Read Mamasa Matius 24 Bible Online

Matius 24 - Mamasa bible

Matius 24

¹Mangkai too, suummi Puang Yesus illalan mai Banua Ada'na Puang Allata'alla. Napellambi'imi passikolana anna turoanni Banua Ada'na Puang Allata'alla.

²Nakuamo Puang Yesus: “Kutulasangkoa' sitonganna, itin lako banua maleke muitao, pissan attu la diroppokan napolalan ta'mo dengan batu la tipatodo' yao batu senga'.”

³Mangkai, lu langngammi Tanete Zaitun Puang Yesus anna ma'loko yao. Saemi passikolana umpentereii anna sipantula'-tula' pakaia. Nakuamo passikolana: “O Tuangguru, tulasampakan piran la lemba' tula'mu angngena'? Aka la tandana ke la saemoko anna la kasuppikanna lino?”

⁴Natimba' Puang Yesus nakua: “Matangkingkoa' indana papusakoa' tau.

⁵Annu la buda tau sae umposanga sangangku nakua: ‘Kaomo To dibassei bayu-bayu ma'pasalama',’ anna la buda tau napapusa.

⁶La urrangngikoa' maroa'na kasibundusan anna karebana to sibundu'. Daua' marea' annu innang la dadinna, sapo tangngiapi allo ma'katampakanna.

⁷Annu la sibundu'-bundu' tau sipa'barean tondok-ma'tondok, anna kaparentaan la sibundu' kaparentaan senga'. Umba-umba angngenan la nangei kendek karorian anna lino'.

⁸Sapa angganna te maie mane pa'parandukanna kamaparrisan sirapan baine la keanak mane nasa'ding.

⁹Attu iatoo, la disakkakoa' ammu disorongan lako to la undarrakoa' lambisan napateikoa'. Anna la nakabassikoa' angganna tau illalan lino annu muturu'na'.

¹⁰La buda to unturu'na' kumassoro' lambisan sipa'perososan anna la sika bassi-bassi.

¹¹La buda kendek to ussanga kalena nabi, anna la buda tau napapusa.

¹²La tuttuan kembea' gau' kadake napolalan buda tau moro' pa'kamasena.

¹³Sapo benna-benna mentoe manda' mengnganti matoto' sae lako kasuppikanna la dipasalama'.

¹⁴Anna la ditale' ambumpa illalan lino kareba Kadoresan untetteran kaparentaanna Puang Allata'alla napolalan narangngi asan angganna ma'rupa tau. Mangkai too, mane nalambi'ri alla ma'katampakanna.”

¹⁵“La ummitakoa' ‘To ungkarang kakadakean la mesanggangngi,’ ke'de' illalan angngenan masero, susi mangke napayolo lamban nabi Daniel.[71] (Inde battakadae la napikki' manappa to umbacai aka kalembasanna.)

¹⁶Attu iatoo angganna to dio Yudea innang la sirri' langngan tanete.

¹⁷To sirupang illalan salian ta'mo la tama banua ummala porewana,

¹⁸anna to sirupang dio bela'na ta'mo la sule lako banuanna ummala pakeanna.

¹⁹Masussa tongan-tongan to manambuk anna to ma'pasusu attu iatoo.

²⁰Pa'sambayangkoa' anna malara inde kadadianne tae' sipatu palauran battu' sirupang allo katorroan.[72]

²¹Annu attu iatoo la kendek kamaparrisansan mekarea'-rea', ta'pa dengan dadi kamaparrisan susi mengkalao dio mai pa'parandukanna lino sae lako temo, anna ta'mo dengan la dadi pole susinna.

²²Kela tae' napokon attunna Puang Allata'alla, ta'mo dengan la tuo ma'rupa tau. Sapo umpesaileipi to napile, napolalan napokon attunna.

²³Ianna dengan tau ungkuangkoa': ‘Indemi To nabassei bayu-bayu Puang Allata'allae!’ battu' nakua: ‘Diomio!’ daua' perangngii.

²⁴Annu la buda kendek to ussanga kalena To nabassei bayu-bayu Puang Allata'alla sola to ussanga kalena nabi. La dengan kara-kara kamai napogau' anna la umpadadi tanda memangnga-mangnga, annu kela malai sae lako to napile Puang Allata'alla napapusa.

²⁵Pengkilalai manappaia', annu kutimangmokoa' kupokadaan.

²⁶Ianna dengan tau ungkuangkoa': ‘Petua'i, diomi padang alla' To nabassei bayu-bayu Puang Allata'alla,’ daua' lao lako. Battu nakua: ‘Illalan tambing,’ daua' perangngii.

²⁷Annu kasaeanna Anak Mentolino la susi kila' pangngarrang mengkalao yaya kabuttuan allo sae sau' karaunanna allo napolalan la naissanan angganna tau.

²⁸Umba-umba nangei bangke, iamo nangei ma'karompo' dassi ummandei.”[73]

²⁹“Mangkanna te kamaparrisanne, ‘pi'demi mata allo, ta'mo la pangngarrang bulan, anna la sironno'-ronnosan bentoen yao mai langi' napolalan ta'mo menggalattuan issinna langi'.’[74]

³⁰Anna mane diita yao langi' tanda kasaeanna Anak Mentolino napolalan la sikatangi' angganna ma'rupa tau. Attu iatoo la naita tau Anak Mentolino turun yao mai langi' illalan gaun sitonda kamatandean anna kakuasaan taditondon.

³¹La dipamoni tamboro' kamai anna la ussua malaeka'na lao urrempunanni to mangka napile illalan lino, mengkalao yaya kabuttuan allo sae sau' karaunanna.

³²Mala diala tandengan kayu ara: ianna kentarukmo anna mukku'mo daunna muissanammia' kumua la kulla'mi allo.

³³La susimi duka' ke muitamia' dadi angganna mangka kutulasangkoa', la muissanammia' kumua madappi'mi attunna.

³⁴Kupokadangkoa' sitonganna, ta'pa la pa'de rupa tau lapik temoo anna lemba'mo inde kara-karae.

³⁵Langi' anna lino la pa'de, sapo battakadangku la da'da' sae lako-lakona.”

³⁶“Tae' dengan tau ummissananni attunna la dadi kara-kara iatoo. Moi malaeka' yao suruga, moi Anakna Puang Allata'alla, angga Ambeku ummissananni.

³⁷Annu kasaeanna Anak Mentolino, susi tappa' anna attunna Nuh yolona.

³⁸Inde anna ta'pa sae waie, angganna ma'rupa tau illalan lino masannang-sannang ummande sola mangngiru', kebaine, anna ma'pasipobaine sae lako attunna tama kappala' Nuh.

³⁹Tae' dengan aka naissanan anna tokke'mo sae wai la untallannii mane kilalari pole'. La susimi duka' kasaeanna Anak mentolino.

⁴⁰Ianna dengan dua muane marassan mengkarang dio bela', la disolaan lao mesa anna la dipatorro mesa.

⁴¹Ianna dengan dua baine marassan manggiling, la disolaan lao mesa anna la dipatorro mesa.

⁴²Iamo too, matangkingkoa' annu tae' muissanan attunna la nangei sae Dewatammu.

⁴³Pikki'pia' too: kela naissananni to ma'banua kumua la maakai bongi la nangei sae to maboko, innang tae' la mamma' indana tama banuanna to maboko.

⁴⁴Iamo too la matangkin liukoa', annu kasaeanna Anak Mentolino tae' mubae-bae.”

⁴⁵“La sirapangkoa' sabua' matutu anna keaka' to naangka' puangna umponggawai solana anna malara untawa nande lako solana ke nalambi'i attunna.

⁴⁶Kerongko' inde subua'e ke tontongngi matutu umpalako manappa pengkaranganna nalambi' puangna ke saemi sule.

⁴⁷Kutulasangkoa' sitonganna, tae' mala tala naangka' puangna ungkandapanni angganna ewananna.

⁴⁸Sapo ianna kadake penawa inde sabua'e, la kendek illalan penawanna nakua: ‘Maela'pi sae puangku,’

⁴⁹lambisan ungkambeimo solana anna ummande anna mangngiru' sola to pangngiru'.

⁵⁰Tapakala tokke'mo sae puangna tae' nabae-bae.

⁵¹Inde sabua'e la nakambei puangna anna mane pa'tibeanni tama angngenanna to ma'dua tambuk. Diomo angngenan iatoo la dingei urrangngi bating sola isi sikekkok.”