Read kumam 1 Samuel 5 Bible Online

1 Samuel 5 - kumam bible

1 Samuel 5

¹Tejtzun t-xi kyi'n qe aj Filisteo ju kax k'ub'l tley Dios tuj Eben-ezer, pon kyi'n tuj tnam Asdod.

²Tzajtzun kyi'n ex okx kyq'o'n tuj tja kydios Dagón tb'i, ex junx kub' kyq'o'n ttxlaj Dagón.

³Te prim tuj juntl q'ij tej kypon aj Asdod o kyil lu te Dagón mutzl tkub' twitz tx'otx' twitz kax k'ub'l tley Dios. Jawtzun kyi'n ex kub' kyq'o'n tuj tlugar.

⁴Ax ikx tuj juntl q'ij te prim tej kypon aj Asdod, lu Dagón mutzl tkub'tl twitz tx'otx' twitz kax k'ub'l tley Dios. Aju twi' ex qe tq'ab' otoq che el toqj ex kykub' tib'aj tmarkil ttzi ja twitz tx'otx'. Noq o'kx ju t-ximlal minti' pax.

⁵Kyja'tzun, ok kyokx qe pal ex qa txqantl xjal tuj tja Dagón tuj Asdod, minti' in kub' kyq'o'n kyqan tib'aj ttzi tmarkil ja, ex kukx tb'ant kyu'n ja'lo.

⁶Atzunte Qman kub' tq'o'n jun castiw kyuwxix kyib'aj aj Asdod, ex nimxix xob'ajil tzaj kyi'j, ex jaw jlet kyaqk'u kyi'j kykyaqil xjal tuj tnam Asdod ex kyi'j xjal kyuj kykyaqil lugar te tnam lu.

⁷Tejtzun kylonte aj Asdod aju in b'ajtoq, kymatzun: Aju kax k'ub'l tley Kydios aj Israel mya b'a'n kukx tu'n tten quk'il, porke ma tzaj jun qcastiw kyuwxix tu'n, ax ikx ti'j Dagón aju qdios, che chi.

⁸Tu'ntzun jlu xi kyma'n kye kykyaqil qe nejenel kyxol aj Filisteo tu'n tok kychmon kyib' kyuk'il, ex xi kyqanin kye: —¿Ti k'okel ti'j ju kax k'ub'l tley Kydios aj Israel? Atzun kye nejenel kye aj Filisteo xi kyma'n: —Kyi'nxe tuj tnam Gat. Xitzun kyi'n aj Filisteo kax k'ub'l tley Dios ma chixin.

⁹Tejtzun tpon kyq'o'n tuj tnam Gat, e k'ixb'isettzun qe aj Gat tu'n Qman tu'n kyaqk'u e jaw jlet kyi'j kykyaqil xjal, tza'nx qe tij xjal ax ikx kyi'j qe k'wa'l, tzajtzun nim xob'ajil tuj tnam kyxol qe xjal.

¹⁰Kyja'tzun ik' kyi'ntl aj Filisteo kax k'ub'l tley Dios tu'n tpon tuj tnam Ecrón, ex tej tkanun kax ma chixin, qe xjal najl tuj tnam Ecrón jaw tq'ajq'ajel kywi' ex kyma: Ma tzul q'i'n kax k'ub'l tley Kydios aj Israel quk'il tu'n qkyim qkyaqil, che chi xjal.

¹¹Tuj tkyaqil tnam e b'aj sek'paj kykyaqil xjal tu'n tlaj castiw kyuwxix otoq tzaj t-sama'n Dios kyi'j. Ex tu'n tlaj nimku xjal in che kyim, e je'xtzun txokb'aj kykyaqil qe nejenel kyxol aj Filisteo, ex xi kyma'n kye: Kyi'nxe kax k'ub'l tley Kydios aj Israel ex kyq'on aje tuj tlugar, tu'ntzun mi'n qkyime qkyaqile tu'n, che chi.

¹²Ex aju tq'ajq'ajel kywi' qe xjal japun max twitz kya'j, porke aqeju minti' in che kyim, jumajx nojni kyi'j tu'n kyaqk'u.