyaqilju q'i'n kyu'n qe kyimni, knet Saúl kyu'n kyuk'ix qeju ox tky'ajal palch qe twitz tx'otx' twi witz Gilboa.

⁹Eltzun kytamtz'u'n twi' Saúl ex el kyi'n qe tmakb'il in che ajb'en te tq'ojb'il ex xi kysama'n sanjel tuj tkyaqil kytx'otx' aj Filisteo tu'n t-xi kyq'o'n tqanil tuj kyja kydios ex kye xjal.

¹⁰Okx kyq'o'n qe tmakb'il Saúl in che ajb'en te tq'ojb'il tuj tja kydios Astarot tb'i, ex jax kyyob'an t-ximlal twi muro tok ti'j tnam Bet-san.

¹¹Tejtzun kyb'inte qe xjal najl tuj tnam Jabes tuj tx'otx' Galaad aju otoq kyb'incha aj Filisteo ti'j Saúl,

¹²kykyaqil xinaq kyuw kyk'u'j tuj q'oj e b'et tuj enter qonik'an tu'n tku'tz kyi'n t-ximlal Saúl twi muro tok ti'j tnam Bet-san, tuk'ix kyximlal qeju ox tky'ajal, ex e ajtz kyi'n tu'n kyul kyu'n tuj tnam Jabes, ex atzun kub' kypatun qe kyximlal.

¹³Ku'xtzun kymaqu'n qe kyb'aqil tuj tnam Jabes tjaq' jun wi' tze', ex te tib'ajxi jlu kub' kyyo'n we'yaj wuq q'ij.