Read Mamasa Matius 26 Bible Online

Matius 26 - Mamasa bible

Matius 26

¹Mangka asanni umpalanda' pepa'guruanna Puang Yesus, ma'kadami lako passikolana nakua:

²“Muissanammia' kumua dua bongi mandami anna nalambi'mo allo Paskah anna la disorongan Anak Mentolino la dipatei yao kayu pantokesan.”

³Attu iatoo ma'mesa kapala imam anna perepi'na to Yahudi dio banuanna Pongkena Imam disanga Kayafas,

⁴la ussituru-turu'i umba la nakua ussakka buni Puang Yesus anna popepateii.

⁵Sapo nakua: “Tae' la tapasipatui allo kamai, indana rukka tau.”

⁶Diomi tondok Betania Puang Yesus illalan banuanna Simon to dolengan yolona.

⁷Marassanni ummande, dengammi baine sae umbaa buli-buli batu kaissi minna'-minna' simasulli' allinna anna bolloianni ulunna Puang Yesus.

⁸Naitanna passikolana Puang Yesus, surrak siami buana amu ma'kada nakua: “Akamo gunana itin minna'-minna' masulli' dikaleang-leangngi babangngo?

⁹Itin minna'-minna'o mala dibaluk annu masulli' anna ditawaian to mase-mase allinna.”

¹⁰Sapo nalosa Puang Yesus pikki'na passikolana napolalan ma'kada nakua: “Maakari ammu sussaia' inde baine? Pabei mammi, annu umpogau'mia kamapiaan lako kaleku.

¹¹Annu la sola liukoa' ia to mase-mase, sapo kaleku Kao tae'kia' la sola liu.

¹²Nabolloina' minna'-minna' temo, natimangmia napogau' la napogau'na ke la dilamummo'.

¹³Kupokadangkoa' sitonganna, umba-umba dingei umpalanda' Kareba Kadoresan, iamo duka' dingei umpokada panggauanna inde bainee la dipolalan umpengkilalaii.”

¹⁴Mangkai too, mengkalaomi mesa to nakala' sapulo dua passikolana Puang Yesus disanga Yudas Iskariot lao umpellambi'i kapala imam,

¹⁵anna ma'kada lako nakua: “Aka la mubeenna' angku palessu' rokkoi lisu pala'mua' Puang Yesus?” Narekenammi tallu pulo doi' pera' anna beenni.

¹⁶Naparanduk diomi too nangei umpeang liu lalan Yudas la umpa'perososan Puang Yesus.

¹⁷Inde anna allo pa'parandukanna rame-rame umpakaroa' Allo Kamai disanga Roti Tae' Diboloi Ragie, saemi napellambi'i passikolana Puang Yesus anna ma'kada lako nakua: “Umbanna angngenan muporai la kingei umpatokangko nande Paskah?”

¹⁸Nakuamo Puang Yesus: “Laokoa' tama kota umpellambi'i mesa tau ammu kuanni: ‘Mepasan Tuanggurungki kumua, la nalambi' kalemi attu mangka napatantu Puang Allata'alla lako kalena, morai la ummande nande Paskah sola passikolana dio banuammu.’ ”

¹⁹Mengkalao tongammi passikolana lao umpatoka nande Paskah situru' pesuanna Puang Yesus.

²⁰Bongii, ummandemi Puang Yesus sola sapulo dua pasikolana.

²¹Marassanni ummande, nakuamo Puang Yesus: “Kutulasangkoa' sitonganna, dengan mesa illalan alla'-alla'mua la umpa'perososanna'.”

²²Mapa'di' asammi penawanna passikolana anna sibala'-bala' mekutana lako Puang Yesus nakua: “Tangngia mammoka kao, Tuangguru?”

²³Natimba' Puang Yesus nakua: “To kusolaan ummoton roti rokko mesa pindan, iamo la umpa'perososanna'.

²⁴Innang la mate ia Anak Mentolino situru' issinna Buku Masero, sapo la sanggang to umpa'perososanni. Mala pissan ia kela ta'mo didadian.”

²⁵Nakuamo Yudas to la umpa'perososanni: “Tangngia mamoka kao, Tuangguru?” Natimba' Puang Yesus nakua: “Anna ikomo kumua.”

²⁶Marassanni ummande, ummalami roti Puang Yesus anna ma'kurru' sumanga' anna mane piak-piakki, nabeen lako passikolana napasiolaan ma'kada nakua: “Alai ammu andei, iamo te batang kalekue.”

²⁷Mangkai, ummalami irusan kaissi anggur anna ma'kurru' sumanga' anna mane beenni lako passikolana napasiolaan ma'kada nakua: “Pantan iru'mia' illalan mai inde irusanne,

²⁸annu iamo te rarakue la umpomanassa pa'dandinna Puang Allata'alla, la dipato'do anna malara digarri'i kasalaanna bude tau.

²⁹Sapo kutulasangkoa' temo, ta'mokkao dengan la ummiru' pole anggur sae lako nalambi' attunna sola-solakia' ke dako' ummiru' anggur bakaru illalan kaparentaanna Ambeku.”

³⁰Mangkaii, ummoyongmi mesa penanian umpakasalle Puang Allata'alla, anna mane mengkalao sola passikolana langngan Tanete Zaitun.

³¹Ma'kadami Puang Yesus lako passikolana nakua: “La le'ba asangkoa' mani bongi ussipelle-pelleina'. Annu dengan tiuki' illalan Buku Masero nakua: ‘La kupatei to ma'kambi'na anna angganna dombana la tisembu' lao.’[76]

³²Sapo ianna tuomo' sule, la kuyoloanammokoa' lako Galilea.”

³³Natimba' Petrus nakua: “Moi la le'ba asan solaku, innang tae' dengan leleangku la umpelleiko.”

³⁴Nakuamo Puang Yesus lako: “Kutulasangko sitonganna, ta'pa moni manuk mani bongi anna pentallummo' mutelang.”

³⁵Nakuamo Petrus: “Moi la dipateiki' sola, innang tae'ko la kutelang.” Angganna solana Petrus susi asammi te tula'nae.

³⁶Mangkai too, mengkalaomi Puang Yesus sola passikolana lu lako mesa angngenan disanga Getsemani. Saei lako, nakuamo lako passikolana: “Okko'mokoa' te indee angku laopa ma'sambayang.”

³⁷Umbawaimi Petrus anna dua anakna Zebedeus ussolanni.[77] Attu iatoo naparandukmi magara' Puang Yesus anna masussa penawanna.

³⁸Nakuamo lako passikolana to nasolaan: “Masussa tongan-tongan penawangku temo, kupolalan susimo to la bonno' kusa'ding. Torromokoa' te indee, sapo la tontongkia' matangkin.”

³⁹Mendendemi tittii' anna malimuntu' lumbang rokko litak, anna ma'sambayang nakua: “O Ambeku ianna la dengampa leleanna, pomambelanna' inde parri' kutingngayoe, sapo tangngia pa'kuangku la dadi, sangngadinna pa'kuammu.”

⁴⁰Mangkai ma'sambayang, sulemi lao umpellambi'i inde tallu pasikolanae sapo mamma' nalambi'. Nakuamo lako Petrus: “Ta' siamoka iko mutaroa' daga moi satettekmo usolanna'?

⁴¹Matangkingkoa' ammu ma'sambayang indana taloikoa' passudian umpogau' kasalaan. Innang morai ia penawa la ma'gau' mapia, sapo malamma batang kalemua'.”

⁴²Mangkai umpantula'i passikolana, lao pole omi ma'sambayang kapenduanna nakua: “O Ambeku, ianna ta'mo dengan leleanna la kusala inde kamaparrisanne, pa'kuammumo dadi.”

⁴³Mangkai ma'sambayang, sule omi lako passikolana, sapo mamma' asan nalambi' annu nataloimi matanna.

⁴⁴Mengkalao pole omi lao ma'sambayang kapentallunna, susi siami sambayangna angngena'.

⁴⁵Mangkai, sae omi umpellambi'i passikolana, anna ma'kada nakua: “Mamma' liupokoka ikoa'? Petua'i nalambi'mi attunna Anak Mentolino la dipalessu' rokko lisu pala'na to kasalaan.

⁴⁶Millikmokoa' anta lao untammui to la umpa'perososanna' annu madappi'mi.”

⁴⁷Marassampi mantula' Puang Yesus, anna saemo Yudas, mesa to nakala' sapulo dua passikolana Puang Yesus. Buda tau nasolaan umbaa pa'dang sola bose, nasua kapala imam anna perepi'na to Yahudi.

⁴⁸Innang mangkami napokada Yudas lako inde mai to nasolaanne, nakua: “Iamo kuudung, iamoa' musakka.”

⁴⁹Saena Yudas tappa umpellambi'imi Puang Yesus anna pantula'i nakua: “O Tuangguru.” Anna mane udungngi.

⁵⁰Ma'kadami Puang Yesus nakua: “Akamo mutungka sae?”[78] Sae siami to nasolaan Yudas ussakka Puang Yesus.

⁵¹Sapo dengan mesa passikolana Puang Yesus umbonok pa'dangna anna umbatta sabua'na Pongkena Imam napolalan mallai talinganna.

⁵²Ma'kadami Puang Yesus nakua: “Pasibanuai sule padangmu. Annu benna-benna umpopaningoan pa'dang, la naande duka' pa'dang.

⁵³Musangarika tae'na' mala la melau langngan Ambeku yao suruga anna paturunanna' mapulo sa'bu malaeka' sae umpamoloina'?

⁵⁴Sapo ianna la kupasusi, tae' la lemba' battakada mangka tiuki' illalan Buku Masero kumua innang la dadi susi tee.”

⁵⁵Anna mane ma'kada lako tau buda nakua: “Musangarakka to kadakea', ammu baa pa'dang sola bose sae ussakkana'? Kusanga siillalan liuna' Banua Ada'na Puang Allata'alla ke allo ma'loko ma'patudu. Maakari anna tae'na' musakka?

⁵⁶Sapo innang la dadi susi anna malara lemba' battakada mangka nauki' nabi illalan Buku Masero.” Mangkaii le'ba asammi passikolana sikakondong umpellei Puing Yesus.

⁵⁷Mangkai ussakka Puang Yesus nabaami lako banuanna Pongkena Imam disanga Kayafas. Dio angngenan iatoo, innang ma'rempummi to untarru' issinna sura'na Musa sola parepi'na to Yahudi.

⁵⁸Naula' manarangmi Petrus sae lako luba'ba banuanna Pongkena Imam, anna ummokko' dio sola to daga, ma'pesa'ding battu umba nakua lemba'na.

⁵⁹Umpeangmi to la sa'bi tatongan kapala imam anna angganna solana to nakala' pa'bisara alukna to Yahudi la umpaalinni kasalaan Puang Yesus anna malara dipatei.

⁶⁰Sapo tae' dengan lalan naita, moika anna budamo tau untula' kasa'bian tatongan. Tapakala, dengammo dua tau ke'de'

⁶¹anna ma'kada nakua: “Mangka kirangngi nakua: ‘Inde Banua Ada'na Puang Allata'allae mala kuroppokan, anna angga la tallungngallo la kuola umpake'de'i sule.’ ”

⁶²Ke'de' siami Pongkena Imam anna ma'kada lako Puang Yesus nakua: “Ta'raka la mutimba' inde pa'tanda'na tau lako kalemo?”

⁶³Sapo mengkamma' babang Puang Yesus. Ma'kada pole omi Pongkena Imam nakua: “Pa'pindaipoko Puang Allata'alla Dewata tuo ke sia Iko tongammo To dibasei bayu- bayu la ma'pasalama', Anakna Puang Allata'alla.”

⁶⁴Natimba' Puang Yesus nakua: “Ikomo melolo ungkuai. Sapo kutulasangkoa': ta'mo masae ammu ummitamoa' Anak Mentolino ummokko' dio tandai kananna To randan kuasa anna la sae illalan gaun yao langi'.”

⁶⁵Ussesse' siami pakeanna Pongkena Imam[79] anna ma'kada nakua: “Tarangngimia' untelle Puang Allata'alla. Ta'mo manggi' dengan sa'bi annu murangngi asammia' kadanna untelle Puang Allata'alla.

⁶⁶Umba iko nakua pikki'mua?” Pada-pada mentimba' nakua: “La dipatei.”

⁶⁷Dengammi tau untikkudui lindona, dengan undangguru'i, anna dengan toi untampilingi

⁶⁸anna kuanni: “O To dibassei bayu-bayu la ma'pasalama', benna untappa limaiko?”

⁶⁹Atta iatoo diopi duka' pa'rantean Petrus ma'loko. Saemi mesa sabua' baine anna ma'kada lako nakua: “Sisolako duka' inde Yesus to Galileae.”

⁷⁰Sapo mantelang Petrus narangngi tau dio nakua: “Tae' kuissanan aka mupokada.”

⁷¹Memberoi Petrus lako sa'de ba'ba bala pa'rantean, dengan pole omi mesa sabua' baine ummitai. Nakuamo lako to dio angngenan iatoo: “Inde taue innang solana Yesus iato to Nazaret-o.”

⁷²Mantelang pole omi Petrus lambisan ma'pinda. Anna mane nakua: “Tae' tongan-tongan kuissanan itin tauo.”

⁷³Tae' masae, sasaeammi to ke'de' dio angngenan iatoo untalimbung Petrus anna ma'kada lako nakua: “Manassa anna solanako annu dirangngimi samparan kadammu.”

⁷⁴Ma'pinda pole omi Petrus nakua: “Tae' tongan-tongan kuissanan itin tauo.” Lappa'na tula'na Petrus, moni siami manuk.

⁷⁵Tappa ungkilalai siami tula'na Puang Yesus lako kalena nakua: “Ta'pa moni manuk anna pentallummo' mutelang.” Le'ba siami lako salian Petrus ma'pase'gok se'gok tumangi'.