Read Mamasa Matius 12 Bible Online

Matius 12 - Mamasa bible

Matius 12

¹Pissaan attu sirupang allo katorroan ummola bela' gandum Puang Yesus sola passikolana. Ummolai lalan napasiolaan siami passikolana ummala gandum anna andei annu tadea'.

²Dengan to Farisi ummitai, napolalan ma'kada lako Puang Yesus nakua: “Petua'ri passikolamu umpogau'mi tala malanna dikarang ke allo katorroan.”

³Natimba' Puang Yesus nakua: “Ta'raka dengan mubaca pa'palakona Daud sola to unturu'i anna tadea'?[38]

⁴Attu iatoo lu tama angngenan kapemalasan Daud anna ummala roti mangka dipemalasan anna andei sola to turu'i, moika anna angga imam mala ummandei.

⁵Ta'paka liu dengan mubaca illalan sura'na Musa kumua ullenda duka' sangka'na allo katorroan imam illalan Banua Ada'na Puang Allata'alla, sapo tae' dipasala?

⁶Paillalan penawaia' inde tula'kue: Dengan tau inde rokko temoe marru untondon Banua Ada'na Puang Allata'alla.

⁷Dengan tiuki' illalan Buku Masero nakua: ‘Pa'kamase randan kupemulu, tangngia olo'-olo' dipopemala'.’[39] Iannamuissanan manappa te kalembasanna battakadae, manassa anna tae'koa' la umpasala to tangkasalaan.

⁸Annu Anak Mentolinomo puangna allo katorroan.”

⁹Mengkalaomi Puang Yesus untampe angngenan iatoo, anna lu tama mesa banua pa'sambayanganna to Yahudi.

¹⁰Illalan inde pa'sambayanganne, dengan mesa tau mate limanna sabali. Dengan pira-pira to morai' la umpeangan kasalaan Puang Yesus napolalan mekutana nakua: “Malarika tau umpomalapu' to masaki ke allo katorroan?”

¹¹Natimba' Puang Yesus nakua: “Pa'rapanan dengangkoa' ummampui mesa domba anna melontin rokko garotin sapo sirupang allo katorroan, tae'ka la lao naangkaran dio mai?

¹²Tae'ka marru keangga' ia ma'rupa tau anna la domba? Dadi sitonganna tae' la dipai tau umpogau' kamapiaan ke allo katorroan.”

¹³Mangkai too, nakuamo Puang Yesus lako inde to mate limannae: “Ette'i limammu!” Naette'mi, monda siami anna matoro susi lima sabalinna.

¹⁴Umpelleimi banua pa'sambayangan inde mai to Farisi'e anna umpamesa kada la umpatei Puang Yesus.

¹⁵Sapo naissanan Puang Yesus kumua marassan nalilingan tangnga' to Farisi, napolalan le'ba umpellei angngenan iatoo anna buda tau ummula'i. Angganna to masaki to ummula' Puang Yesus napomalapu' asan.

¹⁶Sapo ma'pakari'di' Puang Yesus kenamala inde mai taue tae' umpa'peissanan Puang Yesus lako tau senga',

¹⁷anna malara lemba' battakadanna Puang Allata'alla mangka. napalanda' nabi Yesaya nakua:

¹⁸“Petua'i, iamo te Pesuangkue to mangka kupile, to kukamasei anna to umpomasannang penawangku; la kupatama kalena Penawangku, anna la ussewangan kamaloloangku lako mentu'na ma'rupa tau botto-ma'botto.

¹⁹Tae' la sipekka tau, tae' la metamba-tamba, tae' toi la mealo'-alo' mantula' dio tingngayona tau kamban.

²⁰La malenna' penawa lako to malamma, sirapan tallang polo tangnga tae' la natattakki pissan lao, anna sirapan ballo ma'mio'-mio' tae' la napi'dean pissan. La tontong nakarang sae lako attunna umpopatalo kamaloloan.

²¹Mentu'na ma'rupa tau botto-ma'botto la parannu lako kalena.”[40]

²²Mangkai too, saemi pira-pira tau umbaa mesa to buta sola tae' naissan mantula' annu natamai setang. Napomalapu'mi Puang Yesus napolalan mala paita anna naissammo mantula'.

²³Mangnga-mangnga asammi to ummitai anna ma'kada nakua: “Umbai iamo inde peampoanna tomaraya Daud masaemo diampaie.”

²⁴Tappana narangngi to Farisi, nakuamo: “Kuasanna Beelzebul battu' dikua ponggawana setang illalan kalena napolalan mala urrambai lao setang.”

²⁵Sapo nalosa penawanna Puang Yesus napolalan ma'kada laka to Farisi nakua: “Ianna dengan mesa kaparentaan tae' mesa penawa rupa taunna, manassa anna la sanggang. Susi toi duka' ke denganni mesa tondok battu' mesa pendaposan tae' mesa penawa tau illalan, manassa anna la tae' matoto'.

²⁶Susimi duka' kaparentaanna setang. Ianna la urrambaimo lao setang ponggawana setang, manassa anna tae' mesa penawa napolalan sisarak-sarak. Umbamo nakua ke'de' matoto' kaparentaanna?

²⁷Mukuaa' kakuasaanna Beelzebul kupake urrambai lao setang. Ianna susi too kakuasaan aka napake to unturu'koa' urrambai lao setang? Iamo tu matin to unturu'koa'o la umpakawananni kumua sala pikki'koa'.

²⁸Sapo sitonganna kakuasaanna Penawanna Puang Allata'alla kupolalan mala urrambai lao setang. Kalembasanna umpalakomi kaparentaanna Puang Allata'alla illalan alla'-alla'mua'.

²⁹Umbamo la nakua to maboko untamai banuanna mesa to mataro anna alai ewananna ke tae' napungo yolo? Mangkapi napungo anna mane mala ummala ewananna inde to matoroe.[41]

³⁰Angganna to tae' unturu'na', nabalina' anna angganna to tae' ussolanna' marrempun, tau iatoo ma'pasisarak-sarak.

³¹Iamo too kupokadangkoa' matin kumua: a'rin kumua: Angganna kasalaan anna pa'telle mala asan nagarri'i Puang Allata'alla, sapo benna-bena untelle Penawa Masero tae' tongan-tongan mala digarri'i.

³²Ianna dengan tau untelle Anak Mentolino mala digarri'i. Sapo ianna Penawa Maseromo natelle tae' dengan leleanna la digarri'i la susi illalampi lino tenni dio lino tanda lako.

³³Ianna mapia tuona mesa to' kayu, mapia duka' buana. Sapo ianna mapakko', kadake duka' buana. Simesa-mesa to' kayu mala diissanan ke diitami buana;

³⁴To kadakekoa'![42] Tae' dengan leleanna la mapia pessuunan pudukmua' anna innang to kadakekoa'. Annu angganna battakada mengkalao illalan asan unak penawa.

³⁵Angganna to mapia penawa,' manassaanna mapia.duka' pessuunan padukna annumapia ilhlan unak penawanna. Sapo lako to kadake, manassa anna hdake pessuunan pudukna annfu innang kadake illalan unak penawanna.

³⁶Dadi kupokadangkoa' temo: Angganna battakada umpa'di'padanna, pantan la napa'timpasan tau dio olona Puang Allata'alla ke nalambi'mi allo dingei umbisara ma'rupa tau.

³⁷Annu pessuunan pudukmumoa' la dipolalan ummangga' malolokoa', anna pessuunan pudukmu siamoa' duka' la dipolalan umpabambannikoa' sangka'.”

³⁸Attu iatoo dengan pira-pira to untarru' issinna sura'na Musa anna to Farisi ma'kada lako Puang Yesus nakua: “O tuangguru, moraikan la ummita tanda memangnga-mangnga mupadadi anna malara kiissanan kumua lu yao tongangko mai Puang Allata'alla.”

³⁹Sapo natimba' Puang Yesus nakua: “Marru kadake gau tongan inde ma'rupa tau lapik temoe anna tae' matutu langngan Puang Allata'alla annu morai la kupadadian tanda. Sapo tae'koa' la dipadadian tanda senga' salianna tanda susi dadi lako nabi Yunus.

⁴⁰Annu susi Yunus yolona tallungngallo tallu bongi illalan tambuk be'dok, la nakuamo duka' Anak Mentolino la tallungngallo tallu bongi illalan liang.

⁴¹Ianna tallammo lino, la dipatuomi sule to Niniwe sola ikoa' to tuo lapik temo anna la napasalakoa'. Annu tappana urrangngi kadanna Puang Allata'alla napalanda' Yunus mengkatoba', moi to Niniwe. Sapo mokakoa' iko mengkatoba', moi kenada marru untondon Yunus to umpantula'ikoa' temo.[43]

⁴²Anna ianna tallammo lino, la dipatuomi sule tomaraya baine to umparenta lembangna Syeba yolona sola ikoa' to tuo lapik temo.[44] La napasalakoa' annu membela ia naola lao umperangngii kakeakasanna tomaraya Salomo, sapo temo dengan inde to marru untondon tomaraya Salomo.”[45]

⁴³“Ianna mallaimo setang illalan mai kalena mesa tau, lu rekke lu sau'mi dio padang alla' umpeang angngenan a nangei torro. Sapo tae' dengan angngenan nalambi'.

⁴⁴Nakuamo: ‘La ma'pasulena' lako angngenan kutampe.’ Sule tongammi, lo'bang liupi inde angngenan nalambi'e, sirapan banua mapatting mangka disapui anna mangka direpi' manappa issinna.

⁴⁵Le'ba siami lao untambai pitu setang marru kadake, anna torro asan illalan kalena inde taue. Katampakan tuttuan mabanda' kamaparrisan ullambi' inde taue. La susimi duka' ullambi' to kadake lapik temo.”

⁴⁶Marassampi mantula' Puan Yesus lako tau buda, saemi indona sola sirondongna ke'de' dio salian morai la umpellambi'i.

⁴⁷Dengammi tau ma'kada lake Puang Yesus nakua: “O Tuangguru, illalan salian indomiu sola sirondongmu, morai la umpellambi' iko.”

⁴⁸Natimba' Puang Yesus nakua: “Bennara Kao indoku sola sirondongku?”

⁴⁹Anna mane unturo passikolana napasiolaan ma'kada nakua: “Iamo te mai indoku anna sirondongkue.

⁵⁰Annu benna-benna umpogau' pa'kuanna Ambeku yao suruga, iamo sirondongku muane anna sirondongku baine sola indoku.”