Read kumam 1 Samuel 4 Bible Online

1 Samuel 4 - kumam bible

1 Samuel 4

¹Tujtzun tq'ijlalil lu b'aj kychmon kyib' aj Filisteo tu'n kyq'ojin kyi'j aj Israel; tu'ntzun jlu e je'tz aj Israel q'ojlel kyi'j aj Filisteo, ex atzun e kub' ten tuj lugar Eben-ezer. Atzun kye aj Filisteo, atzun e kub' ten tuj lugar Afec,

²ex b'aj kytxolb'an kyib' tu'n kyq'ojin kyi'j aj Israel. Tej kyq'ojin, aqe aj Israel kub' kyi'j kyu'n aj Filisteo, b'alo kyaje mil aj Israel e kub' tuj q'oj.

³Tejtzun kyul meltz'aj qe soldad aj Israel tuj kycampament, kymatzun qe kytijil xjal aj Israel: ¿Tiqu'n ma taq' Qman amb'il tu'n tkub' qi'j kyu'n aj Filisteo? Qo' tuj Silo q'ilte kax k'ub'l tley Dios tu'ntzun tb'et Qman qxol, ex tu'n qklet tu'n tuj kyq'ab' qe aj q'oj qi'j.

⁴Xitzun kysama'n aj Israel jun k'loj sanjel tuj Silo, ex tzaj kyi'n ju kax k'ub'l tley Dios aju Tajaw Tkyaqil, aju tkub' tq'uqb'il kyib'aj qe querubín. Ajun Ofni tuk'ix Finees aqeju tky'ajal Elí q'ilte kax k'ub'l tley Dios.

⁵Tejtzun tpon kax k'ub'l tley Dios tuj kycampament aj Israel, e jaw sch'in tuk'il nim tzalajb'il, ex b'i'x tzaj yukch tx'otx' kyu'n.

⁶Tejtzun kyb'inte aj Filisteo aju tq'ajq'ajel kywi' aj Israel, kyma: ¿Ti t-xilen ju tq'ajq'ajel wib'aj in jaw kyxol aj Hebreo? Che chi. Tejtzun kyb'inte qa aju kax k'ub'l tley Dios otoq pon tuj kycampament aj Israel,

⁷tzaj kyxob'il ex kyma: Ma tzul Dios kyxol aj Israel. Ay b'ek'b'il qwitz, na'nx tb'ant jun maj ikju.

⁸Ay b'ek'b'il qwitz. ¿Alkye b'a'n tklonte qe teju Dios lu, aju at nim tipumal? Tu'n e b'aj naj qe aj Egipto tuj ju lugar tzqij tx'otx' tej ttzaj tq'o'n tkyaqil txkaj k'ixb'isab'l kyi'j.

⁹Kyb'incham kytene ex tenx kyipumale, aqeye soldad aj Filisteo, qo q'ojin ex qo okx xinaq, tu'ntzun mi'n qok te kymajen aj Hebreo, ik tza'n kye ma che ok te qmajen, che chi.

¹⁰Tejtzun kyok tzoqpaj aj Filisteo kyi'j aj Israel, kub' kyi'j aj Israel kyu'n, ex qeju minti' e kyim e aj oq kyja. Nimxix xjal e kub' kyu'n aj Filisteo, ex kyxol qe soldad kye aj Israel aqeju in che b'et tu'n kyqan, e kub' 30 mil xinaq.

¹¹Ax ikx xi kyi'n ju kax k'ub'l tley Dios, ex e kub' b'yo'n Ofni tuk'ix Finees, aqeju kab'e tky'ajal Elí.

¹²Attoq jun soldad tiyjil Benjamín o kolpaj tuj q'oj, ex xi qelan tu'n tpon tuj Silo ax q'ij lu. Otoq b'aj t-sb'it'un t-xb'alun ex otoq jax tq'o'n tx'otx' tuj twi' te jun techal ti'j tb'is.

¹³Tejtzun tpon ju xinaq lu, lu te Elí q'uqltoq twi' jun siy in xq'uqin ttzi b'e, tu'nju in b'ajtoq tk'u'j ti'j kax k'ub'l tley Dios. Tejtzun tokx ju xinaq tuj tnam ex tej t-xi tma'n tqanil ti'j q'oj, kykyaqil qeju ate'toq tuj tnam e jaw sch'in tu'n kyxob'il.

¹⁴Tejtzun tb'inte Elí tq'ajq'ajel kywi' xjal, xi tqanin: —¿Tiqu'n ma che jaw tilj xjal? Atzunte xinaq ok tilil tu'n tu'n tpon tqanil tuk'il Elí.

¹⁵Otoq japun Elí twi' 98 ab'q'i ex jumajx otoq che moẍix qe tb'aq' twitz.

¹⁶Xitzun tma'n xinaq te Elí: —Tzajnix qine jatum nno'k q'oj ex ja'lo ma chin kolpaje tuj q'oj. Atzunte Elí tma: —¿Ti ma b'aj, nky'ajal?

¹⁷—Qe aj Israel ma che el oq kywitz aj Filisteo, ax ikx nim xjal ma che kub', ex ma che kub' qe kab'e tky'ajala Ofni tuk'ix Finees, ex aju kax k'ub'l tley Dios ma txi kyi'n aj Filisteo, chi ju sanjel.

¹⁸Tejtzun t-xi tma'n ju sanjel tqanil ti'j kax k'ub'l tley Dios, aj pak'txaj Elí twi t-siy ttxlaj ttzi ja, ex tu'nju otoq tijin ex altoq, b'i'x toqj ti'j tqul ex b'i'x kyim. 40 ab'q'i otoq ten te nejenel kye aj Israel.

¹⁹Aju tlib' Elí, t-xu'jil Finees yab' xjaltoq ta', ch'ixtoq tpon tq'ijlalil tu'n tul itz'j tal; tejtzun tb'inte tqanil qa otoq txi q'i'n ju kax k'ub'l tley Dios ex otoq kyim ju tlib' tuk'ix tchmil, tzajtzun ta'w tyab'il, jaw t-xqu'tz'in tib' ex ul itz'j tal.

²⁰Tejtzun kyke'yinte qe xu'j in che ajb'en te ya ch'ixtoq tkyim, kymatzun: Mi'n xob'a porke ma tzul itz'j jun tala xinaq, che chi. Atzun te minti' xi ttzaq'we'n ex minti' xi tq'o'n twi' ti'j.

²¹Ex Icabod[3] tb'i tal ne' ok tq'o'n ex tma: Ma tz'el q'i'n tajwalil Dios kyxol aj Israel tu'nju ma txi q'i'n kax k'ub'l tley Dios, chi xu'j. Tma ju yol lu tu'nju otoq txi q'i'n kax, ex tu'nju otoq kyim tlib' tuk'ix tchmil.